သၟဟ်သၟန်၊ ဂိတုဖေဖဝ်ဝါရဳ ရ၊ သၞာံ ၂၀၂၂
စၟတ်သမ္တီ တ္ၚဲဨကရာဇ်မန် တၠညးရာဇာဓိရာဇ် သၠးဂဝ်ဂၞဴဂှ် ထ္ၜုတ်ပ္တိုန်လဝ် တ္ၚဲကောန်ၚာ်မည်တုဲ ဂိတုမာ် (၆) မံက်ဂှ် ကၠောန်ဗဒှ်လဝ် အသေအဟာန် ပ္ဍဲကဵုဍုၚ်ကၟာဝက်ရးဇြာဂှ်ကီု ဂွံတီကေတ်ရ။
ဖါနူဂယးဂှ် ကောန်ၚာ်၊ မိမကောန်ၚာ်တံကီု သၟတ်ဖံခရာ ဒပ်ရပ်အလာံတံကီု သီုဖအိုတ်ဇြဟတ်ၜိုတ် (၁၀၀၀) တၠ ဇက်ဂၠောဲကၠုၚ် ဒၞာဲရုပ်ရာဇာဓိရာဇ် ဂတမုက်ကျာ်ဇြာဂှ်တုဲ ရှေ်သှေ် သ္ပအဲပရဲကီုရ။
“ပ္ဍဲကဵုကောန်ၚာ်ပိုဲလၟုဟ်ဂှ် ဆီမန်နွံမံၚ်ရ။ စိုတ်ဓာတ်ဍေံတံရ ဒးပၠောပ်ပၠန်၊ စိုတ်ဓာတ်ဍေံ ဂွံလုပ်ကၠုၚ် ပ္ဍဲကဵုအရေဝ်ခြာ၊ လိက်ပတ်တံဂှ် ဆက်လွဳပရာအာညိ” သာ်ဝွံ ကျာ်ဇၞော်အ္စာတိဿ ဟီုမြော်ကဵုလဝ်သြဝါဒရ။
ဇက်ဂၠောဲရှေ်သှေ်တုဲဂှ် ဆက်ကၠောန်လဝ် အသေအဟာန် ပ္ဍဲကဵုဇြပ်သဘၚ်ဓဝ် ကျာ်ဇြာဂှ်တုဲ သွက်ကောန်ၚာ်တံဂှ် ပါ်ပရအ်ကဵုလဝ် ကွာၚ်နာနာတံလေဝ် ဂွံဆဵုကေတ်ကီုရ။
မိမကောန်ၚာ်မွဲတၠဂှ် “အစံၚ်အ္စာကောန်ၚာ်တံ ကၠာအိုတ်ဟီုဂှ် မိမတံရဏောၚ်။ မိမတံဂှ် နူကဵုတမ်ဟေၚ် ဒးခုတ်ကဵုယၟုကောန်ဇကု ဗီုမန်လေပ်ဏောၚ်။ စိုတ်ဓာတ်ဆာန်ဂကူဂှ် ဒးပၠောပ်လဝ် နူကဵုဍောတ်တ်ဏေါၚ်။ စိုတ်ဓာတ်ဆာန်ဂကူနွံမှ ဇၞော်တိုန်တှေ် ဍေံတံ ဂွံဒှ်က္ဍိုပ်သ္ကိုပ်မန်လေဝ်” သာ်ဏံ ညးဟီုရ။
ရန်တၟံကဵု ကောန်ၚာ်သၟတ်တံ စိုတ်ဓာတ်ဆာန်ဂကူ ဂွံလုပ်ကၠုၚ် နူကဵုဍောတ်တ်တုဲ စၟတ်သမ္တီ ထ္ၜုတ်ကၠုၚ်လဝ် တ္ၚဲကောန်ၚာ်မည်ရောၚ်။
တၠညးရာဇာဓိရာဇ် ကောန်သၟိၚ်ဗညာနဲဂှ်ဝွံ ပ္ဍဲသက္ကရာဇ်ဍုၚ် (၇၁၁) သၞာံ၊ ဂိတုမာ် (၆) မံက် တ္ၚဲသိုက်ဂှ် ကတဵုဒှ်လဝ်မၞိဟ်ရောၚ် ဂွံတီကေတ်ရ။
