ညးဍုင်ကွာန်နွံတန်တဴဒၟံင် ပ္ဍဲမုက်ဒပ်မၠံက်ဇၞော်ကံင်ဇြဳပၞာန်ဗၟာတံဂှ် ဟိုတ်နူမကမ်မၠံက်ဇၞော်ဒတုံဒးတုဲ ကတဵုဒှ်မံင်ဘဲအန္တရာဲ၊ ဒးပံင်မံင်လမျီုဘဲမကမ်မၠံက်ဇၞော်ရောင် ညးဒေသတံ ဟီုရ။

ဗွဲကြဴနူကဵုဒပ်အမၠံက်ဇၞော်ကံင်ဇြဳပၞာန်ဗၟာတံ သၠုင်ပတိုန်အသိင်ပန်မၠံက်ဇၞော်ဂှ်တုဲ နူကဵုဒပ်မၠံက်ဇၞော်ဇၟာပ်ပွိုင်ဍုင်တံ ပန်ထဍိုင်မံင်လွဟ်မၠံက်ဇၞော်နွံဇၟာပ်တ္ၚဲဂှ်ရ ညးဍုင်ကွာန်နွံတန်တဴဒၟံင် ပ္ဍဲကဵုမုက်ဒပ်အမၠံက်ဇၞော်တံ ကတဵုဒှ်အန္တရာဲ ဂၠိုင်တိုန်မံင်ရောင် ညးဒေသရေဝ်သၟဝ်ကျာမွဲတၠ ဟီုရ။

“လၟုဟ်တှ်ေ နူကဵုဒပ်မၠံက်ဇၞော်တံ ပန်ထဍိုင်ဏာမံင် မၠံက်ဇၞော်ဂၠိုင်တိုန်၊ ကြပ်အရိုဟ်တ္ၚဲရ ဟီုစဂွံ၊ ဆဠတှ်ေ ပန်မံင် ကၠိုဟ်တ္ၚဲလေဝ်နွံ၊ ညးဍုင်ကွာန်တံဂှ်တှ်ေ ပ္ဍဲမုက်ဒပ်မၠံက်ဇၞော်ဍေံ(ကံၚ်ဇြဳပၞာန်)ဂှ် ကွာန်လေဝ်နွံ၊ ဗွဲမဂၠိုင်တှ်ေ ရဲကၠအ် ရဲကၠောန်ကၠအ် နွံမံင် ဇၟာပ်ကွာန်ရ ဟီုဂွံ၊ ဒေသရေဝ်ပိုဲဏံတှ်ေ ရဲကၠအ်ဖအိုတ်ရ ဟီုကြပ်ဂွံမံင်၊ အခိင်ထၜိုတ်တှ်ေ ခွါတ်ထၜိုတ်၊ အခိၚ်သတ်ဆုတှ်ေ သတ်ဆု နွံပ္ဍဲကၠအ်သၟးဂၠိုင်၊ ကၠအ်ဗွဲမဂၠိုင်ဂှ်လေဝ် နွံမံင်ပ္ဍဲမုက် ဒပ်မၠံက်ဇၞော်တံဂှ် သၟးရ ဂၠိုင်၊ ဒပ်မၠံက်တံလေဝ် ပန်ထဍိုင်ဏာမံင် မၠံက်အရိုဟ်တ္ၚဲ ညးဍုင်ကွာန် နွံၚ်ဗမံက်ဂၠံၚ်ကာတံကီု၊ ညးဍုင်ကွာန် ကၠောန်နွံ ပ္ဍဲကၠအ် ဗမံက်ဂၠံင်ကာတံကီုဂှ်တှ်ေ ဒးပံင်မံင်လမျီု ကဵု ဘဲကမ်မၠံက်ဇၞော်အရိုဟ်တ္ၚဲရ” သာ်ဝွံ တၠကၠအ် ကၠောန်မံင်ကၠအ် ထၜိုတ် ဒေသရေဝ်သၟဝ်ကျာ မွဲတၠ ဟီုရ။

