ဝဏ္ဏမာန်၊ နဝ်ဝေမ်ဗာ ရ၊ ၂၀၂၁
ပ္ဍဲဂကူမန်ပစ္စုပ္ပန်တ္ၚဲဏံမ္ဂး ဂကောံရေၚ်တၠုၚ်ချဳဓရာၚ်ဒၟံၚ် စပ်ကဵုသွာၚ်ပရေၚ်လိက်ပတ်ယေန်သၞာၚ်မန် နွံဂၠိုၚ်ကဵုဂကောံတုဲ ကဏ္ဍညး ကဏ္ဍညး ချဳဓရာၚ်ရေၚ်တၠုၚ်ဒၟံၚ် ပရေၚ်ဇၞော်မောဝ်လိက်ပတ်မန်နွံဂှ် ဂွံဆဵုကေတ်ရ။
ဒးဟီုထ္ၜးမ္ဂး စတံကဵု ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ – ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာဂှ် ဂကောံလိက်ပတ်ယေန်သၞာၚ်မန် ချဳဓရာၚ်သွာၚ်ဘာဥတုကညၚ် အလုံဒေသရးမန် ရေၚ်တၠုၚ်ဒၟံၚ် ဂွံဆဵုကေတ်ရ။
အခိၚ်ဘာတန်တုဲ ပွိုၚ် (၁) ဂိတု (၂) ဂိတုဂှ် ဂကောံသၚ် ကေုာံ ခရှ်ညးဆာန်သၞေံသၞဴ ပရေၚ်လိက်ပတ်မန်တအ် ပံၚ်ကောံတုဲ ပံက်ပတိုန်ဘာဥတုကညၚ် ပ္ဍဲအခိၚ်အောန်အောန်ဂှ်တုဲ ကၠောန်ပတိုန်သဘၚ်သၟာန်သွဟ်လိက် အဆံၚ်ကွာန်၊ အဆံၚ်ပွိုၚ်တိုက်၊ အဆံၚ်ပွိုၚ်ဍုၚ်၊ အဆံၚ်အလုံဒေသရးမန် မပတံသာ်ဏံ ရေၚ်တၠုၚ်ကၠောန်ၜိုတ်တဴနွံရ။
ဂကောံတက်တြးပတိတ် လိက်ဂျာနေဝ်၊ မဂ္ဂဇြေန်၊ လိက်ပရိုၚ် – ဂကောံတက်တြးပတိတ်ဒၟံၚ် လိက်ပတ်မန် မပတံကဵုလိက်ဂျာနေဝ်၊ လိက်မဂ္ဂဇြေန်၊ လိက်ပရိုၚ်နာနာတအ်ဂှ် အကာဲအရာဂကောံညးကဵုညး ဗီုပြၚ်ဂကောံညးကဵုညး တက်ပတိတ်ဒၟံၚ်လၟေၚ်လၟေၚ်နွံရ။
တက်တြးပတိတ်ဒၟံၚ် ဗွဲလၟေၚ်လၟေၚ် ဂွံဆဵုကေတ်မ္ဂး လိက်ဂျာနေဝ်အမာတ်ဒိန် မွဲဂိတုမွဲဝါ၊ လိက်ပရိုၚ်သၞံၚ်တိုၚ်မ္ဂး မွဲဂိတုၜါကၞပ်၊ လိက်မဂ္ဂဇြေန် ဂကောံအ္စာကၞေဟ်မန်ဂှ် မွဲသၞာံမွဲကၞပ်၊ လိက်ဂကောံတၞဟ်တၞဟ်လေဝ် အကာဲအရာညးကဵုညး ဗီုပြၚ်ညးကဵုညး ဂကောံလ္ၚဵု ဟိုတ်နူခက်ခုဲနာနာသာ်တုဲ ဒးဒေံါဇူအာနွံ၊ ဂကောံလ္ၚဵု အကြာတၚ်ခက်ခုဲနွံနာနာသာ်ဂှ် ဆက်တက်ပတိတ်တြးဒၟံၚ်လေဝ် နွံရ။
