ပေါဲဗ္တိုက်ရပ်လွဟ် မမံက်တိတ်ကၠုင်နူပေါဲဗ္တိုက်ညးဍုင်ကွာန် သၞာံ ၂၀၂၁ တေံဂှ် စိုပ်သၞာံ ၂၀၂၄ စဵုကဵုဂိတုဒဳဇြေမ်ဗါဏအ် သာတုဲ ဖန်ဗဒှ် ဂရုပ္တိုန်ကဵုစိုတ် ကုညးမပါလုပ်အပ္ဍဲပၠန်ဂတးတအ်ရ။

ဟီုဗွဲခ္ဍန်မ္ဂး ပ္ဍဲဂိတုအဝ်ဂါတ် စၟတ်တ္ရဲ ၃ ဂှ် ဒပ်ကိုဝ်က MNDAA ပံင်ကောံဒပ်စဵုဒၞါညးဍုင်ကွာန် PDF တအ်တုဲ သီဂွံဏာ ဌာန်ဂအုပ်ပၞာန် ရးဨသာန် (ရမခ) ၊ ခြာဟွံလအ် ပ္ဍဲဂိတုဒဳဇြေမ်ဗါ စၟတ်တ္ရဲ ၁၈ ဂှ် ဒပ်ရခေင် AA ထပ်သီဂွံဏာ ဌာန်ဂအုပ်ပၞာန် ရးပလိုတ် (နပခ) ပၠန်၊ လ္တူဏအ် ညးတၠခန္ဓ မကၠောန်ဏာနတဲ ဗီုကဵု MNDAA၊ AA လ္ပဟီုဏီ မၞိဟ်မင်ဗဵုသ္ကဲတအ်လေဝ် ဒှ်ဇြဟတ်စိုတ် တက်တဲဖအဴလဝ် ဂတာတဲၜါလ္ပာ် ဍာဲဗ္ကေတ်အိုတ်ရ။

တုဲပၠန် ပွရဲပၠန်ဂတးတအ် မသီဂွံဏာ ဌာန်ဂအုပ်ပၞာန်ဗၟာဇၞော်ဇၞော်သာ်ဏအ်မာန်ဂှ် သွက်ညးမပ္အပ်ဘဝ လုပ်ကၠုင်လဝ်ပေါဲဗ္တိုက် အခေါင်ဗၠးၜးဂကူ နဂၠံင်တရဴပၠန်ဂတးရပ်လွဟ် ပွိုင် ၇၀ သၞာံပြင်င်တအ်လေဝ် သ္ဂောံမိင်၊ သ္ဂောံဆဵုအာ အလန်ကိုပ်ကၠာအိုတ်ကီု၊ ဒးဟီုမ္ဂး ပရေင်အံင်ဇၞးတဴတက် မမဲကၠုင်လဝ်မွဲလှ်ေဂှ် ဂွံဆဵု ဂွံညာတ်ကၠုင် ပ္ဍဲကာလပၠန်ဂတးခေတ်တၟိတ္ရဲဏအ်ရ။

ဆဂး သၟဝ်တဲဒပ်ပၞာန်ဗၟာဂှ် ပံက်စွံလဝ် ဌာန်ဂအုပ်ပၞာန်အလုံဍုင်မွဲ နွံမံင် ၁၄ ဒၞါဲရ၊ လၟုဟ် စှ်ေအာ ၂ ဒၞါဲတုဲ သှ်ေမံင် ၁၂ ဒၞါဲဏီ၊ တမ်ဒပ်ဍောတ်ဇၞော်လေဝ် နွံဘောနဘောနံင်ဏီ၊ ဇြဟတ်လွဟ်လနက်၊ ဇြဟတ်မၞိဟ်၊ ဇြဟတ်က္လင်အမိင် ပ္ဍဲဒပ်ဍေံ (ပၞာန်ဗၟာ) ချိုတ်ပၠိုတ်ဗိုန်ဗတ်မံင်ဖိုဟ်ဏီဂှ် ဝိုတ်ထောံဟွံဂွံ သာ်ဝွံလေဝ် ဂလာန်ကဵုသတိတအ် မံက်တိတ်ကၠုင်မွဲစွံကီုရ။