ပ္ဍဲဒေသဍုင်မန်ဝွံ ကြဴနူကဵုဂကောံဒပ်ပၠန်ဂတးမန်တံ ပံင်ကောံချဳဒရာင်ပန်ဗတိုက်ကၠုင် ကံင်ဇြဳပၞာန်တံ သၞာံတုဲကၠုင် ၂၀၂၄ ဖာလက္ကရဴဏံတုဲ နူကဵုဒပ်မၠံက်ဇၞော်ဖျေံသဇိုင်ပ္ဍဲဒေသဍုင်မန်ဂမၠိုင် သၠုင်ပတိုန်အသိင် ပန်ထဍိုၚ်မၠံက်ဇၞော် ဇၟအ်အ်ဒပ်ကီုရ။

ဟိုတ်နူဒပ်မၠံက်ဇၞော်တံ သၠုင်ပတိုန်အသိင် ပန်ထဍိုင်မၠံက်ဇၞော်ဇၟအ်အ်ဒပ်ဂှ်တုဲ ညးဍုင်ကွာန် ကွာန်နွံတန်တဴမုက်ဒပ်တံကီု၊ ညးဍုင်ကွာန် နွံတန်တဴပ္ဍဲအကြာကၠအ် အကြာဂူတံကီု ကတဵုဒှ်ဘဲအန္တရာဲ ဂၠိုင်ကၠုင်မံင်ရ။

“ဒေသအကြာဂၠံင်ကျာ်ပိ ကဵု ဇြပ်ဗုဂှ်တှ်ေ ကွာန်ဂှ် ၜိုတ် ၁၀ ကွာန်ပြင်င်၊ ကၠအ်ထၜိုတ်တှ်ေ အောန်အိုတ် ၂၀၀၀ ကဵု ၃၀၀၀ ဨက ဒှ်အာမုက်မၠံက်ဇၞော်ဍေံ(ကံင်ဇြဳပၞာန်)တုဲတှ်ေ ညးဍုင်ကွာန်တံဂှ် ဒးပြံင်ဆုဲ၊ ကၠအ်ထၜိုတ်တံဂှ်တှ်ေ ဟွံဂွံခွါတ်ထၜိုတ်၊ အကြာဂှ်တှ်ေ ညးဍုင်ကွာန်တံ ကတဵုဒှ်ဘဲအန္တရာဲ ဘဲလွဟ်ဇၞော် ၜိုတ် ၁၀ တၠ ကဵု ၁၀ တၠပြင်င်ဒှ်၊ လ္ၚဵုတှ်ေ ချိုတ် လ္ၚဵုတှ်ေ ဒးဝပ်၊ ဖအိုတ်ဂှ်တှ်ေ ပ္ဍဲသၞာံ ၂၀၂၄ အကြာ အံက်တိုဝ်ဗာ၊ နိုဝ်ဝေမ်ဗာ ကဵု ဒဳဇြေမ်ဗာ ဒးဂၠိုင်” တၠကမၠောန်ကၠောန်ကၠအ်ထၜိုတ် ဒေသ ဂၠံင်ကျာ်ပိ ဇြပ်ဗု မွဲတၠ ဟီုရ။

နူကဵုဒပ်မၠံက်ဇၞော်တံဂှ် ဗွဲမဂၠိုင် ဖျေံလဝ်တမ်ဒပ်ပလိုတ်ဂၠံၚ်ကွဳစက်ဇၞော် ဒေသဍုင်မန် ဇၟာပ်ပွိုင်ဍုင်တုဲ လဆောဝ်မ္ဂး ဒှ်ပေါဲဗတိုက်တုဲ ပန်ထဍိုင်ဏာမၠံက်နွံ၊ ဗွဲမဂၠိုင်မ္ဂး ဂွံပရိုင် ရဲပၠန်ဂတးတံချဳဒရာင်တုဲ ပန်ထဍိုင်ဏာနွံ၊ လဆောဝ်မ္ဂး ထေင်ခယျတုဲ ပန်ထဍိုင်ဏာ မၠံက်ဇၞော်လေဝ်နွံရ။