ကမ္မတဳပရေၚ်ပညာကောန်ဂကူမန် – ဌာနပရေၚ်ပညာကောန်ဂကူမန် ကေုာံ ကမ္မတဳပရေၚ်ပညာကောန်ဂကူမန်ဂှ် ပဲါနူပရေၚ်ကမၠောန်ဗ္တောန်လိက်ပ္ဍဲဘာအတန်တုဲ မပတံကဵု ပရေၚ်ချူခၞံဇုတ်ဓရံၚ်ဗ္တောန်တန်သၠုၚ်၊ တန်လ္ဒောဝ်၊ တန်မူလ ညးစိုန်သကီုပရေၚ်လိက်ပတ်မန်တအ် ဒးချူခၞံဒၟံၚ် ဗွဲလၟေၚ်လၟေၚ်နွံရ။
လၟုဟ်ဝွံလေဝ် အဃောပလေဝ်ပလေတ်စဒၟံၚ် သွက်ဂွံချူခၞံ ဇုတ်ဓရံၚ်ဗ္တောန် သွက်တန်သၠုၚ်နွံရ။ ပ္ဍဲကဵုကဏ္ဍပရေၚ်လိက်ပတ်မန်လေဝ် သွာၚ်ပရေၚ်ပညာကောန်ဂကူမန်ဂှ် ဟွံပါဟွံတုဲမွဲကဏ္ဍကီုရောၚ် စှေ်စို်တ်ရ။
ဂကောံရေၚ်တၠုၚ်ဗ္တောန်လိက်မန် ပ္ဍဲဘာတန် – အလဵုအသဳ အေန်အေဝ်ဒဳတုဲကၠုၚ်တေံမ္ဂး စပ်ကဵုပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ကမ္မတဳကေၚ်ကာကောန်ဍုၚ်အရၚ် အဆံၚ်ကၟိန်ဍုၚ်၊ အဆံၚ်တွဵုရး အလဵုအသဳတအ် ဒက်ပတန်လဝ်နွံတုဲ ပ္ဍဲကဵုတွဵုရးဍုၚ်မန်မ္ဂး ကမ္မတဳကေၚ်ကာကောန်ဍုၚ်အရၚ် ညးစၞးဂကူမန် ညးတအ်ခါန်ကၞက်ကဵုလဝ် (၃) တၠနွံရ။
ညးစၞးကမ္မတဳကေၚ်ကာကောန်ဍုၚ်အရၚ်တအ်ဂှ် ပံၚ်ဗစပ်ကဵု ဂကောံလိက်ပတ်ယေန်သၞာၚ်မန် ပွိုၚ်ဍုၚ်တအ်တုဲ ဖန်ဇန်ရေၚ်တၠုၚ်ဒၟံၚ် ပရေၚ်ဗ္တောန်လိက်မန် ပ္ဍဲဘာတန်အလဵုအသဳနွံရ။
လၟေၚ်ကမၠောန် ပရေၚ်ဗ္တောန်လိက်မန်ပ္ဍဲဘာတန်ဏံဂှ် မပတံကဵု ပရေၚ်ချူခၞံလိက်ဗ္တောန် (ဇုတ်ဓရံၚ်ဗ္တောန်)၊ ပရေၚ်ကောပ်ကာဲအ္စာဘာ၊ ဗီုပြၚ်ဖန်ဇန်ကောပ်ကာဲအုပ်ဓုပ် ပရေၚ်ဗ္တောန်လိက် စတံ ဒးဖန်ဇန်ရေၚ်တၠုၚ်နွံရ။
ဗီုပြၚ်တ္ၚဲဏံမ္ဂး တာလျိုၚ်ဖန်ဇန်ကောပ်ကာဲ ကိစ္စဗ္တောန်လိက်မန် ပ္ဍဲဘာတန်အလဵုအသဳဂှ် ဂကောံလဵု၊ ညးလဵု ဂွံဖန်ဇန်ကောပ်ကာဲဂှ် ဟွံဆဵုရ။