သာ်လဵုဒှ်ဒှ် နူစ ၂၀၂၁ ဂိတုဖေဖဝ်ဝါရဳ စိုပ် ၂၀၂၄ ဂိတုဒဳဇြေမ်ဗါ ပွိုင် ၃ ပိသၞာံပြင်င်ဏအ်ဂှ် သ္အာင်နူဌာန်ဂအုပ်ပၞာန် မ္ဒးဒုင်သီလဝ်ကဵု MNDAA ကေုာံ AA ၜါဒၞါဲလ္တူတေံဂှ်တုဲ တမ်ဒပ်ဇၞော်ဍောတ် ပၞာန်ဗၟာ ဖျေံသ္ဇိုင် နွံပ္ဍဲတွဵုရးကရေင်ဍာဲ၊ ကရေင်၊ ချေင်၊ ကချေင် ကေုာံ ရးသကိုင်၊ အဝစတမ်တအ် ဒၞါဲဗွဲမဂၠိုင်လေဝ် ဒးဒုင်ဓလိပ်၊ ဒးဒုင်သီလဝ်ကဵု ရဲပၠန်ဂတးတအ်နွံရ။

တၟော်တော်ဆကဵု အတိုင်တင်နင်သရောပ်ဗွဲလ္တူတေံမ္ဂး ပ္ဍဲအခိင်ကာလပၠန်ဂတးတမ်က္ညင်ဟီုဟီု ပၠန်ဂတးခေတ်တၟိဝွံဂးဂး ဒေသရးမန် (ဒၞါဲတိဍာ်အုပ်ဓုပ်ကောန်ဂကူကရေင်ဟွံပါ) ဂှ် တၟေင်တၞဟ်ခြာတိတ်ကၠုင်မွဲဗီု မွဲနဲရ။

∆ မန်တအ် မုသ္ပမံင်ရော

အခိင်ပၞာန်ဗၟာ သီအဝဵု ပ္ဍဲဂိတုဖေဖဝ်ဝါရဳ စၟတ်တ္ရဲ ၁၊ သၞာံ ၂၀၂၁ တုဲဂှ် “ဍေံကဵုဍေံဏောင် မုဟွံဆေင်ကဵုပိုယ်” ဂလာန်ပရင် မမံက်တိတ်ကၠုင်နူပၞော်လဵုကေတ်ဟွံဒးဂှ် အုပ်ဓလီုဂွံဏာစေဝ်လ္တူ ပ္ဍဲသမ္တီက္ဍဟ် သၟတ် ကေုာံ ညးချဳဒရာင်ကတိုင်ကၟိုဟ် ပရေင်ဍုင်ကွာန်ဗွဲပလးတအ်တုဲ အခိင်ညးဂမၠိုင် ဂ္စာန်ဓမံက်ပ္တိတ်ဒၟံင် ပၟိက်ဆန္ဒ ဒဒှ်ရဟွံဒုင်တဲ ပွပၞာန်သီအဝဵုဂှ် မန်တအ် တုဏှဳဘာဝေ သ္ရိတ်ဇြကၠုင်လဝ်ခိုဟ်ဟ်ရ။

ပ္ဍဲကဵုဂှ်ဝွံ အယာံမာတ်သၟတ်မန် ဗၞတ်ညိညဟေင် ပံင်တောဲကဵု ဂကူကောန်ဍုင်အရင် မပ္တံကဵုပအိုဝ်၊ ကရေင်တအ်တုဲ ပါလုပ်ကၠုင် ကရောံပေါဲဗ္တိုက်ညးဍုင်ကွာန် နဗီုပြင်တိတ်ဂၠံင်ထ္ၜးဆန္ဒ ဒစဵုဒစး တၠအဝဵုပၞာန်ဗၟာကီု သီုဟွံဒုင်တဲသၞောတ်တၠအဝဵုအိုဿီုရ။

ပေါဲဗ္တိုက်ညးဍုင်ကွာန်ဂှ် အသိင်သၠုင်တိုန်၊ ပရေင်သ္ပအနိင်အထက် (ကေတ်မာန်နဇြဟတ်လွဟ်) နူဒပ်ပၞာန်ဗၟာလေဝ် ကြမ်ဓဇန်ဂၠိုင်တိုန်တုဲ သၟတ်၊ ညးဗြဴ၊ ညးတြုံ ကေုာံ ညးဍုင်ကွာန်ဇၞော်ဍောတ် အလုံဍုင်တအ် ဒုင်ဒဝ်ဟွံမာန် ဂိခအံင်တိုန်စိုတ်အိုတ်ဂှ်ရ ပေါဲဗ္တိုက်ရပ်လွဟ်မံက်တိုန်ကၠုင်အိုတ်ရ။

