ဒေသကွာန်မွဲဒမြိပ်ဂၠံၚ်ကျာ်ပိ ကဵု ဇြပ်ဗုဂှ်ဝွံ ပေဲါပၞာန်ကတဵုဒှ်ဒၟံၚ် အခိၚ်လအ်ကၠုၚ် ကြပ်ပေၚ်ကဵုသၞာံဒှ်တုဲ ညးဍုၚ်ကွာန်ရဲဒးဂြိပ်ပဲါဒဴဘဲပေဲါပၞာန်တံ ပရေၚ်ရီုဗၚ်ဟွံမွဲတုဲ ဒှ်မံၚ်ခက်ခုဲကဵု ပရေၚ်စသုၚ်မံၚ်စံၚ်ရောၚ် ညးဘိုၚ်ရေၚ်တၠုၚ်မံၚ်မွဲတၠဂှ် ဟီုထ္ၜးရ။
ညးဒးဂြိပ်ပဲါဒဴဒၟံၚ် ဘဲပေဲါပၞာန်တံဂှ် အခိၚ်လၟုဟ် ဟိုတ်နူဒှ်မံၚ်အခိၚ်မုဟ်ကျာဂံက်မံၚ်တုဲ သွက်ကောန်ၚာ်ကဵု မၞိဟ်အာယုက်ဇၞော် ဗျုဗျုတံဂှ် ဒးဂွိၚ်ကဵု ပရေၚ်ထတ်ယုက်ကီု၊ ဂွံစ ဂွံသုၚ်ဂှ်လေဝ် ပရေၚ်ရီုဗၚ်လဵုလေဝ် ဟွံဂွံတုဲ အခိၚ်လအ်ကၠုၚ်ဂှ်ရ ဒှ်ကၠုၚ်ပရေၚ်ခက်ခုဲနွံ သ္ဂးရ။
“ဒေသဏံဂှ် ဒှ်မံၚ်ဒေသ အာကၠုၚ်ဝါတ်ကီု၊ ဍေံလေဝ် ဒှ်မံၚ်မုဟ်ဂၠဴခၟူဂစေံတုဲတှေ် မုဂကောံအလဵုလေဝ် ဟွံစိုပ်ကဵုရီုဗၚ်ပုဟ်၊ လၟုဟ်ဒှ်မံၚ်အခိၚ်ဂံက်တှေ် ကောန်ၚာ်ဍောတ်ဍောတ်တံ၊ မၞိဟ်အာယုက်ဇၞော် ဗျုဗျုတံတှေ် ဒးဂွိၚ်ကဵု ပရေၚ် ထတ်ယုက်ညိ၊ ဗီုဇကုကဵုဇကု ဗီုဒှ်ကဵုဒှ်ရ ဒးဂၠာဲကပှ်စမံၚ် မုအရီုအဗၚ်လေဝ် ဟွံမွဲပုဟ်၊ အခိၚ်လအ်တိုန်ညိဂှ်ရ ဒှ်ကၠုၚ်ခက်ခုဲဏောၚ်” သာ်ဝွံ ညးဘိုၚ်ရေၚ်တၠုၚ်မံၚ် ပရေၚ်ပဲါဒဴဘဲပၞာန်ဒေသဂှ်မွဲတၠ ဟီုရ။
ညးဒးဂြိပ်ပဲါဒဴဘဲပေါဲပၞာန် ဒေသကွာန်မွဲဒမြိပ်ဂၠံၚ်ကျာ်ပိကဵု ဇြပ်ဗုဂှ် စတမ်နူကွာန်ယျေဝ်တဂေါန်၊ ကွာန်ဒဵုဂျပါန်၊ ကွာန်လှာၜိုပ် ကော် ကွာန်နာဲခွေ မိယုၚ်၊ ကွာန်စဳပျး၊ ကွာန်ရတ်ယှာန်၊ ကွာန်ရာပ်ဖဝ်၊ ကွာန်တညေန်၊ ကွာန်သမ္မယျာ၊ ကွာန် ဝၚ်ကနာၚ် ကဵု ကွာန်လ္ၚဵု သီုဖအိုတ် ၜိုတ် (၁၀) ကွာန်ပြၚ်ပြၚ်နွံတုဲ ညးဍုၚ်ကွာန်ဒးဂြိပ်ပဲါဒဴဘဲပၞာန်ဂမၠိုၚ်လ္ၚဵု ဂြိပ်ပဲါဗ္ဒဗ္ဒာဲမံၚ် သ္ၚိဒဒှေ်ဒယှ် ကွာန်တၞဟ်တၞဟ်နွံ၊ လ္ၚဵုဂှ် ဂြိပ်ပဲါမံၚ် အကြာကၠအ် အကြာဂူနွံ၊ လ္ၚဵုဂှ် တက်လဝ်တာဲ အကြာဂြိုပ်တုဲ မံၚ် ဒၟံၚ်လေဝ်နွံအိုတ်ရ။
အခိၚ်လၟုဟ်ဂှ် ဟိုတ်နူဂံက်ဂၠိုၚ်မံၚ်တုဲ ညးနွံမံၚ် အကြာကၠအ် အကြာဂြိုပ်လ္ၚဵုတံဂှ် ဒးဒုၚ်စသိုၚ်ဂံက်ဂၠိုၚ်တုဲ ဒးဂွိၚ်ကဵု အန္တရာဲလမျီုလေဝ်နွံရောၚ် ညးဘိုၚ်ရေၚ်တၠုၚ်မံၚ်ဂှ် ထပ်ဟီုရ။
“ရဲဂြိပ်ပဲါမံၚ် အကြာမသ ကလောကောဒေံ အကြာဒဒှေ်ဒယှ် ပ္ဍဲသ္ၚိ ပ္ဍဲဘာလကျာ်တံတှေ် သာညိ၊ ရဲနွံမံၚ်အကြာကၠအ် အကြာဂြိုပ်ဂှ်တှေ် ကောန်ၚာ် မၞိဟ်ဇၞော်ဇၞော်တံ ဂံက်ဂၠိုၚ်မံၚ်တုဲ ဒးဂွိၚ်ကဵု ပရေၚ်ထတ်ယုက် ဖေက်ဒှ်အန္တရာဲ လမျီု၊ ဒေသပ္ဍဲပိုဲဏံဂှ် မုမုဒှ်မံၚ်လေဝ် မၞိဟ်တီအောန်၊ ဂကောံရီုဗၚ်တံလေဝ် ဟွံတီလဝ်ပုဟ်၊ ညးဂွံကဵုပရေၚ်ရီုဗၚ်ဂှ် မွဲဟွံမွဲပုဟ်၊ အာကၠုၚ်လေဝ်ဟွံလောဲပုဟ်” သာ်ဝွံ ညးဆက်ဟီုရ။
ညးဍုၚ်ကွာန်ဒးဂြိပ်ဘဲပၞာန် ဒေသကွာန်မွဲဒမြိပ်ဂၠံၚ်ကျာ်ပိကဵု ဇြပ်ဗုဂမၠိုၚ်ဂှ် သီုဖအိုတ် ၜိုတ် (၁၀) ကွာန်ပြၚ်ပြၚ်ဂှ် ညးဍုၚ်ကွာန်ဗၞတ် (၃၀၀၀) တၠပြၚ်ပြၚ်နွံရောၚ် ညးဒေသတံ ဟီုဂးချိၚ်ဆလဝ်ရ။
0 Comments