နာဲခပဝ်

ကာလလၟုဟ် ဂွံဆဵုညာတ်ကေတ်ပရိုၚ် ကောန်ဍုၚ်ဗၟာ လုပ်ကၠုၚ်ဍုၚ်သေံ ဗွဲမဂၠိုၚ် ဒးဒုၚ်ရပ် အကြာပယျဵုကီု အကြာဍာန်တံတုဲ စိုတ်ဟွံမိပ်ကွေံကွေံရောၚ်။ ရဲလုပ်ဍုၚ် ဗွဲမဂၠိုၚ်တံဂှ် ကေတ်အဆက် ကုရဲပၠောပ်စမၞိဟ် ပ္ဍဲလ္ပာ်ဍုၚ်သေံ ကဵုသြန် နူကဵု (၁၅၀၀၀) ၝာတ် စဵုကဵု (၂၅၀၀၀) ၝာတ်တုဲ လုပ်ဍုၚ်သေံ ပ္ဍဲကဵုဂၠံၚ်ကမၠတ် ပ္ဍဲကဵုဂၠံၚ်ဂြိုပ်ရ။ စိုပ်ဍာန်ကွဳစက်မ္ဂး ကၠုၚ်ဒုၚ်ရောၚ် ဂးရ။ ဆဂး ဗွဲမဂၠိုၚ် ဒးအလီရ။ ဗၠာဲသၟိၚ်သေံတံ ပၞာန်သေံတံ ရပ်ဂွံကိုပ်ကၠာရ။ ဆောံသြန်ရ။ တုဲပၠန် ဒးဒုၚ်ပၠောပ်အချုက်တုဲ ဒးဒုၚ်ပလံၚ်ဖျဴရ။ မွဲသာ်ပၠန် အဃောကၠတ်လုပ်ဍုၚ် သာ်ဏံဂှ် ယဝ်ရမၞိဟ်မွဲမွဲ အာစာဂဥုဲတံ စမ်ၜတ်တုဲ ဆဵုစုတ်ယဲပၠန်မ္ဂး ဒးဒုၚ်ဂၠိုၚ်ရောၚ်။
တ္ၚဲဏံ ဍုၚ်သေံဂှ် ညးတံ ပံက်ဍုၚ်ညးတံရောၚ် ဟီုဂးကီုလေဝ် ညးတံ မိက်ဂွံကဵုလုပ်ဍုၚ်ညးတံ နကဵု ဗဗွဲဓရ်ကီုရ။ ညးတံ ဟွံမိက်ကဵု ကၠတ်လုပ် ဍုၚ်ညးတံတုဲ မိက်ဂွံကဵု လုပ်ဗဗွဲဓရ်ရ။ လုပ်ဗဗွဲဓရ်မ္ဂး ညးတံ ဒုၚ်တၠုၚ်မံၚ်ရ။ ပ္ဍဲဍုၚ်သေံဂှ်မ္ဂး ဟိုတ်နူကဵု ညးတံ ပံက်ဍုၚ်ညးတံတုဲ ဒးပံက်ဒၞာဲကမၠောန်ညးတံ ဗွဲမဂၠိုၚ်ရောၚ်။ ဒၞာဲဟဝ်တေဝ်တံ ဗွဲမဂၠိုၚ်ကီု ဒၞာဲဝေၚ်ဗွဲမဂၠိုၚ်ကီု ကမ္ပဏဳသိုၚ်ခၞံတံ ဗွဲမဂၠိုၚ်ကီု စကမၠောန်ညးတံကီုရ။ ညးတံ နွံပၟိက်ကဵု သၟာကမၠောန်တံ ဗွဲမဂၠိုၚ်ရ။ ဆဂး ညးတံ နွံပၟိက် သွက်ဂွံလုပ် ဍာန်ဗဗွဲဓရ်ရောၚ်။
ခြာဟွံလအ်ကၠုၚ်တေံ အတိုၚ်ဌာနဝန်ဇၞော် သၟာကမၠောန်ဍုၚ်သေံတံ လလောၚ်တြးဂှ်မ္ဂး ညးတံ နွံပၟိက် သၟာကမၠောန် နူကဵုဍုၚ်မ္ၚး ဗၞတ် (၄) ကိုဋ်တၠတုဲ မိက်ဂွံကဵု သၟာကမၠောန် နူကဵုဍုၚ်ဗၟာတံ လုပ်အာ ဗၞတ် (၈၀၀၀၀) တၠရ။ မိက်ဂွံကဵုလုပ်ဗဗွဲဓရ် ကေတ်အဆက် ကုကမ္ပဏဳဂၠိုက်ဂၠာဲသၟာကမၠောန်တံတုဲ ကၠောန်ပါတ်သပတ် (Passport)၊ ကေတ်အခေါၚ် အာတ်ကမၠောန် (Work Permit) တုဲမ္ဂး အာတ်လုပ်ဍုၚ်သေံ – ဗဳသာ (Visa) တုဲမ္ဂး လုပ်အာဍာန်ဗဗွဲဓရ် နကဵုဍာန်က္ၜၚ်ကျာကီုဒှ် ဍာန်တိုက်ကီုဒှ် လုပ်အာမာန်ရ။
