ဝဏ္ဏမာန်၊ ဂိတုဂျောန် ၂၇၊ ၂၀၂၂

ဂကောံအ္စာကၞေဟ်မန်တအ် သွက်ဂွံချူခၞံအာ လိက်ဝၚ်ပရေၚ်ဍုၚ်ကွာန် သွက်ဂွံဗ္တောန်ပ္ဍဲဘာဥတုကညၚ်မွဲဘာသာ ပၠန်ဂှ် နူဂကောံအ္စာကၞေဟ်တအ် ချူပတိတ်လဝ်မာတိကာတုဲ ပတိုန်ထ္ၜးလဝ် ဇရေၚ်ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်တုဲဒှ်ရရောၚ် ဂွံတီကေတ်ရ။
“သွာၚ်ပရေၚ်ကမၠောန်ချူပ္တိတ်မာတိကာ နူဂကောံအ္စာကၞေဟ်တအ် ကဵုလဝ်တာလျိုၚ်ညးတအ်နွံမံၚ်၊ လၟုဟ်တှေ် အ္စာကၞေဟ်တအ် ချူပတိတ်လဝ်မာတိကာ(က္ဍိုပ်ပရော)တုဲရ၊ ပ္တိုန်ထ္ၜးလဝ်ကဵု ဥက္ကဌ၊ ညးအုပ်ကာ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာအလုံရးတုဲရ၊ မၚ်ကလၚ်မံၚ်ရမျာၚ်ညးတအ်ဖိုဟ်ဏောၚ်၊ ဂွံသ္ဂုတ်သွာတ်နူညးတအ်တုဲမှ ဂွံဒှ်ဒတန် ဂွံဆက်ချူအာဏောၚ်” ဥက္ကဌဂကောံအ္စာကၞေဟ် နာဲအံၚ်ဇၞး ဟီုရ။
ပ္ဍဲဘာဥတုကညၚ်ဗ္တောန်တဴဒၟံၚ် စပ်ကဵုဘာသာဝၚ်မန် တန်ဝၚ်ဟံသာဝတဳ၊ တန်ဝၚ်သုဝဏ္ဏဘုံ၊ တန်ဝၚ်မုဟ်တၟံ (မတ္တမ) ဂှ် ဒှ်ဒၟံၚ်ဝၚ်ဍုၚ်မန်အတိက်သၟးတုဲ ဝၚ်ပရေၚ်ဍုၚ်ကွာန်ဂကူမန် ပစ္စုပ္ပန်လေဝ် ထေက်ကဵုဒးဗ္တောန်ကုကွးဘာ တံရောၚ် သၚ်သၟတ်လ္ၚဵု ပတိုန်ထ္ၜးကၠုၚ်ရ။
သွက်ဂွံချူခၞံအာ လိက်ဘာသာဝၚ်ပရေၚ်ဍုၚ်ကွာန်မန်(ပစ္စုပ္ပန်) ဂှ် တုဲကၠုၚ်ဂိတုဇှေ် (၈) စွေက် (ဂျောန် ၁၈) ဂှ် ညးတာလျိုၚ်ဂကောံအ္စာကၞေဟ်မန်တအ် သ္ပကောံဓရီုတုဲ ချူပတိတ်လဝ်မာတိကာ (က္ဍိုပ်ပရော) မူအပြောံတုဲဒှ်အာတုဲ ပလံၚ်ထ္ၜးလဝ် ညးတာလျိုၚ်ဂကောံဗ္တောန်လိက်ပတ်ရ။
ပ္ဍဲကဵုမာတိကာပရောပရာ ဂကောံအ္စာကၞေဟ်တအ် ရန်လဝ်သွက်ဂွံချူဂှ် ဝၚ်ပရေၚ်ဍုၚ်ကွာန်မန် ခေတ်ဟံသာဝတဳ လောန်၊ ဝၚ်ပၠန်ဂတးမန် ကၠာကၟိန်ဍုၚ်ဗၟာ ဟွံကလိဂွံပရေၚ်သၠးပွး၊ ဝၚ်ပၠန်ဂတးမန် (ကၟိန်ဍုၚ်ဗၟာ ဂွံပရေၚ်သၠးပွးတုဲ)၊ ဝၚ်တ္ၚဲတၟေၚ်ပ္ဍဲမန်ဂမၠိုၚ်၊ ဝၚ်ချဳဒရာၚ်ပရေၚ်လိက်ပတ်ယေန်သၞာၚ်မန် သာ်ဝွံပါလုပ်ရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ဗ္တောန်ဒၟံၚ်လိက်ဥတုကညၚ် ပ္ဍဲအခိၚ်ကၟာတ်ဘာတန်ဂှ် သွက်ဂွံဗ္တောန်ထပ်ဗပဵုပ္တိုန် ဘာသာဝၚ်ပရေၚ်ဍုၚ်ကွာန်ဂကူမန် မွဲဘာသာနွံရောၚ်ဂှ် ပ္ဍဲကောံဓရီုပွိုၚ်သၞာံ မရနုက်ကဵု (၂၃) ဝါ တုဲကၠုၚ်ဖဝ်ရဂိုန် (၁၀) မံက်၊ (မာတ် ၁၀) ဂှ် ဖျေံလဝ်နွံတုဲ ဂကောံအ္စာကၞေဟ်တအ်ကေတ်တာလျိုၚ်ချူခၞံရ။