အံက်သာ၊ ဂိတုဖေဖဝ်ဝါရဳ ၁၁၊ ၂၀၂၂

နူစပၞာန်ထိၚ်အဝဵုတုဲ စပ်ကဵုပရိုၚ်အေန်တာနိတ် ဒးဒုၚ်ကၟာတ်လဒဵုကၠုၚ်ဆက်က် ပံက်ကဵုမွဲအံၚ်၊ ကၟာတ်ကၠေံမွဲအံၚ် ဒၞါဲဒေသရုသံၚ်ဂၠိုၚ်တံဂှ် ကၟာတ်လဝ်မွဲဒမြိပ် စဵုကဵုလၟုဟ်လေဝ်နွံရ၊ အကာဲအရာလက္ကရဴအိုတ်ဂှ် အလဵုအသဳပၞာန်တံ သၠုၚ်ပတိုန်ၚုဟ်မး သုၚ်စောဲအေန်တာနိတ် နူကဵု 1MB ၀.၉၉၉ ဒ္ကေဝ်ဂှ် ဒှ်အာ 1MB 2.15 ဒ္ကေဝ်တုဲ မၞိဟ်သုၚ်စောဲအေန်တာနိတ်တံ အောန်စှေ်ကၠုၚ်ရ၊ သ်အာၚ်အာနူဂှ် ပါဲနူသေမ်ကာဒ် Mytel တုဲ ပံက်ဗဵုဝေၚ် Facebook Messenger တံ ဟွံဂွံရ၊ ဂွံဗဵုဂွံဂှ် ဒးတတ်ကၠောံ VPN မွဲက္ဆံၚ်တုဲမှ လုပ်ဗဵုဂွံရ၊ အေပ် VPN ဂှ်လေဝ် စုတ်လဝ်ပ္ဍဲဖုၚ် ဗၠာဲမှိၚ်တံ စၟဳစၟတ်ဆဵုစုတ်မ္ဂး ဒဏ်ထံၚ်ပိသၞာံ ဒဏ်သြန်ပိကိုဋ် ဒးဒုၚ်ဒုဟ်ရောၚ်ဂှ် ပတိတ်လဝ် ဥပဒေတၟိပၠန်ရ။
ပ္ဍဲဒေသမန် ပွိုၚ်ဍုၚ်ရေဝ် ကွာန်တံၚ်ပရၚ်၊ ကွာန်တံၚ်မောံတံဂှ် ကမ္ပဏဳ Royal Star Net ကေုာံ Myanmar Network ပံၚ်ကောံတုဲ ထပ်ဗလးပရး အေန်တာနိတ် နကဵုစက် WiFi နကဵုယၟု Royal Star Net နကဵုဇုက်ပၠောပ်ပ္ဍဲသ္ၚိကီု သီုကဵုဗလးနကဵု ဇွိုန်လပှ်ကျာရ၊ နူကဵုသ္ကိုပ်တာလျိုၚ်ကမ္ပဏဳ နာဲဇြိုယ်ဂှ် “ကမၠောန်ပိုဲဏံ ဂွံဒှ်ကၠုၚ်ဂှေ်တှ် ဂွံအဆက်နူကဵု Myanmar Network တုဲ ဒှ်ကၠောန်ကၠုၚ်ရ၊ ကမ္ပဏဳ Royal Star Net ပိုဲကဵု ကမ္ပဏဳ Myanmar Network ပံၚ်ကၠောန်ညးသ္ကံ ၜါသၞာံတုဲမ္ဂး ကမ္ပဏဳ Royal Star Net ပိုဲတံပါ်တိတ်တုဲ ဆက်ကၠောန်အာကေတ်တ်ဏောၚ် တုပ်လဝ်စိုတ်ညးသ္ကံရ၊ အဓိက ပ္ဍဲဂကူမန်ပိုဲ ညံၚ်ဂွံဓမံက်က မၠောန်ဂတာပ်ခေတ်ဏံမာန်ကီု အကြာကွာန်မန်ပိုဲ ညံၚ်ဂွံဂတာပ်ခေတ် စပ်ကဵုအေန်တာနိတ်ကီု ရန်တၟံတုဲ ဂစာန်ကၠောန်မံၚ်ရ” သာ်ဝွံ နာဲဇြိုယ် ဟီုရ။
ၚုဟ်မးသုၚ်စောဲအေန်တာနိတ်ဂှ် စၠောံပၠောပ်ဇုက်wifi ပ္ဍဲသ္ၚိ စုတ်ကဵုသီုစက်ဍေံမွဲမ ဟွံကေတ်ၚုဟ်မး စုတ်ကဵုမးမးတုဲ မွဲဂိတုမ္ဂး (၂၉၀၀၀) ဒ္ကေဝ် ကံက်အာလၟေၚ်ဂိတုရ၊ ကေတ်အလန်ကၠာအိုတ်ဂှ် ၚုဟ်သွက်ပိဂိတု ကေတ်အာကၠာတုဲ ဂတတေံမ္ဂး ကံက်အာလၟေၚ်ၚ်မွဲမွဲဂိတုရ၊ wifi ဗလးနကဵုဇွိုန်လပှ်ကျာဂှ်မ္ဂး ရာန်ကေတ်နကဵုအခိၚ်တုဲ ဝေၚ်ဂွံရ၊ ၚုဟ်မးဂှ် ပါ်လဝ်ၜါဗီုရ၊ မွဲဂှ် ဗၞတ်ဗ္ၜတ် MB ဟၟဲ ပွိုၚ်(၅)နာဍဳ အာယုက်ပွိုၚ် (၅) တ္ၚဲမ္ဂး ဒးကဵုသြန် (၅၀၀) ဒ္ကေဝ်ရ၊ ၜါဂှ် ဗၞတ်ဗ္ၜတ် MB ဟၟဲ ပွိုၚ် (၁၀) နာဍဳ အာယုက် ပွိုၚ် (၇) တ္ၚဲ (၁၀၀၀) ဒ္ကေဝ် ဒးကဵုသြန်ရ၊ စပ်ကဵုၚုဟ်မး ဝေၚ်နကဵုဇွိုန်လပှ်ကျာဂှ် အခိၚ်လၟုဟ် ဒှ်အခိၚ်စၟဳစၟတ်တုဲ ပရေၚ်ပြံၚ်လှာဲ ၚုဟ်မးနွံမာန်ရောၚ် ဂွံတီကေတ် နူကဵုသ္ကိုပ်တာလျိုၚ်ကမ္ပဏဳ နာဲဇြိုယ်ရ။
ကမၠောန်ပရးအေန်တာနိတ် နကဵု WiFi Royal Star Net ဂှ် အခိၚ်လၟုဟ် ပ္ဍဲပွိုၚ်ဍုၚ်ရေဝ် ကွာန်တံၚ်မောံ၊ ကွာန်တံၚ်ပရၚ်တံ ဓမံက်ဒၟံၚ်ရုပ်ရဴကမၠောန်တုဲ ဂတနူဏံ သွက်ဂွံဆက်တြးအာကမၠောန် ကွာန်တၞဟ်သအာၚ် ပ္ဍဲဒေသပွိုၚ်ဍုၚ်ရေဝ်တံ နွံပၠန်ရောၚ်၊ ကွာန်ဇၞော်ဇၞော်မွဲမွဲကွာန် ဗီုကွာန်တံၚ်ပရၚ်ဂှ် ဒးဖျေံတမ်ရိုဟ် အကြာၜိုတ် ကိုဋ်မွဲလ္ၚီပြၚ်ၚ်နွံရောၚ် နာဲဇြိုယ် ဟီုထ္ၜးရ။