ဝဏ္ဏမာန်၊ ဂိတုသေပ်တေမ်ဗာ ၁၄၊ ၂၀၂၂

လိက်အဘိဓာန်မန်မန် ဂွံစိုပ်ပ္ဍဲကွတ်စက် (အာၚ်တဳ) မာန်ဂှ် ဂကောံရေၚ်တၠုၚ်ဒၟံၚ် ကဏ္ဍလိက်ပတ်ဂမၠိုၚ်တအ် ဒးရေၚ်တၠုၚ်အာထေက်ရောၚ် နူကဵုဝိုၚ်သဳကၠဳ အဘိဓာန်မန် ကေုာံ လိက်ပတ်မန်ဂှ် သဳကၠဳလဝ်ရ။
တုဲကၠုၚ်ဂိတုဘတ် (၃) စွေက် (သေပ်တေမ်ဗာ ၁၂) ဂှ် နူဂကောံအ္စာကၞေဟ်မန် သ္ပသ္ကိုပ်သ္ကတုဲ ကၠောန်ဗဒှ်လဝ် ဝိုၚ်သဳကၠဳ နကဵုက္ဍိုပ်လိက် အဘိဓာန်မန် ကေုာံ လိက်ပတ်မန် ပ္ဍဲဘာရမညနိကာယ ဘာဇၞော်၊ ကွာန်မုဟ်ဒုန်၊ တ္ကံခၟိုၚ်ရ။
ဝိုၚ်သဳကၠဳဂှ် “လိက်အဘိဓာန်မန် နူကဵုလိက်အုပ်ဂှ် ညံၚ်ဂွံဖန်ဗဒှ် အဘိဓာန် နကဵုကွတ်စက် (အာၚ်တဳ) ဂွံစကာအာ နကဵုဖုၚ်၊ ကမ်ပျူတာမာန်ဂှ် ဂကောံရေၚ်တၠုၚ် ကဏ္ဍလိက်ပတ်မန်ဂမၠိုၚ်တအ် ဒးရေၚ်တၠုၚ်အာရောၚ်” ရဴသာ်ဝွံ အ္စာသဳကၠဳတအ် သဳကၠဳပ္တိုန်ထ္ၜးလဝ်ရ။
ဝိုၚ်သဳကၠဳ အဘိဓာန်မန် ကေုာံ လိက်ပတ်မန်ဂှ် ကျာ်ဇၞော်အ္စာဝရဝံသ (ဂကောံလိက်ပတ်တ္ကံခၟိုၚ်)၊ အ္စာကၞေဟ်နာဲအံၚ်ဇၞး (ဂကောံအ္စာကၞေဟ်မန်၊ နာဲမန်ရာဇာ (ဂကောံဗ္တောန်လိက်ပတ်မန်အလုံဒေသရးမန်)၊ အ္စာဇြေ (ကမ္မတဳပညာ) တံ သဳကၠဳ ပ္တိုန်ထ္ၜးရေၚ်သ္ကအ်ရ။
လိက်အဘိဓာန်မန် နူအ္စာထောန်ဝဵုကီု လိက်အဘိဓာန် နူအ္စာချူခၞံလဝ်တၞဟ်တၞဟ်တအ်ကီု ပကောံတုဲ ညံၚ်ရဴလိက်အဘိဓာန်သ္ပတိုၚ်ခဳကဵု လိက်ပတ်မန် (မူသ္ပအစာံ) မွဲ ဂွံတိတ်ကၠုၚ်မာန်ကီု၊ နူကဵုလိက်အဘိဓာန်မန် တိုၚ်ခဳ (မူသ္ပအစာံ) မွဲတိတ်ကၠုၚ်တုဲ သွက်ဂွံဗှ်ပ္ဍဲကွတ်စက် (အာၚ်တဳ) နကဵုဖုၚ်၊ နကဵုကမ်ပျူတာမာန်ဂှ်လေဝ် ဒးခၞံဗဒှ်ပ္တိုန်ရောၚ် အ္စာသဳကၠဳတအ် သဳကၠဳဏာရ။
လိက်အဘိဓာန်တိုၚ်ခဳ (မူသ္ပအစာံ) ဂွံတိတ်ကၠုၚ်ကီု၊ လိက်အဘိက်ဓာန် ကွတ်စက် (အာၚ်တဳ) ဂွံသုၚ်စောဲမာန်ကီု ဂကောံရေၚ်တၠုၚ်ဒၟံၚ် ကဏ္ဍလိက်ပတ် မပ္တံကဵုဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာအလုံဒေသရးမန်၊ ကမ္မတဳပရေၚ်ပညာကောန်ဂကူမန်၊ ဂကောံအ္စာကၞေဟ်မန် ကေုာံ ဂကောံရေၚ်တၠုၚ်ဒၟံၚ် စပ်ကဵုကဏ္ဍလိက်ပတ်တအ် ပံၚ်ကောံတုဲ ဒးရေၚ်တၠုၚ်အာရောၚ် အ္စာဇြေ သဳကၠဳပ္တိုန်ထ္ၜးရ။