ဗွဲကြဴနူကဵုဂကောံပၠန်ဂတးမန်ဂမၠိုင် ပံင်တောဲချဳဒရာင်သၠုင်တိုန်အသိင်ပေါဲပၞာန်ဂှ်တုဲ လ္ပာ်ဒပ်ပၞာန်ဗၟာကံင်ဇြဳပၞာန်တံ ဒပ်သၞေဟ်ကင်ဂမၠိုင်၊ ဗဒိုပ်ယာယဳဖျေံလဝ်တၟိဂမၠိုင် သိုင်ခၞံပခိုင်ကၟောန်ပတိုန်တုဲ ဗက်ကေတ်မံင် ကပေါတ်သိုင်ခၞံ နူ ညးဍုင်ကွာန်တံရောင် ညးဒေသတံဟီုရ။
“ဆု ကီု ဒုန်ကီု တိဗဳလာတ်ကီု ပသဲကီု သွက်ဍေံ (ကံင်ဇြဳပၞာန်ဗၟာ) ဂွံသိုၚ်ကၟောန်ပတိုန် ဒပ်ကင်ဍေံ၊ ဗဒိုပ်ဍေံ သိုင်လဝ်တၟိတဂှ်တုဲ ဗက်အာတ်ကေတ်မံင် ကပေါတ်သိုင်သ္ၚိပ္ဍဲအကြာ ရဲသိုင်သ္ၚိ၊ ရဲသိုင်ဘာတံ မွဲဏှေအ်မွဲဏှေအ်” သာ်ဝွံ ဒါယကာဘာ သိုင်ပတန်ဒၟံင်ဘာလကျာ် နူကွာန်မၞုံဒေသရေဝ်သၟဝ်ကျာမွဲတၠ ဟီုလဴထ္ၜးရ။
စတမ်နူသၞာံ ၂၀၂၅ မံက်တုဲဂှ် ဒပ်ကင်မၞုံမွဲဒမြိပ်ဂၠံင်ဇၞော်၊ ဂၠံင်ဍောတ်တ်ဂမၠိုင်ကီု၊ ဗဒိုပ်ဖျေံလဝ်အကြာကွာန်ဂမၠိုင်ကီု၊ တမ်ဒပ်ပွိုင်ဍုင်နာနာတံဂှ်ကီု သွက်ဂွံထပ်ပခိုင်ကၟောန်ပတိုန်ပၠန်ဂှ်တုဲ နကဵုကံင်ဇြဳပၞာန်ဗၟာတံ အာတ်မိက်ကေတ် ဗီုပြင်အကံက် ပ္ဍဲသၞေဟ်ကင်၊ ပ္ဍဲအကြာညးဍုင်ကွာန် မသိုင်ခၞံမံင် ကျာ်ဘုတ်၊ ဘာ၊ သ္ၚိဌာန်တံ နွံကၠုင်ရ။
ဗီုကဵုဒပ်ကင်မွဲဒမြိပ်ဂၠံင်ကွဳစက်ဇၞော် မတ်မလီု-ရေဝ်ဂှ် တုဲကၠုင်တေံမ္ဂး သိုၚ်လဝ်နကဵုဆုစဵုကၟာင်လဝ် တိစုတ်လဝ် ကဵုရိုက် ဓမ္မတာရဂှ် လၟုဟ်မ္ဂး ဖေက်မကမ်မၠံက်ဇၞော် ရဲပၠန်ဂတးတံ ထောံဖျေံနကဵုဒရုင်ဂှ် သွက်ဂွံစဵုဒၞာတုဲ ဒပ်ကင် ပၞာန်ဗၟာတံဂှ် ထပ်သိုင်ပခိုင်လဝ် နကဵုတၟံ၊ တိဗဳလာတ် ဗီုပြင်ကောန်ကရေတ် တီုတီုအိုတ်ရ။
“ဒပ်ကင်မွဲဒမြိပ်ဂၠံင်ဇၞော်ဂှ်တှ်ေ ဍေံတံဖေက်ဒရုင်တုဲ ထပ်သိုင်တၟိ နကဵုတၟံ တိဗဳလာတ် သီုကၟဳလဝ် သီုစဵုလဝ် တီုတီု ဗီုပြင်ဂှ်ဖအိုတ်၊ စုက်ကဵုကွာန်တှ်ေ ဗက်အာတ်ကေတ် အကြာညးဍုင်ကွာန်၊ ကွဳစက် ဖ္ဍိုက်လဝ် တၟံ တဳဗဳလာတ် ပသဲတှ်ေ ဍေံတံအာတ် ဗီုအကံက် ဒးကဵု၊ ဇၟာပ်ကွဳစက်တတ်အာတှ်ေ ဒးကဵုမံင်ဖအိုတ်ရ” သာ်ဝွံ တၠကွဳစက် လိင်ဇက်ဖ္ဍိုက် ကပေါတ်သိုင်သ္ၚိ ရေဝ်-ဇြပ်ဗု နူရေဝ်သၟဝ်ကျာမွဲတၠပၠန်ဂှ် ဟီုထ္ၜးရ။
မွဲကာလဏံဂှ် ဒပ်ကင်ကံင်ဇြဳပၞာန်တံ လတူဂၠံင်ဇၞော်ဂမၠိုင်တံကီု၊ ဗဒိုပ်ဖျေံလဝ်တၟိလ္ၚဵုတံကီု ဂကောံပၠန်ဂတးတံ ထောံ ဖျေံမခတိုဟ် နကဵုဒရုင် ကတဵုဒှ်ကၠုင်မွဲဏှေအ်မွဲဏှေအ်ဂှ်ရ ဒပ်ကင် ကေုာံ ဗဒိုပ်ဖျေံလဝ်တၟိဗွဲမဂၠိုင်ဂှ် နူကဵုသိုင်လဝ် ဗီုပြင်ယာယဳဂှ် သွက်ဂွံစဵုဒၞာ မခတိုဟ်နူဒရုင်တုဲ ထပ်သိုင်ပလေဝ်ပ္တိုန် နကဵုဗီုပြင်တိုက် ကောန်ကရေတ်တုဲ ကပေါတ် သိုင်ခၞံတံဂှ် နဲဇကုကဵုဇကု ဒးဖန်ဂၠာဲကေတ်ကေတ်ဂှ်ရ ကံင်ဇြဳပၞာန်ဗၟာတံ ဗီုဂွံဂှ် အာတ်ကေတ်မံင် ပ္ဍဲညးဍုင်ကွာန်တံ နဲနာနာသာ်ရောင် ဂွံတီကေတ်ရ။