စပ်ကဵုပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ဗီုလဵုဌာနပရေၚ်ပညာ (အလဵုအသဳ) တအ် ဖန်ဇန်ရေၚ်တၠုၚ်ဂှ် ဟွံတီဏီရ။
ဂကောံအ္စာကၞေဟ်မန် – ဂကောံအ္စာကၞေဟ်မန်ဂှ် ရေၚ်တၠုၚ်ချဳဓရာၚ်ဒၟံၚ် စပ်ကဵုတ္ၚဲအ္စာကဝိမန်၊ ရေၚ်တၠုၚ်ဒၟံၚ် ပေဲါပြိုၚ်ချုဇန်လိက်၊ အ္စာကၞေဟ်ဂမၠိုၚ်တအ်ဂှ် ချူဇန်ဒၟံၚ် မပတံကဵု လိက်ပရေၚ်၊ လိက်ဝတ္ထု၊ လိက်ကဗျ၊ ရုပ်ဗျံက် စတံ ကဏ္ဍညးခံၚ်ဂှ် ချူဇန်တုဲ ပတိုန်ထ္ၜးဒၟံၚ် လတူလိက်ကၞပ်၊ လတူ Social media ကီုနွံရ။
ကမ္မတဳကၠောန်ဗဒှ်တ္ၚဲကောန်ဂကူမန် – ပ္ဍဲအရာပရေၚ်လိက်ပတ်မန်မ္ဂး ကမ္မတဳကၠောန်ဗဒှ်တ္ၚဲကောန်ဂကူမန် မပတံကဵု အဆံၚ်ဗဟဵု၊ အဆံၚ်ပွိုၚ်ဍုၚ်၊ အဆံၚ်ပွိုၚ်တိုက်၊ အဆံၚ်ကွာန်-အရာပ်တအ်လေဝ် ပ္ဍဲအခိၚ်ကာလ တ္ၚဲကောန်ဂကူမန်ဂှ် ကၠောန်ဗဒှ်ကၠုၚ် ပေဲါသၟာန်သွဟ်လိက် ချူဇန်ကဏ္ဍနာနာသာ်နွံရ။
တၟော်ကဵုအဆံၚ်ဗဟဵုမ္ဂး နူကၠာဟွံစိုပ်တ္ၚဲကောန်ဂကူမန်ဂှ် ကော်ဘိက်ပၟိၚ် ကွးဘာဒေသနာနာတအ်တုဲ ကၠောန်ဗဒှ်ကၠုၚ် ပေဲါပြိုၚ်ချူလိက်ဇၟန်၊ လိက်ပရေၚ်၊ လိက်ကဗျ မပတံသာ်ဏံ ကၠောန်ဗဒှ်ကၠုၚ်နွံရ။
လိက်ပတ်မန်ပ္ဍဲကွတ်စက် – ပ္ဍဲခေတ်ကာလတ္ၚဲဏံဂှ် ကွတ်စက်တောတက်ကၠုၚ်တုဲ လိက်ပတ်မန် သ္ဂောံချူ-ဗှ် အာ လတူကွတ်စက် (Online) ဂွံကလိတ်ကလောတ်မာန်ဂှ် တၠကွတ်စိုန်သကီုကဵု လိက်ပတ်မန် ခမဳသၚ်-ခရှ် လ္ၚဵု ရေၚ်တၠုၚ်လွဳပရာဒၟံၚ် ပရေၚ်လိက်ပတ်မန် ပ္ဍဲကွတ်စက်နွံရ။
