ဆေင်ပုင်အလုံတွဵုရးဍုင်မန်မွဲဂှ်ကွဳစက်အာတရဴဇမ္ၚောဲ ညးဇူဒီုတိက်ဗတမ်တံ လုပ်ဇူဒီုမ္ဂး ဒးပလံင်စရင်တေင်ကၟုဲရောင် ဌာနမဆေင်စပ်တံ ကဵုကၠုင်စၞောန်တုဲ ဆေင်ပုင်ဗွဲမဂၠိုင် ရဲအာတရဴဇမ္ၚောဲတံ ဟွံဂံင်တိက်ဇူဂှ်ရ ဟွံဂွံသွံဖျာအိုတ်ရောင် တၠဆေင်သွံပုင်တံ ဟီုလဴထ္ၜးရ။

တုဲကၠုင် ၂၀၂၅ မံက်ဂှ် နူကဵုဌာနဗၠာဲသၟိင်ပွိုင်ဍုင်မဆေင်စပ်တံ ကော်ဆဵုဂဗကဵု တၠဆေင်ပုင်ဂမၠိုင်တုဲ ကဵုကၠုင်ဇြဟတ်ဓရိုဟ် စပ်ကဵုရဲကွဳစက်တရဴဇမ္ၚောဲတံ လုပ်ဇူဒီုတိက်မ္ဂး ညံင်ဂွံဒုင်စဳရေင်ပလံင်စရင်နွံရ။

ဟိုတ်နူဒးဒုင်စဳရေင်ပလံင်စရင် ကုဌာနဗၠာဲသၟိင်တံသာ်ဂှ်တုဲ ညးအာတရဴဇမ္ၚောဲတံ ဟွံဂံင်ဇူဒီုတိက်ဇူပ္ဍဲဆေင်တုဲ ဆေင်သွံပုင် မ္ၚးဍုင်ကီု လတူဍုင်ဗွဲမဂၠိုင်ကီု ပရေင်သွံရာန် အောန်စှ်ေအာအိုတ်ရောင် သ္ဂးရ။

“နူကဵုဍေံ(ကံင်ဇြဳပၞာန်)တံ ကဵုကၠုင်စၞောန် ရဲအာတရဴဇမ္ၚောဲတံ လုပ်ဇီုဒီုတိက်ဗတမ် ဒးဒုင်စဳရေင်ပလံင်စရင် တေင်ကၟုဲ တုဲဂှ် ပ္ဍဲဖျာသွံပုင်တံ သီုဖျာဖအိုတ်ရ၊ ရဲအာတရဴတံ ဟွံဂံင်လုပ်ဇူဒီုရ ဇူဏောင်တှ်ေ ဒးပလံင်စရၚ်၊ အခိင်ဟွံရုဲ ဍေံစၟဳစၟတ်မာန်မံင်၊ ဍေံဒှ်သံသယတှ်ေ ဍေံကော်ရပ်ဏာဏောင်၊ ဟိုတ်နူဂှ်ရ ရဲအာတရဴတံဖေက်လကိုတ်တုဲ ဟွံဂံင်လုပ်ဇူပ္ဍဲဖျာရ” တၠဆေင်ပုင် မ္ၚးဍုင်မတ်မလီု မွဲတၠ ဟီုထ္ၜးရ။

ပ္ဍဲဆေင်ပုင်မ္ရးဍုင် ပ္ဍ္ဍဲဍုင်ဗွဲမဂၠိုင်တံဂှ် ဗွဲကြဴနူပၞာန်သီအဝဵုတုဲ တ္ၚဲသဝ် တ္ၚဲပၠိုတ်တိုန်ညိမ္ဂး ကၟာတ်လဝ်ပရေင်အာတရဴကီု၊ ဟိုတ်နူအကာဲအရာဟွံခိုဟ်တုဲ တၠကွဳစက်အာတရဴဇမ္ၚောဲတံ ဟွံဂံင်ဆက်အာကီုတုဲ ဆေင်ပုင်ဇၞော်ဇၞော် မ္ၚးဍုင်ဂှ် လုပ်ဇူဒီု တိက်ဗတမ် ပ္ဍဲဆေင်ပုင်ဗွဲမဂၠိုင်တံ နွံကၠုင်ရ။

