ပ္ဍဲကဵုဂိတုမေ စၟတ်တ္ၚဲ ၁၆ နူကဵုမုက်လိက် KMO media ဂှ် ပ္တိုန်လဝ်ပရိုၚ် ဒဒှ်ရ ညးတာလျိုၚ် DKBA (ကရေၚ်ဗုဒ္ဓဘာသာ) သီုကောန်သ္ဂံၚ် ၂ လက် ပံၚ်တောဲကဵု ဗော်ကရေၚ် ကေန်အေန်ယူ သီုကဵုဗီုရုပ်တုဲ မၞိဟ်ကလေၚ်တြးပ္တိတ် နွံဗၞတ် ၆၈၀ တၠပြၚ်ဂှ် နူကဵုဌာန်ပရိုၚ် (တွေးပြီးမှယုံ) တအ် သ္ပဒတန်လဝ်နွံဒၟံၚ်ရ။
ပရူပရာပ္ဍဲပရိုၚ်ဂှ်မ္ဂး “ပ္ဍဲကဵုဂိတုမေ စၟတ်တ္ၚဲ ၁၆ ဏံဂှ် နူကဵုဒပ် DKBA ဂှ် သီုကဵု (စောအောၚ်ဆန်း)တှ်ေ ညးတာလျိုၚ် (၄) တၠကဵု ကောန်သ္ဂံၚ် (၂) လက်ပြၚ်တအ်ဂှ် ကၠုၚ်ပံၚ်ကောံကဵု ဒပ် KNU တအ် နွံမံၚ်ရောၚ် ဆေၚ်စပ်ကဵုပရိုၚ်ဏံတုဲ ကလေၚ်ဆက်ပ္တိုန်အာကဵုပၠန်ရောၚ်” သာ်ဝွံ ချူပ္တိုန်လဝ်ရောၚ်။
ဆေၚ်စပ်ကဵုပရိုၚ်ဏံဂှ် မွဲအခိၚ်တေံ ပ္ဍဲသၞာံ ၂၀၂၀၊ ဂိတုမတ် ၁၄ ဂှ် နူကဵုဌာန်ပရိုၚ်ဗၠးၜးတအ် မဗ္တံကဵု Myanmar Times ကဵု Irrawaddy တအ် ကေၚ်ပ္တိုန်လဝ်နွံဒၟံၚ်ရ။ ပရိုၚ်ဍိုက်က်ပေၚ်ၚ်ဂှ်တှ်ေ နူကဵု ဒပ် DKBA ဂှ် သီုကဵု ဗိုလ်ဇၞော် (စောအောၚ်ဆန်း)တှ်ေ ညးတာလျိုၚ် (၁၃) တၠတအ် ဖျေံလဝ်လွဟ်ကဵု ဒပ်ပၞာန်ဗၟာတအ်ရောၚ် ချူပ္တိုန်လဝ်နွံဒၟံၚ်ရ။ ဗိုလ်ဇၞော် (စောအောၚ်ဆန်း)ဂှ် လောန်ကၠုၚ် ၂၀၂၀တေံဂှ် နူကဵုဒပ် DKBA ဂှ် ပြံၚ်စိုပ်အာ ပ္ဍဲကဵုဒပ် ပၞာန်ဗၟာတအ်တုဲ သွက်ဂွံကလေၚ်ပံၚ်ကောံကဵု ဒပ် KNU ဂှ် ဒှ်ပရိုၚ်ပ္တောံမွဲသက်သက်ရောၚ် ဟီုဂွံရ။
နူကဵုဌာန်ပရိုၚ်ဗၠးၜးကရေၚ် Karen Information Center တအ်လေဝ် ပရိုၚ်ဒပ် DKBA တအ် နကဵုဇြဟတ် (၂) ပံၚ်ကောံ ကဵု ဒပ် KNU ရောၚ် ပရိုၚ်ပြးတိတ်ဒၟံၚ်လ္တူလာၚ်တအ်ဂှ် ပရိုၚ်ပ္တောံမွဲရောၚ် ချူသ္ပဒတန်လဝ် နွံဒၟံၚ်ရ။
ပ္ဍဲကဵုကာလအခိၚ်လၟုဟ်ဏံဏောၚ်ဟီုတှ်ေ အကြာပ်ဒပ်ပၞာန်ဗၟာကဵု ဒပ်ပၞာန်ကောန်ဍုၚ်အရၚ်တအ် ဒှ်ဒၟံၚ်ပေဲါဗတိုက်ဂှ် အသိၚ်ဇၞော်တိုန်ကၠုၚ်ဒၟံၚ်အရိုဟ်ဟ်တ္ၚဲရောၚ် ဂွံတီကေတ်ရ။ ဆေၚ်စပ်ကဵုပရိုၚ်ဗီုတအ်ဏံတှ်ေ ပ္ဍဲကဵုဌာန်ပရိုၚ်လုပ်သၞောဝ်ဂမၠိုၚ်တအ်ဂှ် အခိၚ်ညံၚ်ဟွံဂွံပိုတ်သ္ကုတ်အာဂှ် ပ္တိုန်ဒၟံၚ်ကဵုအရိုဟ်တ္ၚဲရ။
ပရိသာတ်မန်ညးမဗှ်လ္ၚတ်ဒၟံၚ်ပရိုၚ်တအ်ဂမၠိုၚ်လေဝ် မုက်လိက်နွံ လ္တူ Facebook ဂမၠိုၚ်တအ်ဂှ် သ္ပညံၚ်ရဴဌာန်ပရိုၚ်လုပ်သၞောဝ်မွဲတုဲ ဗက်ပြးဒၟံၚ်ပရိုၚ်ဟွံဍာံတအ်ဂှ် နွံဒံၟံၚ်ရ။ ဟိုတ်ဒှ်သာ်ဂှ် မုက်လိက်ဗီုတအ်ဏံတအ် ယဝ်ခါရ ပ္တိုန်နၚ်တၚ်နၚ်ပရိုၚ်မွဲမွဲသာ်မ္ဂး လ္ပပတှ်ေပြဟ်ဏီညိဂှ် မိက်ဂွံဗတိုက်ဖအောဝ်ဏာရ။
