တ္ရဲဏအ် (ဂျာန္နဝါရဳ ၂၃) ဖါနူဂယး အခိင်ၜိုတ် ၈ နာဍဳပြင်င်ဂှ် အကြာဒပ်ပၠန်ဂတးတအ်ကဵု ဒပ်ကင်ပၞာန်ဗမာ ခလရ – ၃၁ မၞုံဍုင်ခေါဇာတအ် ဒှ်ပေါဲဗ္တိုက်ဆေင်မုက်ညးသ္ကအ် ဗၞတ်မွဲချိုန်ခဏရောင် ဂွံတီကေတ်ရ။
ဒပ်မင်ကင် နူတမ်ဒပ်ပၞာန်ဗမာ ခလရ – ၃၁ တအ်ဂှ်ဝွံ ဖျေံလဝ်ဒၞါဲ တၞုင်ဍုင်ခေါဇာ ဒၞါဲကုန်ကျာ် ဂၠံင်တိတ်အာပါ်ကွာန်ကြုင်ကညာဂှ်တုဲ စၟဳစၟတ်၊ ကရေပ်ဂရတ်ကေတ်ဒၟံင်သြန် ရဲကွာ်တရဴ မပ္တံကွဳလိုန်ဓါတ်၊ ကွဳစက်တအ်ရ။
“ပိုယ်တိတ်အာနူခေါဇာဏအ်တှ်ေ ၜက်အာ (တပ်ရင်း ၃၁) ဍေံ၊ ကၠာဂွိုအ်စိုပ်ဒပ်အၜံင်ဂှ်တှ်ေ ကုန်နွံမံင်မွဲကုန်၊ အဵုဍေံတအ် ဖျေံလဝ်ကင်အကြာကၠအ်တအ်ဂှ်၊ ဒှ် (ပန်) ဂှ် နူဂယးဏအ် ၜိုတ် ၈ နာဍဳ ၁၅ မိဏေတ်ဟာ အကြာဂှ်ရ” သာ်ဝွံ ကောန်ဍုင်ခေါဇာမွဲတၠ ဟီုထ္ၜးရ။
အတိုင်ပရိုင်မတိတ်ကၠုင်နူကဵုတမ်ဒပ် ခလရ-၃၁ မ္ဂး ပ္ဍဲကဵုဒှ်ပေါဲဗ္တိုက် လအ်ပွိုင်ကဵုမိဏေတ်ဂှ် လ္ပာ်ကံင်ဇြဳပၞာန်ဗမာ ဒးအာဝပ်မွဲတၠရောင် ညးဆက်ဂးလဝ်ရ။
ကြဴနူဒှ်ပေါဲဗ္တိုက်ဆေင်မုက်ဂှ်တုဲ နူကဵုတမ်ဒပ် ခလရ-၃၁ ဍုင်ခေါဇာ ပန်ထဍာင်ပ္တိတ်မံင် လွဟ်ဇၞော်၊ လွဟ်ဍောတ် စဵုကဵုဗ္ဒါဲ ၁၀ နာဍဳ ဖါနူဂယးဏအ်ရောင် ဂးရ။
“ပြဟ်ဟ်ဏအ်ဂှ်တှ်ေ သ္ရိတ်မံင်၊ ရဲကွာန် (ခေါဇာ) ပိုယ်လ္ရဵုတအ်ဂှ်တှ်ေ ဂြိပ်အာမံင်ပါ်ကွာန်ဆင်ဂူတအ် မုတအ်ဂှ် ဍေံနွံ” သာ်ဝွံ ကောန်ဍုင်ခေါဇာဂှ် ဆက်ဟီုရ။
ဆက်စပ်ကဵုပေါဲဗ္တိုက်ဏအ်တုဲ ဒပ်ပၠန်ဂတးလဵု ပါလုပ်ဂှ် သ္ပဒ္တန်ဟွံဂွံဏီရ။
