တ္ရဲကောန်ဂကူမန် မရနုက်ကဵု ၇၈ ဝါ အလုံပွိုင်ဍုင်ရေဝ်ဂှ် ပ္ဍဲသၞာံဏံ ကၠောန်အာပ္ဍဲဌာနဇြပ်သ္ဘင်ဓရ်မန် လ္တူဍုင်ရေဝ်ဏောင် ဂွံတီကေတ်ရ။
“ပွိုၚ်ဍုင်ရေဝ်ပိုဲဂှ် အတိုင်လၟေင်ကမၠောန်ဟီုတှ်ေ ပိုဲတံပါ်ကရေက်လဝ်ဒေသ နွံမံင် ၅ ဒေသရ။ မွဲသၞာံတှ်ေ မွဲဒေသ ဂေတ်အလန်တုဲ ကၠောန်အာမံင်ရ။ သၞာံလောန်ကၠုင်တေံ ကၠောန်လဝ်ဒေသရေဝ်သၠုင်ကျာ ပ္ဍဲကွာန်ကလအ်ရ။ သၞာံဏံဂှ်တှ်ေ ဒးအလန်ဒေသကၞောတ်ၜဳရေဝ်တေံတုဲ ရန်ဖျေံလဝ်ဗီု သွက်သ္ဂောံကၠောန်အာ ပ္ဍဲကွာန်ဝါဗိုင်နွံရ။ ဆ္ဂး အခိင်ကြပ်ကၠုင်ဏံ ဟိုတ်နူဒေသဂှ် ပေါဲဗတိုက်ဒှ်ဆက်ကၠုင်တုဲ ဒးပြံင်လှာဲထောံ အစဳအဇန် လုပ်ကၠောန်ပ္ဍဲဍုင်ရေဝ်ရ” သာ်ဝွံ ညးမဒှ်ဖက်ဆောညးအုပ်ကာ(၁) ဂကောံဖန်ဇန်တ္ရဲကောန်ဂကူမန် အလုံပွိုင်ဍုင်ရေဝ် နာဲအံက်သာ ဟီုထ္ၜးရ။
ပ္ဍဲကဵုပုဟ်(၇)စွေက် ဂျာန်ဏဝါရဳ ၂၀ အခိၚ်တ္ၚဲစေင်ဂှ် ဂကောံဖန်ဇန်တ္ၚဲကောန်ဂကူမန် အလုံပွိုင်ဍုင်ရေဝ်တံကီု၊ သင်နာယက လ္တူဍုင်ဂမၠိုင်ကီု သီုကဵုဂကောံမန်မၞုံလ္တူဍုင်ရေဝ်တံ ကၠောန်သ္ပကောံဓရီု ချပ်ဂၞန်စ ပ္ဍဲဌာနဇြပ်မန် လ္တူဍုင်ရေဝ်တုဲ ဖျေံဏာလဝ်သ္ဂုတ်သွာတ် ပ္ဍဲသၞာံဏံ ကၠောန်အာပ္ဍဲကဵုဇြပ်သဘင်ဓရ်မန် လ္တူဍုင်ရေဝ်ရ။
“ဟိုတ်နူအကာဲအရာပရေင်ဍုင်ကွာန်တုဲ ကၠောန်အာဆအယာံမာတ် လၟေင်ဟွံဂွံလီုဓဝ်ရ။ ညးဍုင်ကွာန်တံဟလိုင် ဒှ်မံင်ဒဒိုက်ဂှ် ပိုဲတံမိပ်မံင်ကဵုပေါဲသဘင် အိုတ်အစောန်ညံင်ဟွံဂွံဒှ် ၝဏံလေဝ် ပိုဲဒးရံင်ကီုဏောၚ် ဟိုတ်ဂှ်ရ ဘိက်လဝ်ကောံဓရီုလေဝ် မၞိဟ်တိုန်စိုပ်ဟွံစုင်ရ။ ဒက်လဝ်ကမ္မတဳဂှ်လေဝ် ရုဲစှ်လဝ် မၞိဟ်နွံလ္တူဍုင်တံသၟးရ။ အခိင်လၟုဟ်ဂှ် အာကၠုင်လေဝ် ဟွံၜိုဟ်သိုဟ် ဟွံပြေပြံင် ဟိုတ်ဂှ်ရ ကၠောန်အာလ္တူဍုင် ဆၜိုတ်လၟေင်ဟွံဂွံလီုအာရ” သာ်ဝွံ ညးအုပ်ကာနာနာ နာဲဒေန်ယှိင် ဂကောံဖန်ဇန်တ္ၚဲကောန်ဂကူမန် အလုံပွိုင်ဍုင်ရေဝ် ဟီုထ္ၜးရ။
တ္ၚဲကောန်ဂကူမန် အလုံပွိုင်ဍုင်ရေဝ်ဂှ် ဒက်ပတန်လဝ် ဂကောံဖန်ဇန် တ္ၚဲကောန်ဂကူမန်နွံတုဲ ဂကောံဂှ် မၞုံအာယုက်ပွိုင် ၅ သၞာံရ။ ဂကောံဖန်ဇန် တ္ၚဲကောန်ဂကူမန်ဂှ် ချူဓဇက်လဝ်သၞောဝ်နွံရ။ ပ္ဍဲသၞောဝ်ဂှ် အလုံပွိုင်ဍုင်ရေဝ်မွဲ ပါ်ကရေက်လဝ် ၅ ဒေသတုဲ မွဲသၞာံမ္ဂး မွဲဒေသ ဒုၚ်သ္ဇိုင်တုဲ မ္ဒးကၠောန်ဗဒှ်အာ တ္ၚဲကောန်ဂကူမန်လၟေင်င်ရောင် ဂွံတီကေတ်ရ။
