ဝဏ္ဏမာန်၊ အံက်တဝ်ဗာ ၁၃၊ ၂၀၂၁

ဂကောံမန်ဌာန်သ္ၚောဲဂမၠိုၚ် ပံၚ်ကောံတုဲ ပ္ဍဲဂိတုအံက်တဝ်ဗာ (၂၅) ဏံမ္ဂး ကၠောန်ဗဒှ် အသေအဟာန် အပ်ပြာပ်ဇိုန် ဏှၚ်တဆိပ်ကြာ ‘ဝဳရဟံသာ’ ကုဥက္ကဌဇၞော်ဂုဏ်တၟေၚ် နာဲထဝ်မန် ပ္ဍဲကဵုသ္ၚိညး ကွာန်ဝၚ်ကနွံရ။
“ပိုဲရဲကၠောန်ဗဒှ်တံ သ္ၚဳဂၠိပ်ကေတ်ဂှ်တှေ် ညး (ဥက္ကဌဇၞော်ဂုဏ်တၟေၚ် နာဲထဝ်မန်) ၜိုန်ရအာယုက်ဇၞော်ကၠာလေဝ် ထေက်ကဵုဒးဒေံါဇူရဂှ်လေဝ် ပ္ဍဲကဵုပရေၚ်ဍုၚ်ကွာန်မန်ဂှ် ညးဟွံဒေံါကၠုၚ်ဏီပုဟ်၊ ညးဆက်ကေတ်မံၚ်တာလျိုၚ်ဏီ ပိုဲ ညာတ်ဗီုဂှ်၊ စိုတ်ဓာတ်ညးကီု၊ လညာတ်ညးကီု ရံၚ်ကေတ်ဟဏံတှေ် ဇိုၚ်တဲကာယညး ၜိုန်ရအာကၠုၚ်ဟွံမာန်လေဝ် ဇြဟတ်စိုတ်ညး ပိုဲရံၚ်အဵုဇှ်တုဲ တဆိပ်ကြာ ‘ဝဳရဟံသာ’ ဏံဂှ် ထေက်ကြိုက်ကဵုညးဏောၚ် ပိုဲသ္ၚဳဂၠိပ်တုဲတှေ် ဖျေံအစဳဇန် ဇိုန်ဏှၚ်တဆိပ်ကြာဏံ” နာဲစူလာနန် ကမ္မတဳဖန်ဇန် ဇိုန်ဏှၚ်တဆိပ်ကြာ ဟီုရ။
ပ္ဍဲကဵုတဆိပ်ကြာဂှ် ကၠောန်လဝ် တဆိပ်စၚ်သြိုဟ်ရုပ်ၜိုပ်ထဝ် နကဵုထဝ် အောန်အိုတ် လျိုၚ် (၁) ဒကေဝ်တုဲ ကာလ ဂွံသြန်ဒါန်ဂၠိုၚ်မ္ဂး (၁) ဒကေဝ်ကပါ်၊ လျိုၚ် (၂) ဒကေဝ် မပတံသာ်ဏံ ကမ္မတဳဖန်ဇန်တံ ရန်လဝ်နွံရ။
“ယၟုတဆိပ်ကြာ ‘ဝဳရဟံသာ’ ဂှ် ဂံၚ်သ္ကာဏောၚ်၊ နွံကဵုဇဲလွဳဏောၚ်၊ ဗွဲမအဲပရဲ မၞိဟ်ဂလိုၚ်ထေက်ကဵု ဒးသ္ပရှေ်သှေ်ဏောၚ်၊ ပိုဲရံၚ်ကေတ် ပ္ဍဲဥက္ကဌဇၞော်ဂုဏ်တၟေၚ် နာဲထဝ်မန်ဂှ်တှေ် လက္ချန်ညးဍိုက်ပေၚ်မံၚ် ပိုဲညာတ်ဂှ်ရ ပိုဲဇိုန်ဏှၚ်ကဵု တဆိပ်ကြာဏံ” သာ်ဝွံ နာဲစူလာနန် ဟီုရ။
တဆိပ်ကြာ ‘ဝဳရဟံသာ’ ဂှ် ဂကောံမန်ဍုၚ်သေံ၊ ဂကောံမန်ဍုၚ်ဂျပါန်၊ ဂကောံမန်ဍုၚ်ကိုဝ်ရဳယျာ၊ ဂ ကောံမန်ဍုၚ်သေၚ်္ဂပေါဝ် စတံ ဖအိုတ် (၁၂) ဂကောံ ပံၚ်ကောံစဳဇန်လဝ်ရ။
ပ္ဍဲကဵုဗွိုၚ်ဂကူမန်ဂှ် တုဲကၠုၚ်ပေဲါရုဲမာဲ (၂၀၂၀)၊ ဂိတုဒဳဇြေမ်ဗာ (၂၆) ဂှ် သ္ပဟိုတ်နူကဵု ဒံက်တာအံၚ်နာၚ်ဥု ဂွံဇၞးကေတ် ပေဲါရုဲမာဲ သီုပိအလန်အဆက်က် (၂၀၁၀၊ ၂၀၁၅၊ ၂၀၂၀) တုဲ နူဂကောံမန်ဍုၚ်နာနာတံ ပံၚ်ကောံတုဲ ဇိုန်ဏှၚ်ကၠုၚ် နကဵုယၟုတဆိပ်ကြာ ‘ပဏဳတဟံသာ’ (ခိုဟ်သၠုၚ်ပြဲ-ၜိုပ်ထဝ်) ပ္ဍဲရာမညဗုဒ္ဓတက္ကသိုလ် ဍုၚ်မတ်မလီုရ။