ဝဏ္ဏမာန်၊ အဝ်ဂါတ် ၃၀၊ ၂၀၂၁
အသေအဟာန် တ္ၚဲစၟတ်သမ္တီ သဘၚ်ရတုထဝ် ဗွိုက်လ္တက်ကယျိုၚ်မန် (ပေၚ် ၅၀) သၞာံ ရန်လဝ်သွက်ဂွံကၠောန်အာ ပ္ဍဲဂိတုနဝ်ဝေမ်ဗာ (၂၁) ဂှ် ဟိုတ်နူယဲကပ်ကၠောံထၞာန် ဟွံဟဲဇးဏီတုဲ ပဆုဲဏာ စဵုကဵု သၞာံ (၂၀၂၂) တေံရ။
ပရေၚ်ပဆုဲဏာ တ္ၚဲစၟတ်သမ္တီ သဘၚ်ရတုထဝ် ဗွိုက်လ္တက်ကယျိုၚ်မန် (ပေၚ် ၅၀) သၞာံဂှ် တုဲကၠုၚ်ကောံဓရီုလၟေၚ် အလန်ပဥ္စမ ဂိတုဂျူလာၚ် (၂၅) ဂှ် သဳကၠဳသ္ပလဝ်ဒတန်တုဲ ပ္ဍဲကဵုကောံဓရီုလၟေၚ်အလန်ဆဌမ အဝ်ဂါတ် (၂၉) ဂှ် လေဝ် ထပ်သ္ပဒတန်ပၠန်တုဲ ကိစ္စပဆုဲလဝ် တ္ၚဲသဘၚ်ရတုထဝ် ဗွိုက်လ္တက်ကယျိုၚ်မန် (ပေၚ် ၅၀) သၞာံဂှ် ထပ်တုဲ လလောၚ်တြးအာ ပ္ဍဲပရိုၚ်ပၠန်ရောၚ် ဂွံတီကေတ်ရ။
ပ္ဍဲကဵုအသေအဟာန် စၟတ်သမ္တီသဘၚ်ရတုထဝ် ဗွိုက်လ္တက်ကယျိုၚ်မန် (ပေၚ် ၅၀) သၞာံဂှ် နူကဵုကမ္မတဳ သွာၚ်ထ္ၜးပျးတံ ကော်ဘိက်အာ ဆေၚ်သွံဂၠိက်ယာတ်ကယျိုၚ်မန် ပွိုၚ်ဍုၚ်ဂမၠိုၚ်တုဲ စဳဇန်ထ္ၜးပျးအာ စတံနူ ခေတ်ဟံသာဝတဳ အဆက်ဆက်ကီု၊ ခေတ်ဗကာံကီု၊ ခေတ်ဒွါဝတဳ (သေံ) ကီု ဗွိုက်လ္တက်ကယျိုၚ်မန် ခေတ်တ္ၚဲဏံ သာ်လဵုတၟေၚ်တၞဟ်ခြာဂှ် ကမ္မတဳသွာၚ်ထ္ၜးပျး ဗွိုက်လ္တက်တံ ချူဓဇက်မူဝါဒတုဲ ဖျေံအာဗီု ကုဂကောံထ္ၜးပျးတံဂှ် ရန်လဝ်နွံရ။
ဗွိုက်လ္တက်ကောန်ဂကူမန်ဂှ် စတံနူ (၁၉၇၁) သၞာံ၊ ဂိတုအဝ်ဂါတ် (၂၁) တေံ ကမ္မတဳလိက်ပတ်ယေန်သၞာၚ်မန် လ္ဂုၚ် (ဂကောံကွးဘာတ္ကသဵုဂမၠိုၚ်) စဗၟံက်ရုပ်ရဴ စပ်ကဵုဗွိုက်လ္တက်ကယျိုၚ်မန်တုဲ သၞာံ (၂၀၂၁) ဂိတုအဝ်ဂါတ် (၂၁) ဂှ်မ္ဂး ဗွိုက်လ္တက်ကယျိုၚ်ကယျဝ်မန် (ခေတ်ပစ္စုပ္ပန်ဏံ) သ္ပဂွံဒတန် (၅၀) သၞာံ ပေၚ်ကၠုၚ်ရ။
ပရေၚ်ထ္ၜးပျး ဗွိုက်လ္တက်ကယျိုၚ်မန်ဝွံ ကာလကၠောန်ဗဒှ်လဝ် စၟတ်သမ္တီပေၚ် (၄၀) သၞာံ၊ ဒစးဒုၚ်သဘၚ်ရတုထဝ် တုဲကၠုၚ် (၁၀) သၞာံတေံလေဝ် ကေၚ်ကၠောန်လဝ် ပ္ဍဲကဵုဟဝ်တေဝ် (ယှိုဲမျေအ်မဵုထောန်)၊ ဍုၚ်မတ်မလီုနွံရ။
သွက်သ္ဂောံကၠောန်ဗဒှ် အသေအဟာန် စၟတ်သမ္တီ သဘၚ်ရတုထဝ် ဗွိုက်လ္တက်ကောန်ဂကူမန်ဂှ် တုဲကၠုၚ်ဂိတုအေဗရဴ (၄) တေံ ဂကောံဗၟံက်ပတိုန် ဗွိုက်လ္တက်ကောန်ဂကူမန်ဂမၠိုၚ် ကော်ကောံဓရီု ပ္ဍဲဘာဇောတိကရာမ ဍုၚ်မတ်မလီုတုဲ ဒက်ပတန်ဏာလဝ် ကမ္မတဳကၠောန်ဗဒှ် သဘၚ်ရတုထဝ်ရ။