အရာဝွံလေဝ် ပ္ဍဲခေတ်ကာလတ္ၚဲဏံ ပၟိက်ဇၞော်တဴကၠုၚ်ကီုရ။ ပရေၚ်လိက်ပတ်မန် ဟွံဗဂဵုလဟဵုပတိုန်မ္ဂး ဂကူမန်အလုံလိုက်မွဲ ညးရပ်စပ်ဒၟံၚ် ကွတ်စက်တအ် ဂွံစကာရပ်စပ်လိက်ပတ်မန် ဗွဲမကလိတ်ကလောတ်မာန်ဂှ် တၠကွတ်စိုန်သကီု လိက်ပတ်မန်ပ္ဍဲကွတ်စက်တအ် ရေၚ်တၠုၚ်ဒၟံၚ်ဂှ်တုဲ တ္ၚဲဏံ ဂကူမန် ဂွံရပ်စပ် ချူ-ဗှ် တိုန် လိက်ပတ်မန် ပ္ဍဲကွတ်စက် ပြေပြံၚ်ကၠုၚ် ဗၞတ်ထေက်ကြိုက် ဟီုမာန်ရ။
တုပ်သာ်ဂှ်ကီု လိက်ပတ်မန် နူကဵုတၞးလိက်စက္ခူ ဂွံဗှ်ကေတ် ပ္ဍဲမုက်လိက်ကွတ်စက် (ကမ်ပျူတာ၊ ဖုၚ်) တအ်ဂွံဂှ်လေဝ် တၠကွတ်လ္ၚဵု ဖန်ဗဒှ် (Scan) တုဲ ပတိုန်ကၠုၚ်လတူဝေပ်သာ် (website) လတူမုက်လိက် (face book Page) နာနာသာ်နွံရ။ ပ္ဍဲအရာရေၚ်တၠုၚ်ဒၟံၚ် လိက်ပတ်သွက်ဂွံပတိုန်လတူမုက်လိက် Social media ဏံဂှ် ပူဂဵုလ္ၚဵုလေဝ် ရေၚ်တၠုၚ်ဒၟံၚ်နွံရ။
ဂကောံတၞဟ်တၞဟ်လေဝ် နွံတဴမံၚ်ဏီရ ဗီုကဵုဂကောံရာမညနိကာယ (သွာၚ်ခမဳသၚ်) လေဝ် ချူတဴဒၟံၚ်လိက်ပတ်မန် ဆက်စပ်ကဵု ခမဳသၚ်နွံရ။ ဗီုဂှ်ကီု ဂကောံလိက်ပတ်ယေန်သၞာၚ်မန် ဂကောံခရေတ်ယှာန်မန်၊ ဂကောံလိက်ပတ်မန် ဍုၚ်သေံ၊ ဂကောံလိက်ပတ်မန် ဍုၚ်သၟာၚ်ဍုၚ်နာနာ ဗီုပြၚ်ညးကဵုညး အကာဲအရာညးကဵု ညးချဳဓရာၚ်ကၠောန်ၜိုတ်တဴဒၟံၚ် ပရေၚ်လိက်ပတ်မန် နွံကီုရ။
ယဝ်ဒးဟီုကဵု လိက်ပတ်ယေန်သၞာၚ်မ္ဂး ဂကောံဂဳတမန်၊ ဂကောံဇာတ်မန်လေဝ် တၞီလုပ်အာ သၟဝ်ဂကောံလိက်ပတ်ယေန်သၞာၚ်မန်ဂှ် သီုဖအိုတ်ရ။
ပရေၚ်ရေၚ်တၠုၚ်ဒၟံၚ် လိက်ပတ်မန်သွာၚ်အိုတ်သီုတအ်ဂှ် ဗီုပြၚ်ဂကောံညးကဵုညး၊ ပူဂဵုဗွိုၚ်ဆက်စပ်ညးကဵုညးရ ရေၚ်တၠုၚ်ချဳဓရာၚ်ဒၟံၚ်တုဲ ပရေၚ်အခက်အခုဲ ဆိုအ်ဗတအ်ဂှ် ဂကောံညးကဵုညးရ ဒးဒုၚ်သောၚ်ကလးဒၟံၚ် အကြာတၚ်ဝါတ်ဂါတ်ခက်ခုဲတအ်ဂှ်ရ။
ပရေၚ်ကမၠောန်လိက်ပတ်မန် ဓမံက်ဒၟံၚ်ရုပ်ရဴ တ္ၚဲဏံမ္ဂး –
- ပရေၚ်ဗ္တောန်လိက်ပတ်မန် (ဥတုကညၚ်၊ ဥတုကသီု)
