ပ္ဍဲအခိၚ်ခေတ်ကာလလၟုဟ်ဝွံ ပရေၚ်ဍုၚ်ကွာန် ပ္ဍဲကၟိန်ဍုၚ်ပိုဲ တအ်လေဝ် ဟွံညိၚ်ဝတ်ဏီတုဲ ကိစ္စပရေၚ်ဂီုကၠီုပိုဲတအ်ကီု၊ ပရေၚ်အာကၠုၚ်မံၚ်စံၚ်တအ်လေဝ် အဃောဒှ်မံၚ် တၚ်အခက်ခုဲနာနာသာ်ဏံဂှ်ရ ရဲ မၚ်လီကၠောန်စဒၟံၚ် social media တအ်လေဝ် မံက်တိတ်ကၠုၚ်မံၚ် ဗွဲမဂၠိုၚ်နွံရ။

အကြာဂိတုနဝ်ဝေမ်ဗာ ကဵု ဒဳဇြေမ်ဗာ အကြာပွိုၚ်မွဲဂိတုပြၚ်ၚ်ဏံဂှ် သၟတ်ဝုတ်မန် သၟတ်ဗၠာဲမန် ဗၞတ် (၄) တၠ ကၠေံ ဒၟံၚ်နွံရ။ ပ္ဍဲကဵု သၟတ်ကၠေံအာ လ္ၚဵုဂှ် ပပၞကၠုၚ် ညံၚ်ရဴ တံၚ်ဂြဲလဝ် (ပြန်ပေ) သၟတ်ကၠေံဂှ်တုဲ အာတ်မိက်ကၠုၚ်သြန် နကဵုဖုၚ် ဇရေၚ်ညးတၠခန္ဓ ဗီုဏံ ကတဵုဒှ်ကၠုၚ်ဒၟံၚ်ရ။

ဒဒှ်ပပၞ ညံၚ်ရဴဂွံလဝ် သၟတ်ဂှ်တုဲ အာတ်မိက်သြန်ဂှ် တၠဂုဏ်အဇ္ဇ (တရဴအအာ) ဟီုထ္ၜး လဝ် ပ္ဍဲကဵု ဝိုၚ်သဳကၠဳ ဗလး Live မုက်လိက် တရဴအအာ စၟတ်တ္ၚဲ ဒဳဇြေမ်ဗာ ၂၁ ဇိုၚ်သဝ်တ္ၚဲဂှ်ရ။

“ဍေံပပၞညံၚ်ရဴဂွံလဝ်သၟတ်တြုံဂှ်တုဲတှေ် ဍေံဆက်နၚ်ဖုၚ် ဍေံအာတ်သြန် ၂၀ ကိုဋ်၊ မိမယာဲတ သၟတ်ဂှ် ကလေၚ်ဟီုကဵု ဍေံ ကဵုကောန်ညး ဟီုနၚ်ကဵုဖုၚ်မွဲတဲ ကဵုဂွံမိၚ်ရမျာၚ်ကောန်ညးမွဲတဲ သြန် ၂၀ ကိုဋ်ဂှ် ညးပလံၚ်ကဵု ဏောၚ် ဂးဂှ် ဍေံဖျေံထောံဖုၚ်၊ တုဲဇှ်ဂှ် ညးဆက်အာ ကဵု ခရိုၚ်သဓီု ဗော်ဍုၚ်မန်တၟိပၠန် ကလေၚ်ဆက်ဏာပၠန်ဂှ် ဍေံ ကၟာတ်ထောံဖုၚ် ကာဒ်ဖုၚ်ဂှ်လေဝ်ဍေံကၠဟ်ထောံ ကေတ်အဆက်ဟွံဂွံဟဂှ်” တၠဂုဏ် အဇ္ဇ ဟီုသဳကၠဳထ္ၜးရ။

တုပ်သာ်ဂှ်ကီု လတူပဋိပက္ခမွဲမွဲကတဵုဒှ်ဂှ် ရဲမၚ်လီအာတ်စသြန် လတူဖုၚ် နကဵု သဵုယှေဝ် မဳဒဳယာ messenger တံ နွံဂၠိုၚ်ကွေံကွေံရ။

အဃောတၠဂုဏ်အဇ္ဇ ဒုၚ်မံၚ်ဒါန် သွက်သိုၚ်ရုၚ် အံက်သဳဂျေန် အလုံဒေသရးမန်ဂှ် နူတၠဒါန်တေံ ပြၚ်နၚ်ကဵု Wave money ဂှ် နူကဵုမၞိဟ်မၚ်လီမံၚ်တေံဂှ် ဍေံဂွံလဝ်ဂၞန်ဖုၚ် တၠဂုဏ်တုဲ ဍေံဆက်ကၠုၚ်ကဵု တၠဂုဏ် အဇ္ဇ တုဲလီဏာ သြန် ညးတၠဒါန် နွံဂှ်လေဝ် တၠဂုဏ် အဇ္ဇ ဟီုလဴထ္ၜးဏာကီုရ။

အခိၚ်အခါတ္ၚဲဏံဂှ် ဇၟာပ်မၞိဟ်ရပ်စကာဒၟံၚ် ဖုၚ် Social တံဏံဂှ် ရဲကၠောန်ပရေၚ်ပိုန်ဒြပ်တံလေဝ် ဂွံအခေါၚ်ခိုဟ်တုဲ စကာရပ်စပ်ကၠုၚ်၊ ရဲမၚ်လီဠာန်စတံလေဝ် ကေတ်အခေါၚ်ခိုဟ်တုဲ နဲကဲနာနာသာ် ဘပဠ လီဠာန်စသြန် နကဵု ဖုၚ် Social တံနွံကၠုၚ်ရ။

 ဟိုတ်ဒှ်သာ်ဂှ်ရ ရဲသုၚ်စောဲမံၚ်social mediaတအ်လေဝ် စပ်ကဵုကိစ္စဏံတုဲ ထေက်ကဵုဒးစွံသတိကဵု လ္တူမၞိဟ်ကေတ်မံၚ်ပရဲတအ်ရောၚ်။ အခိၚ်ကာလဇကုသုၚ်စောဲsocial mediaတှေ် မၞိဟ်ဇကုဟွံတီလဝ်ကီု ဟွံကေၚ်ဆဵုလဝ်တအ်ဂှ် ယဝ်ခါရဍေံတအ် အပ်မိက်ကၠုၚ်သြန်ပ္ဍဲဇကုကဵုဒှ်၊ ဘပလေကၠာန်ကဵုဇကုကဵုဒှ် ဇကုဒးလဴထ္ၜးကဵုမၞိဟ်တာလျိုၚ်တအ်ဟေၚ်ရ။ တုဲပၠန်ကေတ်လညာတ် ပ္ဍဲမၞိဟ်စိစောန်ကဵုသၞောဝ်တအ်ကၠာညိဂှ် မိက်ဂွံဖတိုက်ဖ္ဍောဝ်ဏာကီုရ။