ဌာန်ပရိုၚ်မန် ဂိတုအေဗရဴ ၂၉၊ ၂၀၂၂
ကွဳစက်ဂြိပ်တရဴဇမ္ၚောဲ (အဝေးပြေးယာဉ်) အပ္ဍဲတွဵုရးဍုၚ်မန်ဏံ မၞိဟ်အာတရဴမွဲ ယဝ်ထ္ၜး တၞးသမ္တီကောန်ဍုၚ် (မှတ်ပုံတၚ်) ဟွံမာန်မ္ဂး လ္ပကဵုအခေါၚ်ဍိုက်ညိ သာ်ဝွံ ကံၚ်ဇြဳပၞာန်(နစက) ထပ်စၞောန်လဝ် အလန်ဒုတိယပၠန် ဂွံတီကေတ်ရ။
မၞိဟ်အာတရဴ တိုန်နူဘာ်တရဴ (ကဝက်တရဴ) တံဂှ်လေဝ် တၞးသမ္တီကောန်ဍုၚ် ဟွံပါမ္ဂး လ္ပကဵုအခေါၚ်ဍိုက်ညိ ထပ်စၞောန်လဝ်နွံ သာ်ဝွံ ညးတာလျိုၚ်မွဲတၠ နူဌာန်ကွဳစက်ဂြိပ်တရဴဇမ္ၚောဲ ဂးရ။
“ပ္ဍဲပိုဲဏံ မၞိဟ် ထပိုတ်လဝ်စၟတ်တဲတုဲ၊ စၟဳစၟတ်လဝ် တၞးသမ္တီကောန်ဍုၚ်တုဲတံဂှ်ဟေၚ်ရ ပ္ဍိုက်ဏာ ဒဵုကဵုစိုပ် ဒၞါဲမအာတေံဏောၚ် ဟီုလဝ်ဗီုဂှ်၊ ပ္တိုန်မၞိဟ် ပ္ဍဲဘာ်တရဴတှေ်လေဝ် မၞိဟ်နွံကဵုတၞးသမ္တီကောန်ဍုၚ်ဂှ်ဟေၚ်ရ ပ္တိုန်ညိ ပ္ဍိုက်ညိ ထပ်ဟီုကၠုၚ်ဗီုဏံ” ညးတာလျိုၚ်ဂှ် ဂးရ။
ရဲအာတရဴ ဟွံမွဲကဵုတၞးသမ္တီကောန်ဍုၚ်ဂှ် လ္ပကဵုအခေါၚ်ဍိုက်ညိ ဂလာန်စၞောန်ဏံဂှ် ကံၚ်ဇြဳပၞာန်(နစက) ကဵုလဝ်စၞောန် နူကဵုဂိတုမာတ်သတ္တဟလက္ကရဴအိုတ်တေံရ။
ပ္ဍဲဂၠံၚ်တံဂှ် စၟဳစၟတ်ဂၠိုၚ်ဒၟံၚ်တုဲ ကုမၞိဟ်အာတရဴ ထ္ၜးတၞးသမ္တီကောန်ဍုၚ် မာန်ဂှ်ဟေၚ်ရ သွံကဵုဒၟံၚ်စၟတ်တဲ သာ်ဝွံ ညးတာလျိုၚ်မွဲတၠ နူဌာန်ကွဳစက်ဂြိပ်တရဴဇမ္ၚောဲ မဂြိပ်ဒၟံၚ် လ္ဂုၚ် – မတ်မလီု ဂးရ။
“လၟုဟ် တၟံဍုၚ်၊ တၟံသၞေဟ်ကၚ်ရ စၟဳစၟတ်မံၚ်ကွေံကွေံ၊ စရၚ်ရဲအာတရဴကီု တၞးသမ္တီကောန်ဍုၚ်ကီု ဍေံတံ ရံၚ်စၟဳစၟတ်ကွေံကွေံ၊ လၟုဟ်ဏံ မၞိဟ်ထ္ၜးတၞးသမ္တီကောန်ဍုၚ်မာန်ဂှ်ရ ပိုဲသွံကဵုစၟတ်တဲ” ညးတာလျိုၚ်ဂှ် ဂးရ။
ရဲကၠုၚ်နကဵုလိက်ထံက်ဂလာန်သၟးဂှ်လေဝ် အခေါၚ်သွံဟွံမွဲတုဲ မၞိဟ်နွံကဵုတၞးသမ္တီကောန်ဍုၚ်ဂှ်ဟေၚ် သွံကဵုဂွံဏောၚ် ဆက်ဟီုထ္ၜးရ။
ဟိုတ်နူစၞောန်ပၟိၚ်တိတ်ကၠုၚ်သာ်ဏံဂှ်ရ ရဲတၞးသမ္တီကောန်ဍုၚ်လီုဒၟံၚ်တံ၊ တၞးသမ္တီကောန်ဍုၚ် ကၠေံအာတံဂှ် အာတရဴဟွံလောဲ ဒှ်အခက်ခုဲကွေံကွေံ ဂွံတီကေတ်ရ။
သ္ပပ္တံနူဂိတုအေဗရဴ (၁) တုဲ စၞးတၞးသမ္တီကောန်ဍုၚ်ဂှ် ယဝ်အာတရဴ နကဵုလိက်ထံက်ဂလာန်သၟးမ္ဂး ဟွံကဵုအခေါၚ်လးလး သာ်ဝွံ နူဌာနဝန်ဇၞော်သ္ကိုပ်သ္ကမၞိဟ်လုပ်တိတ် ကေုာံ စရၚ်ဇြဟတ်ကောန်ဍုၚ်တေံ လလောၚ်ပ္တိတ်လဝ်တုဲရ။
