မိလတိုပ်၊ ဂိတုဂျောန် ၂၉၊ ၂၀၂၂
ဂကောံလိက်ပတ်ယေန်သၞာၚ်မန် အဆံၚ်ကၟိန်ဍုၚ် ညံၚ်ဂွံမံက်ကၠုၚ်ဍာံဍာံမာန်ဂှ်ရ ဒက်ပ္တန်လဝ် ဂကောံပံၚ်ကောံ လိက်ပတ်ယေန်သၞာၚ်မန်(ဗဟဵု)ဏံရောၚ် ဥက္ကဌအ္စာသဝ်နာဲဟံၚ်ဍုၚ် ဟီုရ။
“ဟိုတ်ဂွံပံက်လဝ် ဂကောံပံၚ်ကောံလိက်ပတ်ယေန်သၞာၚ်မန် (ဗဟဵု) လၟုဟ်ဏံဂှ် ကေတ်ကသပ်ညးသ္ကအ်တုဲ ညံၚ် ဂွံကလေၚ်ပ္တိုန်စၟတ်လိက်အခေါၚ်(မှတ်ပုံတၚ်) အဆံၚ်ကၟိန်ဍုၚ်ဏောၚ်ဟီုတှေ် အဃောဂစာန်မံၚ် တၚ်ရန်တၟံ လိက် ပတ်ဗဟဵုဟီုဂှ် ဣဏံ ကြက်ဍေံရ” အ္စာသဝ်နာဲဟံၚ်ဍုၚ် ဟီုရ။
တုဲကၠုၚ်ဂိတုဇှေ် (၁၂) စွေက် (ဂျောန် ၂၅) ဂှ် ကၠောန်သ္ပကောံဓရီု ဂကောံပံၚ်ကောံလိက်ပတ်ယေန်သၞာၚ်မန်(ဗဟဵု) ပ္ဍဲဘာကျာ်ဒေါဝ်သာသနာ (၂၅၀၀) ဍုၚ်မတ်မလီုတုဲ ဂကောံလိက်ပတ်ယေန်သၞာၚ်မန်ပွိုၚ်ဍုၚ်ဂမၠိုၚ် ပံၚ်ကောံတုဲ ဒက်ပတန်ကၠုၚ် နကဵုယၟု “ဂကောံပံၚ်ကောံလိက်ပတ်ယေန်သၞာၚ်မန်(ဗဟဵု)”ရ။
“ဂွံဒှ်ကဆံၚ်ဗဟဵုဍာံဍာံဂှ် ပိုဲဂွံရးမွဲပၠန်မှ ဇှ်ရ ပိုဲချပ်မံၚ်ဖိုဟ်၊ ပိုဲဂွံလဝ်လၟုဟ် (၆) ရး၊ ကဆံၚ်တွဵုရးနွံမံၚ် (၂) အၚ်ဝတေံ ဂကောံနွံမံၚ်၊ လ္ဂုၚ်နွံမံၚ် ပိုဲရန်လဝ် ရးမွဲပၠန်တှေ် ပံက်ဂွံဏောၚ်၊ ဥပမာ ရးဧရာဝတဳ ပံက်မာန်မွဲပၠန်တှေ် ပ္ဍဲရးဧရာဝတဳ ဂှ် မန်အောန်မံၚ်တုဲ ဒးပကောံပကေဝ်ဍေံဝါတ်ကွေံတုဲတှေ် ဍေံခက်အာညိ၊ ရးဧရာဝတဳမွဲ ပိုဲပံက်ဂွံတုဲတှေ် မတ်ဍေံ ပေၚ်၊ ဒက်ကဆံၚ်ဗဟဵုဏံတုဲတှေ် ကဆံၚ်ကၟိန်ဍုၚ် ပိုဲဆက်စၠောံချဳဒရာၚ်လောဲအာ” ဥက္ကဌဂကောံပံၚ်ကောံလိက် ပတ်ယေန်သၞာၚ်မန်(ဗဟဵု)ဂှ် ဆက်ဟီုရ။
ဆေၚ်စပ်ကဵုပရေၚ် ကေၚ်ကာလိက်ပတ်ယေန်သၞာၚ်ကီု စပ်ကဵုပရေၚ်ဗ္တောန်လိက်ပတ်မန်ကီု နူကဵုအဆံၚ်ကၟိန်ဍုၚ် (အလဵုအသဳ) ဂှ် ဒးဆက်စၠောံကေတ်အဆက်ကဵု ဂကောံလိက်ပတ်ယေန်သၞာၚ် တွဵုရးဍုၚ်မန်ရ။
ဒက်ပ္တန်လဝ် ဂကောံပံၚ်ကောံလိက်ပတ်ယေန်သၞာၚ်မန်(ဗဟဵု) လၟုဟ်ဂှ် ရန်တၟံလဝ် ဂကောံလိက်ပတ်ယေန်သၞာၚ် တွဵုရးဂမၠိုၚ် ကေုာံ ရးဇၞော်ဂမၠိုၚ် ပံၚ်ပကောံတုဲ နကဵုအဆံၚ်ကၟိန်ဍုၚ် သွက်ဂွံဒက်ပ္တန်အာ ဂကောံပံၚ်ကောံလိက်ပတ် ယေန်သၞာၚ်မန်(ဗဟဵု) ဂွံဒှ်ကၠုၚ်မာန်ဂှ် ညးအာက္ဍိုပ်လိက်ပတ်ယေန်သၞာၚ်မန်တအ် ဂစာန်ဒၟံၚ်ရ။
