ပ္ဍဲဒေသဍုၚ်မန်ဂှ် ကမၠတ်ကွဳလိုန်ဓာတ်တံ ကၠတ်မံၚ်ကွဳ နကဵုဂကောံတုဲ နကဵုအစဳဇန်ကမၠောန်ဂှ် ကၠောန်ကၠတ်မံၚ် ကွဳလိုန်ဓာတ်နွံရောၚ် သကိုပ်အုပ်ဓုပ်ကွာန် ဒေသပွိုၚ်ဍုၚ်မုဟ်ဍုၚ်မွဲတၠဂှ် ဟီုလဴထ္ၜးရ။

အခိၚ်ကပေါတ်ဗၞိက်ဗွဝ်ဖျာ ၚုဟ်က္ဍၚ်တိုန်မံၚ်တ္ၚဲဏံဂှ် ၚုဟ်ကွဳလိုန်ဓာတ်လေဝ် မွဲဖ္ဍိုက် အောန်အိုတ် (၁၀) ကိုဋ် စဵုကဵု (၁၀၀) ကိုဋ်ပြၚ်နွံတုဲ ရဲကၠောန်စ ဗက်ဂၠာဲကၠတ်ကွဳလိုန်ဓာတ်တံလေဝ် ဖျေံအစဳဇန်တုဲ ဗက်ကၠတ်မံၚ်ကွဳ နကဵုဂကောံနွံရောၚ် သကိုပ်အုပ်ဓုပ်ကွာန်ဂှ် ဂးရ။

“ရဲကၠတ်ကွဳလိုန်ဓာတ်တံဂှ်တှ်ေ ကေမၠာန်ဍေံတံ ဓမ္မတာဟွံသေၚ်ပုဟ်၊ ဍေံကၠောန်ကၠတ်စကွဳ ဗီုကမၠောန်ကၠောန်ပရေၚ်ပိုန်ဒြပ်ဍေံ မွဲကီုဏောၚ်၊ မၞိဟ်ဍေံကဵုဍေံဂှ် ဍေံပံက်လဝ်ဗီုဂကောံမွဲတုဲတှေ် ဍေံဖျေံအစဳဇန် ဒၞာဲလဵုဂွံကၠတ်၊ ဒၞာဲလဵု မၞိဟ်ကောံ၊ သဘၚ်အလဵုနွံ၊ မၞိဟ်တေံ အာကၠတ်တေံ၊ မၞိဟ်ဏံ အာကၠတ်ဏံ အဵုဗီုပြၚ်ဂှ် ဍေံနွံမံၚ်” သာ်ဝွံ ညးဟီုရ။

လၟုဟ်မ္ဂး ကွဳလိုန်ဓာတ်ဂကူဝေပ် Wave 125 i – Model တၟိမ္ဂး သီုလာၚ်ဇြေန် မွဲဖ္ဍိုက် အကြာ (၈၀) ကိုဋ်ပြၚ်၊ Honda CB 650F – Model 2018 ၚုဟ်နွံအကြာ (၁၀၀) ကိုဋ်ပြၚ်၊ Honda Click 125i – Model 2024 – 2025 မွဲဖ္ဍိုက် အကြာ (၁၀၀) ကိုဋ်ပြၚ်နွံ ရ။

ကွဳလိုန်ဓာတ်ပရေံပရေံ သွက်စကာကမၠောန်အာကၠအ် အာဝါရဂှ် မွဲဖ္ဍိုက် (၇) ကိုဋ် (၁၀) နွံမံၚ်ရ။

ပ္ဍဲဍုၚ်မန်ဂှ် ဇၟာပ်မၞိဟ် သုၚ်စောဲမံၚ်ကွဳလိုန်ဓာတ်တုဲ ဟိုတ်နူကမၠတ်ကွဳလိုန်ဓာတ် နွံမံၚ်ဇၟာပ်ဒၞာဲဂှ်ရ အာကၠုၚ်မ္ဂး ဒးစွံမံၚ်သတိကဵု ကွဳလိုန်ဓာတ်ကၠေံဂှ်ရ။

“ကမၠတ်ကွဳလိုန်ဓာတ်ဂှ် ဍေံတံမၞိဟ်မွဲဓဝ်ဟွံသေၚ်ပုဟ်၊ ဍေံဖျေံအစဳဇန်ကၠတ်ကွဳ ရောၚ်ဟီုတှ်ေ မၞိဟ်မၚ်ရံၚ်သက်သက် ဍေံဗလးလဝ်ကၠာ၊ အစဳဇန်ဍေံလုပ်တှ်ေ ဍေံကဵုအဆက်ကဵု မၞိဟ်ကၠုၚ်ကၠတ်ဂှ်၊ ပ္ဍဲဍေံဂှ် ကပေါတ်ကၠတ်ဍေံစုၚ်မံၚ်၊ ခါတ်ကသအ်ကအ်လေဝ် ဍေံကၠတ်ဂွံဂှ်ရ၊ အာကၠုၚ်တှ်ေ ဒးစွံသတိကဵု ကွဳကၠေံရ၊ ဒၞာဲဂှ် မၞိဟ်ဂၠိုၚ်မၞိဟ်ကောံတှေ် ကွဳကၠေံ ချိုတ်ပၠိုတ်ရ” သာ်ဝွံ သကိုပ်အုပ်ဓုပ်ကွာန်ဂှ် ဆက်ဟီုထ္ၜးရ။

ကွဳလိုန်ဓာတ်ဂှ် ဒၞာဲမၞိဟ်အာဂၠိုၚ် ပ္ဍဲကျာ်၊ ပ္ဍဲဘာတံကီု၊ ဒၞာဲသဘၚ်တံကီု၊ အကြာဆေၚ်ဖျာစသုၚ်ကီု၊ ဒၞာဲရုၚ်ကမၠောန်ကီု၊ အကြာကၠအ် အကြာဝါလေဝ်ကီု၊ စွံလဝ်ပ္ဍဲသ္ၚိကီု ကမၠတ်ကွဳလိုန်ဓာတ်တံ မၚ်ရံၚ်တုဲ ကၠတ်မံၚ်ဇၟာပ်ဒၞာဲရ။

ဟိုတ်နူကွဳလိုန်ဓာတ် ကၠေံမံၚ်ဇၟာပ်ဒၞာဲဂှ်တုဲ အကြာကျာ်ဘာကီု၊ အကြာရုၚ်ကမၠောန်ဂမၠိုၚ်ကီု ကွက်စွံလဝ် လိက်ကဵုသတိ ကွဳလိုန်ဓာတ်ကၠေံ ဇၟာပ်ဒၞာဲနွံဂှ် ဂွံတီကေတ်ရ။