က္လေင်ဇွိတ်သပေါတ်ညိပၠန်မ္ဂး အခိင်ညးဍုင်ကွာန်ဂမၠိုင် ဒစဵုဒစးမံင်တၠအဝဵုပၞာန် အလုံဍုင်မွဲ နဗီုပြင်ပေါဲဗ္တိုက် ညးဍုင်ကွာန်၊ ပေါဲဗ္တိုက်ရပ်လွဟ်ဂှ် ဗော်ညဳသၟဟ်မန် MUP ဒုင်တဲ ဂ္ညိက်က္ဍိုပ် သွက်ဂွံပံင်တောဲကဵု ညးသီအဝဵု ဍုင် ဂကောံကံင်ဇြဳပၞာန်ကီု၊ အဆက်ဂှ် နဗော်ဍုင်မန်တၟိ NMSP လေဝ် ဆက်ပတှ်ေကေတ်ဂၠံင်တရဴ NCA တုဲ အာစိုပ်မံင်နေပျဳတဝ် မွဲဏှမွဲဏှကီု နွံကၠုင်အဆက်ဟွံပိုတ်သ္ကုတ်ရ။

ဆဂှ်သၟးဟွံက ပ္ဍဲကာလပၠန်ဂတးဏအ် သ္ပစၞးဂကူမန်တုဲ သ္ဂောံပါလုပ်ကေတ်တာလျိုင် အပ္ဍဲကံင်ဇြဳကဵုက္သပ်ဂၞန် ပရေင်ညဳသၟဟ်ကောန်ဂကူ NUCC ကေုာံ အလဵုအသဳညဳသၟဟ်ကောန်ဂကူ NUG ဂှ်လေဝ် ညးချဳဒရာင်ပရေင်ဍုင်ကွာန် ကေုာံ ညးက္ဍိုက်ပ် ဂကောံမဟာဇန်မန်လ္ရဵုတအ် နယၟု MISCC၊ MSFC ဂှ် ရုန်ဂ္စာန်ပ္တိတ်ဇြဟတ်တုဲ ပြဟ်ဟ်ဝွံ ပ္ဍဲ NUG ဂှ် အဆံင်တာလျိုင်ဝန်ဇၞော်၊ ဒုဝန်ဇၞော် ပိတၠ ပါလုပ်ဒၟံင်နွံရ။

မွဲလ္ပာ်ဂှ်ပၠန် ဒုင်သ္ဇိုင်ကဵု လ္တူတင်ဒတူလိုင် ဟွံဒုင်တဲပၞာန်သီအဝဵု၊ ဟွံဒုင်တဲသၞောတ်တၠအဝဵုပၞာန်အိုဿီု ကေုာံ သၞောဝ် ၂၀၀၈ တုဲ ပ္ဍဲသၞာံ ၂၀၂၁ အခိင်လ္ဒောဝ်သၞာံပြင်င်ဂှ် ပေါဲဗ္တိုက် နဂၠံင်တရဴရပ်လွဟ် စမံက်တိတ်ကၠုင်ရ၊ ညးချူလိက် ၜိုတ်သမ္တီဒး ပ္ဍဲကဵုဏအ်မ္ဂး ဒပ်စဵုဒၞါဍုင်မန် MSDF၊ ဒပ်ရာမည RA တအ် ပါလုပ်ရ။

နူဂှ်မွဲအဆံင် ဒပ်ပၠန်ဂတးဍုင်မန် MSRF၊ ဒပ်ပၞာန်ဗၠးၜးဍုင်မည် MLA စတမ်တအ် မံက်တိတ်ကၠုင်တုဲ သၟတ်မန် မပါလုပ်လဝ် အပ္ဍဲအခိင်ကာလ ဒစဵုဒစး တၠအဝဵုပၞာန် နဂၠံင်တရဴ ပေါဲဗ္တိုက်ညးဍုင်ကွာန်လ္ရဵုတအ် လေဝ် လုပ်စိုပ် ကေတ်ကၠုင်တာလျိုင် အပ္ဍဲဂၠံင်တရဴ ပၠန်ဂတးရပ်လွဟ်ဗၞတ်ညိညကီုရ။

