မာံသုခ၊ ဂျူလာၚ် ၄၊ ၂၀၂၁
ဒဵု (ခုံဘမ်းတောၚ်) မၞုံပ္ဍဲပွိုၚ်ဍုၚ်လှာဒကှ်၊ ကွာန်လှာခဍးဂှ် ကၠာတေံ ဟိုတ်နူပရေၚ်ဆက်စၠောံဂၠံၚ်ဍာန်ဟွံခိုဟ်တုဲ ညးစိုတ်လုပ်စ ဂွံတိုန်ဝေၚ်ဒဵုဏံအောန်ကီုလေဝ် လၟုဟ် ဟိုတ်နူပရေၚ်ဆက်စၠောံဂၠံၚ်ဍာန် အာကၠုၚ်လောဲသွာကီု ဒှ်ဒၞာဲပြေလၟောၚ်ကိတ်ညဳကဵုဒၞာဲတက်ဗီုခိုဟ်မွဲကီုတုဲ ဝုတ်ဗၠာဲကၟုဲနူဌာန် သ္ၚောဲကြပ်တအ် စိုတ်လုပ်ကၠုၚ် ဂေတ်တိုန်ဝေၚ်ဒဵု (ခုံဘမ်းတောၚ်) ဏံ ဂၠိုၚ်ကၠုၚ်ရ။
ၜိုန်ရပရေၚ်ဍုၚ်ကွာန် ဟွံညိၚ်ဝတ်ဂှ် ပ္ဍဲဒေသလှာဒကှ် အကြာကွာန်ကရေၚ် မပ္တံလွဟ်ဗြု စံၚ်တိုၚ်ဖုၚ် ဒှ်ကၠုၚ်မံၚ်ကီုလေဝ် ညးအာဝေၚ်ဒဵုကျာ်ဏံဂှ် ဆက်နွံမံၚ်ဖိုဟ်ဏီရ။
“မၞိဟ်ဂှ်တှေ် အရိုဟ်တ္ၚဲရ၊ စနူ (၁၁) နာဍဳ စဵုစိုပ် (၃၊ ၄) နာဍဳ အကြာဏံ ကွာန်ကရေၚ်တှေ် နွံမွဲကွာန်ရ၊ ကွာန်မန်ရဂၠိုၚ်တှေ် ဗွဲမဂၠိုၚ် နူလှာဒကှ်ဏံ မုဟ်ဍုၚ် ဇြပ်ဗု ကၠုၚ်ဂၠိုၚ်” သာ်ဏံ ညးဒဳဂၠုၚ်ပလံၚ်ဗ္စိုပ်ဒဵုကျာ်ဂှ်မွဲတၠ မာံဂျေန်မေန်ဟုၚ် နူကွာန်လှာခဍးဂှ် ဟီုရ။
ဒဵုကျာ်ဏံဝွံ မ္ၚးနူဝုတ်ဗၠာဲတအ်တုဲ ဇၟာပ်စိုပ်တ္ၚဲအဒိုတ်၊ သ္ၚိသဝ် ဒှ်တ္ၚဲကၟာတ်ဘာမ္ဂး ကွးဘာတအ် ဂၠောဲကၠုၚ်ဂၠိုၚ်မံၚ်ဏောၚ် ဂွံတီကေတ်ရ။
ဒဵုကျာ် (ခုံဘမ်းတောၚ်) ဏံဝွံ ကသီုမ္ဂး ဍာ်ဗိုၚ်လဝ်တုဲ ဂၠံၚ်တိုန်ဒဵုကျာ် နွံၜါဍာန်ရ၊ မိက်ဂွံဂေတ်ဗဵုဝေၚ်ဒဵုကျာ်မ္ဂး ဒးအာကဵုဂၠုၚ် ဍာန်လ္ပာ်ဗၟံက်ဒဵုဂှ်တုဲ ဒးကဵုၚုဟ်ဂၠုၚ် အာ၊ စဴ ညးမွဲ (၅၀၀) ဒ္ကေဝ်ရ၊ ဍာန်လ္ပာ်ပလိုတ်ဂှ် ကွာ်အာကဵုဒဒန် တိုန်အာဒဵုစိုပ်ဒဵုကျာ်ရ။
ဒဵုကျာ် (ခုံဘမ်းတောၚ်) ဒဵုကျာ်ကွာန်လှာခဍးဂှ် နွံပ္ဍဲကွာန်ကရေၚ်မွဲကွာန်ဓဝ်တုဲ ကွာန်မန်ဗိုၚ်ဂေတ်လဝ် မပ္တံ ကွာန်ဝါကၠောၚ်၊ ကွာန်ကၠအ်ဗြာတ်၊ ကွာန်လိုၚ်ကၞုဲတအ်ရ။
ပ္ဍဲဒေသလှာဒကှ်ဝွံ ဒဵုကျာ်ညးစိုတ်လုပ်စဂမၠိုၚ် မပ္တံကျာ်ဇိုၚ်ဒဵု ကွာန်ဒဵုထောၚ် (ဖားပြတောၚ်) ကွာန်ဖာပြ ကျာ်မိပြၚ်တအ် ကၟုဲကၠုၚ်စိုပ်မံၚ်နွံရ။