ပရေင်ပန်ထဍိုၚ်မၠံက်ဇၞော်ဂှ် စကၠုၚ်နူ သၞာံ ၂၀၂၄ လ္ဒောဝ်သၞာံတုဲ ဒပ်မၠံက်ဇၞော်မၞုံပ္ဍဲဒေသဍုင်မန် သီုဖအိုတ်ဂှ် ဂွံလဝ်စၞောန်ပၟိင် သွက်ဂွံသၠုင်ပ္တိုန်အသိင်ပန်လွဟ်ဇၞော် ဇၟာပ်ဒပ်ရ။ ဆဂှ်ဟွံက တမ်ဒပ် (ခလရ) (ခမရ) ဒပ်ပ္ကတ်ပကေင်ပၞာန်တံ ဒပ်ဇၞော်ဇၞော်လ္ၚဵုဂှ် သီုကဵုထပ်လဇံက်လဝ် မၠံက်ဇၞော် မပ္တံကဵု ၁၂၀ မမ၊ ၁၂၂ မမ၊ နွံ၊ ဗီုကဵု ဒပ်ဇၞော်ဇၞော် လ္ၚဵုဂှ်မ္ဂး သီုကဵု ထပ်လဇံက်လဝ် ကမ်သၠောဝ်မေတ်ဇြာဲ (မစ်ဇိုၚ်းဒုံး) လေဝ်နွံကၠုင်ရ။

ဒပ်အမၠံက်ဇၞော်လၟိုန် ပ္ဍဲတိဍာ်ဍုင်မန်ဂှ် ဒပ်အမၠံက်ဇၞော် စၟတ် ၃၁၃ လဇံက်လဝ် ပ္ဍဲကျာ်တၟံ ဍောတ်(ကျောက်တလုံး ဗမံက်ဍုင်မုဟ်ဍုင်၊ ဒပ်အမၠံက်ဇၞော် စၟတ် ၃၁၈ ဗမံက်ကွာန် အၜေတ် ပွိုၚ်ဍုင်မုဟ်ဍုင်၊ စၟတ် ၃၁၅ ပ္ဍဲပွိုင်ဍုင်ဇြပ်ဗု ပလိုတ်ကွာန်ဝါကလဳ၊ ဒပ်မၠံက်ဇၞော် စၟတ် ၃၁၇ ပလိုတ်ကွာန်တၟိကုန်ဗဴ ပွိုင်ဍုင်ရေဝ်သၟဝ်ကျာ၊ ဒပ်မၠံက်ဇၞော် စၟတ် ၃၁၆ ပ္ဍဲပါင်ကွာန်ကလအ် ပွိုင်ဍုင်ရေဝ်သၠုင်ကျာ စတမ် သၠုင်ပတိုန်အသိင် ပန်ထဍိုင်မံၚ်လွဟ်မၠံက်ဇၞော် ဇၟာပ်အခိင်နွံရ။

ကာလပၞာန်တ္ၚဲဏံဂှ် ဟိုတ်နူ လ္ပာ်ဒပ်ကံင်ဇြဳပၞာန်တံ ဇြဟတ်ထပက်ကရောင်ပၞာန် ဍိုန်လျစှ်ေကၠုၚ်ဂှ်ရ စၞးကရောင်ပၞာန်ထပက်ဂှ် စကာကၠုင်ဒပ်အမၠံက်ဇၞော်တံ ပန်ထဍိုင် သ္ပမံင်စၞး ပရေင်ထပက်ပၞာန် ဒုင်ပၞာန်ရ။

နူကဵုကံင်ဇြဳပၞာန်တံ လုပ်ထပက်စၞး (အဇာ) ကရောင်ပၞာန်ထပက် နကဵုဒပ်အမၠံက်ဇၞော် ဇၟအ်အ်ဒပ်ဂှ်ကီု စကာဒပ်ပၞာန်ကျာ (က္ၜင်ကျာပၞာန်) ကေုာံ စက်ဗရုသာဲ (ဒရုင်) တုဲ ကဵုပန်ဂြာတ်ဖျေံမံင် မခတိုဟ်ဂမၠိုင်ကီုဂှ်ဝွံ သွက်ဂကောံပၠန်ဂတးတံ သွက်ဂွံချဳဒရာင်ပၞာန်၊ သွက်ဂွံသၠုင်အသိင်ပရေၚ်ဗတိုက်ပၞာန်ဂှ် ဒှ်မံင်တင်ကော်ဆဴမွဲရောင် ဂွံတီကေတ်ရ။