- ပရေၚ်ချူခၞံလိက်ပတ်မန်၊ ချူခၞံဇုတ်ဓရံၚ်ဗ္တောန် (သွာၚ်ဗ္တောန်လိက်ဇဳ)
- ပရေၚ်တက်တြးပတိတ်လိက်ပတ်မန် (လိက်ကၞပ်၊ လိက်အဘိဓာန်၊ လိက်ဂျာနေဝ် မဂ္ဂဇြေန် လိက်ပရိုၚ်)
- လိက်ပတ်မန်ပ္ဍဲကွတ်စက် (ချူခၞံ၊ နူလိက်ကၞပ်ပြံၚ်ဗဒှ် လိက်ကွတ်စက်တုဲ တြးပတိုန် လတူမုက်လိက်ကွတ်စက်)
- ပရေၚ်ကၠာဲဘာသာ (နူဗမာ ဗဒှ်မန်၊ နူအေၚ်္ဂလိက် ဗဒှ်မန် စတံ)
- ပရေၚ်ချူခၞံဝေါဟာ (တၟိ-တြေံ)
- အာဲကၟာဲယေန်သၞာၚ်၊ ဂဳတ ကေုာံ ဇာတ် စတံ
လၟေၚ်ကမၠောန် ပရေၚ်လိက်ပတ်မန်အိုတ်သီုဂှ် ဟိုတ်နူအခေါၚ်အဝဵုဂကူမန် ဟွံမွဲတုဲ ဗီုပြၚ်အကာဲအရာညးကဵုညး ဒးဓမံက်ရုပ်ရဴ၊ ဒးရေၚ်တၠုၚ်ကၠောန်ၜိုတ်တဴဒၟံၚ် ဗွိုၚ်ညးကဵုညးအိုတ်ရ။ ဒးဆဵုဂဗ ပွမဒးသောၚ်ကလးပြသၞာ၊ ဒးဆဵုဂဗ တၚ်ဆိုအ်ဗ ခက်ခုဲနာနာသာ်တံဂှ် ဂကောံညးကဵုညး ဒးတတ်ထပိုက် ဒးသောၚ်ကလးအာဒၟံၚ်ရ။
ဆေၚ်စပ်ကဵုပရေၚ်လိက်ပတ်မန် ရေၚ်တၠုၚ်ကၠောန်ၜိုတ်တဴဒၟံၚ် အိုတ်သီုတအ်ဂှ် စန်ပကောံတုဲ ပရေၚ်ဆိုအ်ဗ တၚ်ခက်ခုဲနာနာအိုတ်သီုတအ်ဂှ် ဇြဟတ်ဇကုကဵုဇကု သာ်လဵုသ္ဂောံပံၚ်ဗစပ် ရေၚ်တၠုၚ်အာညးသ္ကံ နဒဒှ်ဗီုပြၚ်ချဳဓရာၚ် ပရေၚ်လိက်ပတ် သ္ပစၞးအလုံဂကူမန် သ္ဂောံဒှ်ကၠုၚ်မာန်ဂှ် ညးအာဒၟံၚ်က္ဍိုပ်သွာၚ်လိက်ပတ်မန်တအ် ထေက်ကဵုဒးချပ်ရ။
ရံၚ်ကေတ်ကဵုဖျုန်မတ် ပကတိရုပ်မ္ဂး ပရေၚ်ရပ်စပ်စကာလိက်မန်၊ ပရေၚ်ထိၚ်ဒဝ်လိက်ပတ်ယေန်သၞာၚ်မန်ဂှ် ပြသၞာဟွံမွဲ ၜိုန်ဟီုဂွံကၠာလေဝ် အရာသွာၚ်သီုဖအိုတ် ဓမံက်ထ္ၜးလဝ်လတူတေံဂှ် ဇၟာပ်သွာၚ် ပြသနာနွံဒၟံၚ်ဂှ် ဂွံဆဵုကေတ်ရ။ ပရေၚ်ဓမံက်ရုပ်ရဴ၊ ပရေၚ်ကေတ်ဆက်စၠောံ၊ ပရေၚ်ကဵုကေတ် ကိစ္စရီုဗၚ်ထံက်ပၚ် ဗီုပြၚ်ညးကဵုညး အကာဲအရာ ဂကောံညးကဵုညး မ္ဒးတတ်ထပိုက်ကၠုၚ် အကြာတၚ်ခက်ခုဲတအ်ဂှ် သီုဖအိုတ်ရ။
ဗီုကဵုဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်မ္ဂး ရံၚ်ကေတ်သာ်ဏံမ္ဂး ဒှ်ဂကောံဇၞော်အိုတ်မွဲ ဟီုမာန်ကၠာရလေဝ် စပ်ကဵုပရေၚ်လိက်ပတ်မန်မ္ဂး ၜိုတ်ဆပရေၚ်ဗ္တောန်လိက် ဥတုကညၚ်မွဲဓဝ်ရ။
သွာၚ်ကမၠောန်ဆေၚ်စပ်ကဵု လိက်ပတ်ယေန်သၞာၚ် အတိုၚ်ဟီုဓမံက်လဝ်ဗွဲလတူတေံဂှ် သီုဖအိုတ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ရေၚ်တၠုၚ်ဟွံမာန်ရ။
ဒှ်သာ်ဂှ်မ္ဂး ဂကောံဟီုလဝ်ဗွဲလတူတေံ စတံနူ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ကီု ဂကောံလိက်ပတ်မန် နွံဒၟံၚ်ဗွဲမတန်ကြန် ဗီုကဵုရးလ္ဂုၚ်ကီု၊ ပွိုၚ်ဍုၚ်လ္ၚဵုတအ်ကီု၊ ကမ္မတဳပရေၚ်ပညာ ကောန်ဂကူမန်ဂှ်ကီု၊ ဂကောံဖန်ဇန်ရေၚ်တၠုၚ် ပရေၚ်ဗ္တောန်လိက်မန်ပ္ဍဲဘာတန် (အလဵုအသဳ) ကီု၊ ဂကောံအ္စာကၞေဟ်မန်တအ်ကီု၊ ဂကောံဗွိုၚ်ဆက်စပ်လိက်ပတ်ပ္ဍဲကွတ်စက်တအ်ဂှ်ကီု၊ ဂကောံလိက်ပတ်ယေန်သၞာၚ်မန် ဂကောံခရေတ်ယှာန်မန်၊ ဂကောံလိက်ပတ်မန် ဍုၚ်သေံ၊ ဂကောံလိက်ပတ်မန် ဍုၚ်သၟာၚ် ဂကောံဆက်စပ်ပရေၚ်လိက်ပတ်မန်သီုဖအိုတ် ကော်ဘိက်တုဲ မ္ဒးကၠောန်ဗဒှ် သဘၚ်သဳကၠဳလိက်ပတ်မန်မွဲထေက်ရောၚ်။
စပ်ကဵုကဏ္ဍလိက်ပတ်မန် ချဳဓရာၚ်ရေၚ်တၠုၚ်တဴဒၟံၚ် သွာၚ်အိုတ်သီုတအ်ဂှ် ယဝ်ဂပ်ဂဝ်ဒးရးမ္ဂး မ္ဒးပံက်ပတိုန် ဗီုပြၚ် “ဂကောံဗဂဵုလဟဵုလိက်ပတ်မန်” မသ္ပဒုၚ်သ္ဇိုၚ်ကဵု သ္ပစၞးသွာၚ်လိက်ပတ်မန်နာနာအိုတ်သီုတုဲ မ္ဒးပံက်ပတိုန် “ဌာနလိက်ပတ်မန်” (ယၟုဗီုလဵုဒှ်ဒှ်) ထေက်ဟာဂှ် တၚ်ပုစ္ဆာ မံက်တိုန်ကၠုၚ်ရ။