စဵုကဵုသၞာံ ၂၀၂၃ ကၠာဟွံအိုတ်ဂှ် ပံင်တောဲကဵု ဒပ်ပၠန်ဂတးကောန်ဂကူကရေင်၊ ဒပ်စဵုဒၞါညးဍုင်ကွာန် PDF တအ်တုဲ ဒပ်ပၠန်ဂတးမန် မမံက်တိတ်ကၠုင် ပ္ဍဲအခိင်ပၠန်ဂတးတမ်က္ညင် မပ္တံကဵု MSDF၊ RA၊ MSRF တအ် လုပ်ကၠုင်လဝ်ပေါဲဗ္တိုက်ကဵုသၞ ဒပ်ပၞာန်ဗၟာ ဗၞတ်ထေက်ကြိုက်လေဝ် နွံကၠုင်ကီုရ။

အခိင်ကာလဝွံ ဗော်ပၠန်ဂတးရပ်လွဟ် ဝှ်ကြံင်အိုတ် ပ္ဍဲဂကူမန် ဗော်ဍုင်မန်တၟိ NMSP ဂှ် ဆက်အာမံင် နေပျဳတဝ်ဏီ၊ ဗော်ရုဲမာဲ ဂွံလဝ်ထံက်ဂလာန်ညးဍုင်ကွာန်မန် သၞာံ ၂၀၂၀ ဗော်ညဳသၟဟ်မန် MUP လေဝ် လုပ်ပံင်အာကဵုဂကောံကံင်ဇြဳပၞာန်တုဲသၟးဟွံက သွက်ဂွံဂွံအခေါင်ဒက်ပ္တန်ဗော်ပရေင်ဍုင်ကွာန် သၟဝ်တဲကံင်ဇြဳပၞာန်မွဲဝါပၠန် အဃောဂ္စာန်ဒၟံင်လေဝ်ဒှ်ရ (လၟုဟ် ဂွံအခေါင်ဒက်ဗော် နူကဝ်မယှေန်ရုဲမာဲကံင်ဇြဳပၞာန်တုဲဒှ်)။

ဟိုတ်နူအသိင်အလိုန် လပှ်ပရေင်ဍုင်ကွာန်၊ ပရေင်ပၞာန်တံဂှ်တံဂှ်တုဲ လညာတ်၊ တင်ဒတူလာင် အကြာဂကောံမဟာဇန်မန်၊ အကြာညးချဳဒရာင်ကတိုင်ကၟိုဟ်ပရေင်ဍုင်၊ ပရေင်ကွာန်မန် (စပ္တံနူကဏ္ဍလိက်ပတ်၊ ယေန်သၞာင်၊ ပရေင်သၟတ်) နာနာသာ် မန်ဍုင်မ္ရး၊ မန်အပ္ဍဲဍုင်တအ် မွဲကုမွဲလေဝ် ပါ်ဒ္ကး ဒှ်ကၠုင်ၜါလွး၊ ၜါကရေက်ဟွံက စဵုကဵုအခိင်တ္ရဲဏအ်ဏီရ။

စိုပ်သၞာံ ၂၀၂၃ ဖါအိုတ်ဂှ် နူဒပ်ကိုဝ်က၊ ပလံင် ကေုာံ ရခေင် (MNDAA၊ TNLA ကေုာံ AA) မဟာမိတ် ၃ ဂကောံတအ် ဓမံက်ပ္တိုန်ကၠုင်အစဳအဇန် ပြုပြေင်ပၞာန် နယၟု ၁၀၂၇ တုဲ အသိင်ပၠန်ဂတး မအိင်ဇိင်ကၠုင်ဒၟံင် နူသၞာံ ၂၀၂၁၊ ၂၀၂၂ ကေုာံ ၂၀၂၃ ကြပ်စိုပ်ကၞောတ်သၞာံတေံဂှ် မြက်ဇက်တိုန်ကၠုင်သၟးဟွံက သီုသီဍုင် သီဗ္ဒိုပ်ပၞာန်ဗၟာ မာန်ကၠုင်ဂှ်ရ လ္ပာ်ဇြဟတ်ပၠန်ဂတးတအ် ဂွံတိုန်ဇြဟတ်စိုတ်ညးသ္ကအ်အိုတ်ရ။

