ဌာန်ပရိုၚ်မန်၊ ဂိတုအံက်တဝ်ဗာ ၂၆၊ ၂၀၂၁

အဝဵုပရေၚ်ဍုၚ်ကွာန်ဂှ် ဆက်နွံဒၟံၚ် ပ္ဍဲပါၚ်ပၠံၚ်လွဟ်ဖိုဟ်တုဲ ဂကူပိုဲ ညံၚ်ဟွံဂွံကၠေံကၠက်ဂှ် ဒပ်ပၞာန်စဵုဒၞါ ကောန်ဂကူပိုဲ ဇြဟတ်ဒးနွံဏောၚ် သာ်ဝွံ နာဲဟံသာ ဥက္ကဌဗော်ဍုၚ်မန်တၟိ ဟီုမြော်လဝ်ဂလာန် နကဵုဘာသာမန်ရ။
နူကဏေံတေံ ကၠောန်သ္ပအသေအဟာန် ဇိုန်ဏှၚ်တဆိပ်ကြာ “ဝဳရဟံသာ” ကုနာဲထဝ်မန် ဥက္ကဌဇၞော်ဂုဏ်တၟေၚ် ဗော်ဍုၚ်မန်တၟိတုဲ နာဲဟံသာ ဥက္ကဌဗော်ဍုၚ်မန်တၟိ ဟီုမြော်ဏာ ဂလာန်သာ်ဂှ်ရ။
“အဝဵုပရေၚ်ဍုၚ်ကွာန်လၟုဟ်ဏံ နွံဒၟံၚ်ပ္ဍဲပါၚ်ပၠံၚ်လွဟ်ဖိုဟ်ဏောၚ်၊ ပ္ဍဲဂကူမွဲမွဲ ဇြဟတ်ဒပ် ဟွံမွဲမ္ဂး မုအဝဵုလေဝ် ဟွံမွဲတုဲ ညးလဵုလေဝ် ဟွံသ္ပဂရု၊ ညးတၞဟ် ကၠုၚ်ဍဵုဍိုက်တှေ် ဒးဒုၚ်ရ၊ ဣဂှ်ရ ဒပ်ပၞာန် ကောန်ဂကူမန်ပိုဲ ဒးနွံကဵုဇြဟတ်ရောၚ်၊ အလဵုလဵုဇကု လုပ်ယိုက်ဂၠေၚ်တာလျိုၚ် ဟွံမာန်တှေ်လေဝ် မွဲနဲမွဲဗီု ရီုဗၚ်ကဵုဇြဟတ်အိုတ်ညိ မိက်ဂွံဖတိုက်ဖအောဝ်ဏာ” သာ်ဝွံ နာဲဟံသာ ဥက္ကဌ ဗော်ဍုၚ်မန်တၟိ ဂးရ။
သၟာၚ်နူဂှ် ကောန်ဍုၚ်အရၚ်တံ ညံၚ်ဟွံဂွံပါ်တိတ် နူကၟိန်ဍုၚ်ပံၚ်ကောံဂှ် ကမၠောန်ဒက်ပ္တန် သၞောတ်ဖေဝ်ဒရေဝ် ဇေတ်တ်ဂှ်လေဝ် ပၟိက်ဇၞော်ကွေံကွေံဏောၚ် ညးဆက်ဟီုရ။
“ကၟိန်ဍုၚ်ဖေဝ်ဒရေဝ် ဇေတ်တ်မ္ဂးဂှ် ပ္ဍဲဒေသဇကုတှေ် ဇကုအုပ်ဓုပ်ကေတ်တ်ဂွံဏောၚ်၊ အရေဝ် လိက်ပတ် ဘာသာ ဂကူဇကုလေဝ် ဇကုရပ်စပ်စကာ ပ္ဍဲဒေသဇကုဂွံဏောၚ်၊ ယေန်သၞာၚ် ဂကူဇကုလေဝ် ဇကုမၚ်မွဲ ထိၚ်ဒဝ်ကေတ်တ် ဂွံဏောၚ်၊ အခေါၚ်မပ္တံသာ်ဏံ ကောန်ဍုၚ်အရၚ်နာနာတံ ညံၚ်သ္ဂောံက္လိဂွံမာန်ဂှ် ကောန်ဍုၚ်အရၚ်တံ ပါလုပ်ဒက်ပ္တန်ဒၟံၚ် ကၟိန်ဍုၚ်ပံၚ်ကောံဖေဝ်ဒရေဝ် ဇေတ်တ်ဖိုဟ်တုဲ ညးညးအဲအဲ ဘိုၚ်ကဵုဇြဟတ်အိုတ်ညိ၊ ဂကူဗၟာတံလေဝ် ထံက်ဂလာန် ကဵုဇြဟတ်အိုတ်ညိ” သာ်ဝွံ နာဲဟံသာ ဆဝ်မ္ၚုဟ်ဏာရ။
တုဲပၠန် ပြသၞာပရေၚ်ဍုၚ်ကွာန် ကေုာံ အကြေပ်ဂြတ်ပရေၚ်ဍုၚ်ကွာန် က္တဵုဒှ်ဒၟံၚ်လၟုဟ်ဂှ် သွက်အေန်အေဝ်ဒဳ သ္ဂောံဂွံအဝဵု၊ သွက်ဂွံကလေၚ်ဂၠုက်လုပ် သၟဝ်သၞောဝ် (၂၀၀၈) ဂှ် ဒှ်အဓိကဟွံသေၚ်၊ မဟာဝါဒဳ ကေုာံ တၠအဝဵုတံ ညံၚ်ဂွံဗြံဗတက်စှေ်ဂှ်ရ ဒှ်အဓိကတုဲ ပြသၞာဏံ သ္ဂောံလလမ်မာန်ဂှ် ဒက်ပ္တန်ကၟိန်ဍုၚ် ဖေဝ်ဒရေဝ်မာန်မှ သွဟ်ပၞော်တိတ် ပရေၚ်ဍုၚ်ကွာန်ဂှ် ဂၠာဲဆဵုမာန်ဏောၚ်ဂှ်လေဝ် ဂးလဝ် ပ္ဍဲလိက်လလောၚ်တြး တ္ၚဲကောန်ဂကူမန် မရနုက်ကဵု (၇၄) ဝါ ဗော်ဍုၚ်မန်တၟိရ။