ပရေၚ်ကမၠောန်ဆေၚ်စပ်ကဵု လိက်ပတ်ယေန်သၞာၚ်မန်ဂှ် ဂကူကောန်ဍုၚ်အရၚ်ဗွဲမဂၠိုၚ် ဂကူညးဂကူညး ပ္ဍဲကၟိန်ဍုၚ်ဗၟာဏံ နွံဒၟံၚ်ဖအိုတ်ရ။ မန်တအ်လေဝ် ဂစာန်ဒၟံၚ် လအ်လအခိၚ်ကွေံရ။
ဗီုကဵုဂကောံပံၚ်ကောံလိက်ပတ်ယေန်သၞာၚ်မန် (ဗဟဵု) ဒက်ပတန်ကၠုၚ်နွံ၊ ဂကောံဗ္တောန်လိက်ပတ်မန် ကေုာံ သၞာၚ်ဗုဒ္ဓဘာသာ အလုံဒေသရးမန် ဒက်ပတန်ချဳဓရာၚ်ဒၟံၚ် နွံကီုရ။ ဆဂး ဆေၚ်စပ်ကဵု ပရေၚ်လိက်ပတ်ယေန်သၞာၚ်သီုဖအိုတ်ဂှ် ရေၚ်တၠုၚ်ဟွံမာန်ရ။
မ္ဒးဟီုဗွဲသရောပ်မ္ဂး ပရေၚ်ဗ္တောန်လိက်ပတ်မန် (၃) သွာၚ် (ပရေၚ်ပညာကောန်ဂကူ၊ ပရေၚ်ဗ္တောန်လိက်မန်ပ္ဍဲဘာတန်၊ ဘာဥတုကညၚ်)၊ ပရေၚ်ချူခၞံဇုတ်ဓရံၚ်ဗ္တောန် သွာၚ်ဗ္တောန်လိက်မန်ကဏ္ဍနာနာ၊ ပရေၚ်တက်တြးပ္တိတ်လိက်ပတ်မန် မပ္တံကဵု လိက်ကၞပ်-လိက်အုပ် မပတံကဵု ဂျာနေဝ်၊ မဂ္ဂဇြေန်၊ လိက်ပရိုၚ်၊ ပရေၚ်လိက်ပတ်မန် ပ္ဍဲကွတ်စက် (သွက်ဂွံစကာပ္ဍဲကွက်စက်) သွာၚ်ချူခၞံကီု သွာၚ်ပြံၚ်သၠာဲနူလိက်ကၞပ် ဖန်ဗဒှ်ပတိုန် (Scan) ပ္ဍဲကွတ်စက်၊ ပရေၚ်ကၠာဲဘာသာ၊ ပရေၚ်ချူခၞံဝေါဟာ (တၟိ-တြေံ)၊ ပရေၚ်အာဲကၟာဲယေန်သၞာၚ်၊ ပရေၚ်ဂဳတ ကေုာံ ဇာတ် စတံ ကဏ္ဍညး ကဏ္ဍညး ရေၚ်တၠုၚ်တဴဒၟံၚ် ပ္ဍဲပစ္စုပ္ပန်ရ။
ပ္ဍဲဂကူမန်တ္ၚဲဏံဂှ် ဟိုတ်နူအခေါၚ်အဝဵုဟွံမွဲတုဲ ဂကောံညးဂကောံညး ဍောတ်ဍောတ်သောဲသောဲတအ်ဂှ် ဂွံရေၚ်တၠုၚ် အာဍာ်ဇမၠိၚ် ဂွံတန်တဴမာန် ဟွံလောဲသွာရ။ သွာၚ်လၟေၚ်ကမၠောန်သီုဖအိုတ်တအ်ဂှ် ပ္ဍဲဍုၚ်၊ မ္ၚးဍုၚ် ဗွိုၚ်မန်သီုဖအိုတ် ပံၚ်ပကောံတုဲ သွာၚ်ကဏ္ဍလဵုဒှ်ဒှ် ဆေၚ်ဆက်ကဵု အလုံသီုဖအိုတ် ဒးဘိုၚ်ဖန်ရေၚ်တၠုၚ်၊ ဒးဘိုၚ်ဖန်ရီုဗၚ်ထံက်ပၚ် မပတံသာ်ဏံမှ ပရေၚ်ထိၚ်ဒဝ်လိက်ပတ်ယေန်သၞာၚ်မန် အရေဝ်အခြာအိုတ်သီု ဂွံတန်တဴအာမာန်ရောၚ်။