ခြာဟွံလအ် စိုပ်သၞာံ ၂၀၂၄ ဂိတုဖေဖဝ်ဝါရဳဂှ် သွက်ဂွံဗ္တိုက်သရိုဟ်တၠအဝဵုပၞာန် ဂးတုဲ က္ဍိုပ်သ္ကိုပ်၊ ကမ္မတဳဗဟဵု ကေုာံ သ္ကိုပ်ဒပ်၊ ကောန်ဒပ်၊ ကောန်ဗော် နူဗော်ဍုင်မန်တၟိလ္ရဵု ပါ်တိတ်ကၠုင် နကဵုယၟု ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) ကီုရ။ ကြဴနူဂှ် ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်)၊ ဒပ်ပၞာန်ဗၠးၜးဍုင်မည် (MLA) တအ် ပံင်တောဲကဵု ဒပ်ပၠန်ဂတးမဟာမိတ်ဂမၠိုင်တုဲ စလုပ်သီဗ္ဒိုပ်ဗၠာဲသၟိင် ကံဗိန်ရ၊ နူဂှ်ဟေင် ပေါဲပၞာန်ထၞာန်လုပ်စိုပ်ဒေသရးမန် စဵုကဵုကွာန်ဓမ္မသ မ္ဒးတူလေင်ဆောံကဝက်ပြင်င်ရ။

နူကဵုဒဒှ်ဘဝဂကူမန်တအ် ဟွံမိက်ဆက်စပ်တုဲ မိက်သ္ဂောံမံင်ၜိုဟ်ဟ်သြိုဟ်ဟ် မဟၟဲကဵုဘဲပၞာန်၊ မဟၟဲကဵုဒဒိုက်သၞာ ပ္ဍဲအခိင်ကာလပၞာန်သီအဝဵု၊ ကာလပၠန်ဂတးတ္ရဲဏအ်ဂှ် မ္ဒးဆောံလေင်ကၠုင် ပၟိက်ဆန္ဒတအ်ရ။ ဗွဲကြဴဂှ်ပၠန် ဒပ်ပၠန်ဂတးဍုင်မန် MSRF ကေုာံ ဒပ်မဟာမိတ်တအ် လုပ်စိုပ်ချဳဒရာင် လ္ပာ်ခရိုင်ထဝါဲ ဒေသဍာ်ဗုတုဲ ဒှ်အာပေါဲဗ္တိုက်ကုသၞပၞာန်ဗၟာဂှ် ကွာန်တဵုလွဳလေဝ် မ္ဒးလီုလာ်ကၠုင်လဝ်နွံကီုရ။

နူအသိင်ကွာန်ဓမ္မသတူဘဲပၟတ်ပၞာန် သီုညးဍုင်ကွာန်တအ် ဒးဂြိပ်ဒဴနူကွာန် လေင်ဆောံသီုသ္ရိဌာန်ဂှ် ကွာန်တဵုလွဳလေဝ် ဒးဒုင်ဏာဗွဲမဗဗွဲကီုဂှ်ရ ဂလာန်မ္ဂး “ရဲ (ဒပ်ပၠန်ဂတး) တအ်ဂှ် လုပ်ကွာန်တှ်ေ ရံင်ဏး၊ ကွာန်တူဏောင်၊ ပသတိ” ဂှ် သာတုဲ ဂွံကၠုင်စေဝ်လ္တူ အကြာဗွိုင်မၞိဟ် ညးဍုင်ကွာန်ရးမန်တအ်ပၠန်ရ။

အကာဲအရာလက္ကရဴအိုတ်ဝွံ ကြဴနူဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) ပါ်တိတ်အာတုဲ ဗော်ဍုင်မန်တၟိ NMSP ကၞပ်သ္ရိတ်မံင်ရ၊ သာ်ဂှ်ကီု ဗော်ညဳသၟဟ်မန် MUP လေဝ် ကြဴနူဂွံအခေါင်ဒက်ဗော် နူကံင်ဇြဳပၞာန်တုဲ မုပရေင်ချဳဒရာင်လေဝ် ကၠောန်ဟွံမာန်ဏီ။

