ဗွဲကြဴနူကဵု ဂကောံပၠန်ဂတးပံၚ်တောဲဂမၠိုၚ်တံ လုပ်ပန်ဗတိုက်လဝ် ဒပ်ကံၚ်ဇြဳပၞာန်(ယာယဳ) ပ္ဍဲကွာန်ကျာ် ဗဒဲါကွာန်တၟံကၞေၚ်ဂှ်တုဲ အာဂတဏံ ဂကောံပၠန်ဂတးဂမၠိုၚ်တံ ယဝ်ရ လုပ်ပန်ဗတိုက် တမ်ဒပ်ကံၚ်ဇြဳပၞာန်တံမ္ဂး ထောံဖျေံဗမ်ပ္ဍဲကွာန်ဂမၠိုၚ်ရောၚ် ကံၚ်ဇြဳပၞာန်တံ ဟီုဘကၠုၚ်နွံရ။
ဇၟာပ်ဂကောံပၠန်ဂတးဂမၠိုၚ်တံ ချဳဒရာၚ်ပန်ဗတိုက်ကၠုၚ် အကြာဒေသပွိုၚ်ဍုၚ်ရေဝ်မ္ဂး ညးတာလျိုၚ်သွာၚ်အုပ်ဓုပ်ကံၚ်ဇြဳပၞာန်တံကီု၊ ဗိုလ်ပၞာန်တံကီု ကော်ဆဵုဂဗဂ ကောံအုပ်ဓုပ်ကွာန်ဂမၠိုၚ်တံတုဲ မွဲမွဲသာ် ဂကောံပၠန်ဂတးတံ ကဵုဘဲအန္တရာဲ ကုဗဒိုပ်၊ တမ်ဒပ် ကံၚ်ဇြဳပၞာန်တံနွံကၠုၚ်မ္ဂး သွက်ဂွံထောံဖျေံဗမ် အပ္ဍဲကွာန်ဂမၠိုၚ်ဂှ် ဘဟီုကၠုၚ်နွံရ။
လၟုဟ်လေဝ် နူကဵုဂကောံပၠန်ဂတးဂမၠိုၚ်တံလုပ်ပန်ဗတိုက် ဒပ်(ယာယဳ)ပ္ဍဲကွာန်ကျာ် ကရပ်ကွာန်တၟံကၞေၚ်ဂှ်တုဲ ကံၚ်ဇြဳပၞာန်တံဖေက်လကိုတ်မံၚ်ဂှ်ရ ဗက်ဟီုတြးဘမံၚ် စပ်ကဵု ထောံဗမ်အကြာကွာန်ဂမၠိုၚ်တံဂှ် ထတ်သ္ကာတ်ကၠုၚ်ရ။
“မအရေဝ် ဍေံ (ကံၚ်ဇြဳပၞာန်) တံ ဟီုမံၚ်မွဲဏှမွဲဏှမွဲဂှ် ယဝ်ရ ပန်ဒးဍေံတံ၊ လုပ်ဗတိုက်ဒး တမ်ဒပ်ဍေံတံတှေ် ဍေံတံထောံဖျေံဗမ်မၠံက် ပ္ဍဲကွာန်ဏောၚ်၊ ဍေံတံပန်စံၚ်ကွာန်ဏောၚ်ဂှ် ဇၟာပ်ရဲပၠန်ဂတးတံ ချဳဒရာၚ်ကၠုၚ်တှေ် အရေဝ်ဏံဂှ် ဍေံဟီုဘမံၚ်တွဵုရ၊ နူကဵုဍေံတံ ဒးဒုၚ်ပန်လဝ် ပ္ဍဲကွာန်ကျာ်ဂှ်တုဲတှေ် အရေဝ်ဍေံတံ ဟီုဘကၠုၚ်လဝ်တုဲတေံဂှ် ဍေံတံ ကလေၚ်ဗြုထတ်တိုန်ပၠန်” သာ်ဝွံ ညးဒေသဍုၚ်လၟိုၚ်မွဲတၠဂှ် ဟီုထ္ၜးရ။
ဂလာန်အရေဝ်ဘပဠ ထောံဖျေံဗမ်ပ္ဍဲကွာန်၊ စံၚ်ကွာန်ဂှ် ဒှ်ဂလာန်ကံၚ်ဇြဳပၞာန်တံ ဟီုဘပဠညးဍုၚ်ကွာန်တံကီု၊ ဟီုဘ သွက်ဂွံကဵုသတိကဵု ဂကောံရဲပၠန်ဂတးဂမၠိုၚ်တံ ညံၚ်ဂွံရောံဒညကဵုဍေံ(ကံၚ်ဇြဳပၞာန်)တံလေဝ်ဒှ်ရောၚ် ညးဒေသမွဲတၠပၠန်ဂှ် ဟီုရ။
“အရေဝ်ဟီုဘ စံၚ်ကွာန်ဏောၚ်၊ ထောံဖျေံဗမ်ပ္ဍဲကွာန်ဏောၚ်ဏံဂှ် အရေဝ်ဍေံတံ သွက်ဂွံဍဵုဘဖျေံ ညးဍုၚ်ကွာန်တံ၊ တုဲတှေ် သီုဟီုကဵုသတိကဵု ရဲဂကောံပၠန်ဂတးတံ ပန်ဗတိုက်ဍေံတံတှေ် ဂွံရောံဒညတိုန်၊ အရေဝ်ဏံဂှ် ဍေံတံဟီုမံၚ်တွဵုရ၊ လၟုဟ်လေဝ် ဍေံတံ ကလေၚ်ဗြုတိုန်ပၠန်” ဂးရ။
ယဝ်ရ ဂကောံပၠန်ဂတးဂမၠိုၚ်တံ လုပ်ပန်ဗတိုက် ဗဒိုပ်၊ တမ်ဒပ် ကံၚ်ဇြဳပၞာန်ဗၟာတံ ပ္ဍဲပွိုၚ်ဍုၚ်ရေဝ်ဂှ်မ္ဂး ပန်စံၚ်ကွာန်ရောၚ်၊ ထောံဖျေံဗမ် ပ္ဍဲကွာန်ရောၚ် ပရိုၚ်ဏံ ပြာကတ်မံၚ် အကြာညးဍုၚ်ကွာန်တံတုဲ ညးဍုၚ်ကွာန်လ္ၚဵုတံ ဖေက်လကိုတ်မံၚ်နွံရ။
ပွိုၚ်ဍုၚ်ရေဝ်ဂှ် ဒှ်ဒေသဂကောံပၠန်ဂတးဂမၠိုၚ်တံ ချဳဒရာၚ်ဂၠိုၚ်အိုတ်ကီု၊ ဒှ်ဒေသဂကောံပၠန်ဂတးဂမၠိုၚ်တံ မဖျေံသဇိုၚ်ဂၠိုၚ်အိုတ်ဒှ်တုဲ ဗွဲကြဴနူကဵု ဂကောံပၠန်ဂတးဂမၠိုၚ် ပံၚ်တောဲလုပ်ပန်ဗတိုက် ဒပ်ကွာန်ကျာ် ကရပ်ကွာန်တၟံကၞေၚ်ဂှ်တုဲ ဂကောံအုပ်ဓုပ် လစှေ်နူကံၚ်ဇြဳပၞာန်တံကီု၊ ကောန်ဒပ်ကံၚ်ဇြဳပၞာန်ဂမၠိုၚ်တံကီု ဒှ်ဗဟေက် ဖေက်လကိုတ်မံၚ်အိုတ်ရ။
0 Comments