ရုဲစှ်ကေတ် ဍာန်ဗဗွဲဓရ်ဏံညိ။ တ္ၚဲဏံ မုဟိုတ် အလဵုအသဳသေံတံ နွံပၟိက် သွက်ဂွံလုပ်ဍုၚ်သေံ နကဵု ဗဗွဲဓရ်ရော။ တ္ၚဲဏံ ညးတံ ဂွိၚ်အိုတ်ဂှ် ဖေက်ယဲကပ်ကိုဝ်ဝေဒ် (၁၉) ကၠောံစပ်လုပ်အာ နူကဵုသၟာကမၠောန်တံကွေံကွေံရ။ လောန်ကၠုၚ် ပ္ဍဲအခိၚ်လပှ်ယဲ အလန်ဒုတိယတေံဂှ် သၟာကမၠောန်ဍုၚ်ပိုဲ ကလိဂွံယဲတုဲ ကၠောံအာ ပ္ဍဲကဵုဗွိုၚ်မဟာဆာဲ (သမုဒ်သဃမ်) ဂှ် ဌာနပရေၚ်ထတ်ယုက် အလဵုအသဳတံ ဒးလုပ်ပြာ်ယဲဂှ် ဗွဲမဝါတ်ဂါတ်ရ။ မွဲမွဲတ္ၚဲ လၟိဟ်မၞိဟ်ယဲ စဵုကဵု (၃၀၀၀) တၠ ဍေံကတဵုဒှ်ကၠုၚ်နွံရ။ စပ်ကဵု မၞိဟ်မွဲမွဲ တြးယဲရောၚ် သက်သဳကၠးမရောၚ်ဟီုမ္ဂး ဒးထံၚ်ဂၠိုၚ်အိုတ် ၜါသၞာံ (ဝါ) ဒးတပ်ဒဏ်သြန် ဗၞတ် (၅၀၀၀၀) ၝာတ်မာန်ရောၚ်။
ဟိုတ်ဂှ်ရ အလဵုအသဳသေံဂှ် ညးတံ ပံက်လဝ်ပၞော်ပယျဵုညးတံ ဗဗွဲဓရ်တုဲ နကဵုပါတ်သပတ် သွက်ဂွံလုပ်စိုပ်ဂှ် နွံပၟိက်ရ။ ယဝ်ရညးမွဲမွဲ ထပက်လဝ်ဂဥုဲစဵုဒၞာတုဲဒှ်မ္ဂး ညးတံ စွံလဝ်အဆံၚ်ပထမ အရံၚ်သာ်ၚေက်တုဲ ကဵုအခေါၚ်လုပ်ဍုၚ်သေံလွာဲဂှ်ရ။ သွက်ရဲထပက်လဝ်ဂဥုဲ ဂွံမွဲတၞိၚ်တံဂှ် ညးတံစွံအဆံၚ်ဒုတိယ အရံၚ်ဍာ်မိတ်တုဲ ကဵုမံၚ်ပ္ဍဲဒၞာဲကွာရာန်တဳ (Quarantine) ဗၞတ်မွဲသတ္တဟတုဲ ကဵုအခေါၚ်လုပ်ဍုၚ်သေံရ။ ညးဟွံဂွံထပက်လဝ် ဂဥုဲစဵုဒၞာသက်က်ဂှ်တှေ် ညးတံစွံလဝ်အဆံၚ်တတိယတုဲ ဒးလုပ်ပ္ဍဲကဵုဒၞာဲကွာရာန်တဳ (Quarantine) ဗၞတ်ၜါသတ္တဟတုဲ ကဵုအခေါၚ်လုပ်ဍုၚ်သေံရ။
သရုပ်မ္ဂး မိက်ဂွံဆဝ်မ္ၚုဟ်ကဵု ဂကူမန်ပိုဲ ဒးလုပ်ကၠောန်စ ပ္ဍဲဍုၚ်သေံမ္ဂး လ္ပလုပ်ဂၠံၚ်ကမၠတ်ညိ။ လုပ်ဂၠံၚ်ဗဗွဲဓရ်ညိအဴ။