ရံင်လ္ပာ်ဇြဟတ်ပၠန်ဂတးမ္ဂး ဒပ်ပၠန်ဂတးမန် ၄ ဒပ် (MLA၊ MSDF၊ NMSP-AD၊ MSRF) တအ် သွက်ဂွံဒှ်မွဲဒပ် မာန် ရန်ပ္တဝ်တုဲ ဓမံက်အာရုပ်ရဴပရေင်ပံင်တောဲ သွာင်ပၞာန်မွဲစွံဏောင် သဳကၠဳတုပ်လဝ်စိုတ်နွံရ။

∆ စိုတ်ဓါတ် ပၠန်ဂတးမန်တအ် တဆေတ်သဝ်စှ်ေမံင်ဟာ?

တၟော်ကဵုကာလ၊ ဒေသမ္ဂး အခိင်တ္ရဲဏအ်ဂှ် ဗွိုက်သၠဲပရေင်ပၞာန်ဂှ် ဇၞော်သၠဲတိုန်တုဲ ဗွိုက်သၠဲ ပရေင်ဍုင်ကွာန်ဂှ် ဍန်စှ်ေသိုက်က် ဂွံဆဵုမံင်ဂတမတ်ရ။ ဆဂှ်သၟးဟွံက ပေါဲဗ္တိုက်တ္ရဲဏအ်ဂှ် တုပ်မံင်ကဵုဂလာန်တၠညး ရာဇာဓိရာဇ် “ကေတ်ဍာံ ဒးဂွံ၊ ကၠောန်ဍာံ ဒးဒှ်” တအ်ဂှ်ရောင်။ ဇကုကၠောန်မှ ဇကုဂွံတုဲ ဇကုဗ္တိုက်နတဲမှ လေဝ် ဇကုဂွံအံင်ဇၞးနတဲကီုရောင်။

အတိုင်သ္ဂးလဝ် လ္တူတေံဂှ်ရ ဒပ်ပၠန်ဂတးကောန်ဂကူမန် ၄ ဒပ် တုပ်စိုတ် သွက်ဂွံဗ္တိုက်သၞမွဲစွံဣရ။ ဣလဵုရော ဇြဟတ် (မၞိဟ်၊ ကပေါတ်၊ သြန်၊ အထံက်အရီု ကေုာံ ကွတ်) နွံညိရဟာ၊ ညးဍုင်ကွာန်မန်တအ် နွံဓဝ်ပတှ်ေ ထံက်ဂလာန်ညိရဟာ၊ သၟတ်မန်တအ် စိုပ်မံင်အလဵုအိုတ်ရော၊ သ္ဂောံကၠောန်ဗဒှ်ဗီုပြင် ကၠေင်ဇြုံ ခၞာဇြုံဂှ် လေဝ် ဒးကေတ်အခိင် ပလေဝ်ပလေတ်စ ညံင်ရဴဒပ်ရခေင် AA ဗၞတ် ၁၅ သၞာံကီုဏောင်။

ပၠန်ဂတးမန်ဂှ် ပွိုင် ၇၅ သၞာံပြင်ကၠုင်ရ၊ သဝ်ပၟဝ်ဇဝ်ပ္ကဴ နူပၠန်ဂတးဂှ်လေဝ် ဗၞတ်ထေက်ကြိုက် က္လိဂွံကၠုင်နွံရ။ သွက်ဂွံထပ်သၠုင်ပ္တိုန်အသိင်မွဲဝါပၠန်ဂှ် ကာလတ္ရဲဏအ် ဒှ်အခိင်ခိုဟ်ရောင် ဒုင်လဝ်တဲညးသ္ကအ်အိုတ်ရ၊ ဒှ်သာ်ဂှ်ရ  စိုတ်ဓါတ် ပၠန်ဂတးမန် တဆေတ်သဝ်စှ်ေမံင်ဟွံသေင်၊ အဓိက နွံပၟိက်ဒၟံင်ကဵုမၞိဟ်ဂံင်ပၠတရဴ၊ မၞိဟ် ဂံင်ဆဝ်ဗ္ရုဟ်၊ မၞိဟ်ဂံင်ပါလုပ် ကေုာံ မၞိဟ်ဂံင်ကဵုဇြဟတ် သွက်ပၠန်ဂတးဗၠးၜးဂကူတ္ရဲဏအ်ရောင် ပတိုန်ထ္ၜးဏာရ။