အလုံဍုင်မွဲ အကာဲအရာပရေင်ဍုင်ကွာန် ပရေင်ပေါဲပၞာန်ထတ်သ္ကာတ်မြဟ်ကၠုင်တုဲ သၞာံ ၂၀၂၄ အိုတ် ၂၀၂၅ မံက်ဏံဂှ် သကုတ်ဒေသအဒေါဝ်ဂြိုဟ်ဍုင်တံကီု၊ သကုတ်ဒေသဍုင်မန်ဏံကီု၊ ဂကောံပၠန်ဂတးဂမၠိုင်တံ ချဳဒရာင်သၠုင်တိုန်အသိင်ပရေင်ပၞာန်တုဲ ပရေင်စဵုဒၞာကၟာတ်လဒဵု အခေါင်အရာ ညးဍုင်ကွာန် ရဲအာတရဴတံလေဝ် ဒှ်ကၠုင်ပရေင်ဆိုအ်ဗကီုရ။

“ပ္ဍဲဆေင်ပုင်တံဂှ် ကၠာတေံဟီုတှ်ေ စှ်ေအာအခိုက်ဗီုကဵု ရဲအာတရဴတံ လုပ်ဇူဒီုဗွဲမဗၠးၜးမွဲ ဟီုစဂွံ၊ မုပရောဟီုတှ်ေ ရဲအာ တရဴဇမ္ၚောဲတံဂှ် တ္ၚဲပၠိုတ်အခိင်အာတရဴအိုတ်အာတှ်ေ ဒၞာဲစိုပ်ဂှ် ဒၞာဲဇူရ၊ တုဲပၠန်တှ်ေ ဍုင်ကွာန်ဟွံၜိုဟ်ဒှ်ကၠုင်ဟဏံတှ်ေ ဒၞာဲလဵုဂွံဇူ ဂွံတိက်ဗတမ်ဂှ် တၠကွဳစက်တံဂှ်တှ်ေ ဆေင်ပုင်ဍေံတံ စှ်ေစိုတ် ဍုက်ကေဝ်ကဵုဍေံတံဂှ် ဒေါံဇူတုဲတှ်ေ ရဲအာတရဴတံဂှ် လုပ်ရာန်စပုင်ပ္ဍဲဆေၚ်ဂှ်ဏောင်၊ တၠဆေင်ပုင်တံတှ်ေ ကဵုဒၞာဲ ကဵုကၟုဲတံ တိက်ဇူဒီုဏောင် ဗီုဏံဂှ် စှ်ေအာအခိုက် ဆေင်ပုင်တံ ဇၟာပ်ဆေင်ပုင်တံရ၊ လၟုဟ်ဏံဂှ် ဍေံ(ကံင်ဇြဳပၞာန်)တံ ကၟာတ်လဒဵုထောံ ဒးကဵုစရင်ဏောၚ်၊ ဒးတေင်ကၟုဲဏောင် ဗီုဂှ်ဒှ်ကၠုင်တှ်ေ ရဲအာတရဴတံဂှ် ဟွံဂံင်ဇူအိုတ်ရ၊ ရဲအာတရဴတံ ဟွံလုပ်ဆေင်တှ်ေ ဆေင်ပုင်တံဂှ် ဟွံဂွံသွံ” တၠဆေင်ပုင် နွံမ္ၚးဍုင်ရေဝ် မွဲတၠပၠန်ဂှ် ဟီုရ။

ပ္ဍဲဆေင်ပုင်တံဂှ် နကဵုစၞောန်ပၟိင် ကံင်ဇြဳပၞာန်တံတုဲ ဟိုတ်နူညးအာတရဴဇမ္ၚောဲတံ ဟွံဂံင်တိက် ဇူဗတမ်ဂှ်ရ ပရေင်သွံဖျာ သဝ်စှ်ေအာကဝက်ပြင်င်တုဲ ပ္ဍဲဆေင်ပုင်တံ လ္ၚုကှ်အိုတ်ဇတ် ကရောတ်မံင်ဗီုညးကဵုညးအိုတ်ရောင် ဂွံတီကေတ်ရ။