ဝဏ္ဏမာန်၊ မာတ် ၁၃၊ ၂၀၂၁

ဟိုတ်နူအကြာဗော်ဇၞးလဝ်မာဲ (၂၀၂၀) အေန်အေဝ်ဒဳတံကဵု ဒပ်ပၞာန်တံ သဳကၠဳပညဳပညပ် ဟွံပြေပြံၚ်ညးသ္ကံတုဲ နူကဵုဒပ်ပၞာန်ဂှ် ထိၚ်ဒဝ်ဏာအဝဵုဂှ် အကာဲအရာ ပရေၚ်ဍုၚ်ကွာန်ကၟိန်ဍုၚ်ဗၟာ ဂတဏံ ဍေံကလေၚ်ဆုတ်အာ ဗီုကဵု (၂၀၁၀) တေံပၠန် ဒှ်မာန်ရောၚ် သၟာသ္ၚဳဂၠိပ် ပရေၚ်ဍုၚ်ကွာန်မန် (ညးဂွံလဝ် တဆိပ်ကြာပါရဂူ ပရေၚ်ဍုၚ်ကွာန်သိပ္ပံ) (Ph.D Political Science) ဒံက်တာနာဲပညာမန် သ္ၚဳဂၠိပ်ရ။
“ရံၚ်ကေတ် အကာဲအရာဏံတှေ် အကြပ်ဒပ်ပၞာန်ဗၟာကဵု အေန်အေဝ်ဒဳတံ ပညဳညးသ္ကံ သွဟ်မာဲဟွံပြေပြံၚ်ဂှ်ရ ဒပ်ပၞာန်ဒးထိၚ်ဏာအဝဵု၊ အကြာဏံဂှ်တှေ် ညးတံပလေဝ်ပတိုန် ညံၚ်ဇြဟတ်ဗော်လ္ပာ်ညးတံ ဂွံဇၞးမာဲဏောၚ်၊ ညးတံပလေဝ်တုဲတှေ် ကလေၚ်ကၠောန်ပေဲါရုဲမာဲဏောၚ်၊ ဗော်ဇြဟတ်လ္ပာ်ဒပ်ပၞာန်ညးတံဂှ်ရ ဇၞးအာမာဲတုဲတှေ် အုပ်ဓုပ်အာ အဝဵုပၠန်ဏောၚ်၊ ဍေံတုပ်အာကဵု ပေဲါရုဲမာဲ (၂၀၁၀) တေံပၠန်ဏောၚ် အဲညာတ်” သာ်ဝွံ နာဲပညာမန် ဟီုရ။
နူကဵုဒပ်ပၞာန်တံ ထိၚ်ဒဝ်ဏာ အဝဵုဍုၚ်တုဲဂှ် ဒက်ပတန်ကၠုၚ် ကမ္မယှေန်ပေဲါရုဲမာဲကၟိန်ဍုၚ်တၟိ၊ ဆဵုဂဗကၠုၚ် ကုဗော်ပရေၚ်ဍုၚ်ကွာန်ဂမၠိုၚ်၊ ချပ်သဳကၠဳကၠုၚ် ပရေၚ်ပေဲါရုဲမာဲ သွက်ဂွံကၠောန်ဂတဏံရ။
“ညးတံ (ဒပ်ပၞာန်) တံ ပလေဝ်ပလေတ်စ တုဲဒှ်အိုတ်တှေ် ညးတံ ကလေၚ်ကၠောန်ပေဲါရုဲမာဲတၟိဏောၚ်၊ ပေဲါရုဲမာဲဂှ်လေဝ် ဗော်ဇြဟတ်ညးတံရ ဘိုအ်ဂွံဇၞးဏောၚ်၊ ဍေံတုပ်အာကဵု ပေဲါရုဲမာဲ (၂၀၁၀) တေံပၠန်ဏောၚ်၊ ညးတံရ ဆက်အုပ်ဓုပ်အာ၊ ထ္ၜးဟိုတ်သွဟ်ပေဲါရုဲမာဲဏောၚ်” သာ်ဝွံ နာဲပညာမန် ဆက်သ္ၚဳဂၠိပ်ထ္ၜးရ။
ပေဲါရုဲမာဲဂတဏံဂှ် နူကဵုကံၚ်သဳအုပ်ဓုပ်ကၟိန်ဍုၚ်တံ စၟဳစၟတ်မမာဲတုဲဒှ်အိုတ်တုဲ ပွိုၚ် (၁) သၞာံမ္ဂး ညးတံဆက်ကၠောန်ပေဲါရုဲမာဲတၟိတုဲ ဗော်ဇၞးမာဲဂှ် ကလေၚ်သၠောဲပအပ်ကဵု အဝဵုရောၚ် ဟီုဓမံက်လဝ်ရ။