လဂွံကဵုသၞောဝ်ဥပဒေ ညးဍုင်ကွာန်တံ ဇၟာပ်အာယုက်စိုပ် ဒးလုပ်ယိုက်ဂၠေင်သ္ပကောန်ပၞာန်ဗၟာဂှ် အုပ်ဓုပ်ကွာန်တံ နဲကဲညးကဵုညး ကၠတ်ဗက်မံင်ဩန်တုဲ ဂၠာဲလိင်ဗပေၚ်စုတ်လဝ်မၞိဟ် စၞးကွာန်နွံ ရောင် ညးလုပ်ဂကောံအုပ်ဓုပ်ကွာန် ပွိုင်ဍုင်ရေဝ်သၟဝ်ကျာ မွဲတၠ ဟီုလဴထ္ၜးရ။
“ဗီုကဵုကွာန်ဒေသပိုဲတှ်ေ ဂွံဂၠာဲမၞိဟ်သ္ပကောန်ပၞာန်ပ္ဍဲကွာန်ဂှ် ကေတ်မၞိဟ်ဟွံဂွံပုဟ်၊ ဍေံတံ (အုပ်ဓုပ်ကွာန်) လေဝ် ဟွံဂရတ်ပုဟ်၊ ဆဂး စၞးကောန်ကွာန်ဂှ်တှ်ေ ဍေံတံဂၠာဲလိင်စုတ်မၞိဟ်စၞး၊ ဇှ်တှ်ေ ဍေံကၠတ်ဗက်ကေတ်ဩန် ပ္ဍဲညးဍုင်ကွာန်လၟေင်ဂိတုနွံ၊ ဗက်ဩန်ပ္ဍဲကွာန်လေဝ် ဍေံ (အုပ်ဓုပ်ကွာန်) တံ ဟွံမိက်ကဵု ပရိုင်တိတ်အာမ္ၚးပုဟ်၊ ဖေက်ရဲမ္ၚးတံ တီစုတ်အာ” သာ်ဝွံ ညးလုပ်ဂကောံအုပ်ဓုပ်ကွာန် ရေဝ်သၟဝ်ကျာဂှ် ဟီုထ္ၜးရ။
ပ္ဍဲကဵုလိင်စုတ်မၞိဟ်စၞး သွက်ဂွံလုပ်သ္ပကောန်ပၞာန်ဗၟာ စၞးကွာန်ဂှ် မွဲသ္ၚိမ္ဂး မွဲဂိတု ၅၀၀၀ နွံ၊ မွဲဂိတု ၁၀၀၀၀ နွံ ဗက်မံင်လၟေင်ဂိတုတုဲ ဒးလိင်စုတ်မၞိဟ်ကေတ်တာလျိုင်သ္ပကောန်ပၞာန်ဗၟာ စၞးကွာန်တံဂှ် ပညဳကဵု ညးတာလျိုင်တမ်ဒပ်ဒေသတံတုဲ လိင်စုတ်ဂကူဗၟာ သၟာကမၠောန်ဆုဲပြံင်ဂမၠိုင်ရ။
“ဒးလိင်မၞိဟ်သ္ပကောန်ပၞာန်စၞးကွာန်ဇကုဂှ်တှ်ေ မွဲတှ်ေ ဒးကဵုရောင် ၜိုတ် ၃၀ ကိုဋ်၊ ယဝ်ဍေံနွံကဵုအိန်ထံင်တှ်ေ သွက်အိန်ထံင်ဍေံဂွံစသုင်ဂှ်လေဝ် ရဲကွာန်ပၠန်ရ ဒးကေတ်တာလျိုင်၊ ဒေသရေဝ်ပိုဲဏံတှ်ေ ကွာန်ညးကဵုညး ဖန်မံင် နဲညးကဵုညးဖအိုတ်ရ၊ ကွာန်လဵုလေဝ် ပါဲဟွံဗၠးပုဟ်၊ ဆဂး ပရိုင်မံက်ကဵု ဟွံမံက်ရနွံ” သာ်ဝွံ ညးဆက်ဟီုထ္ၜးရ။
ကိစ္စလိင်စုတ်မၞိဟ်စၞး သွက်ဒးကေတ်တာလျိုင် သ္ပကောန်ပၞာန်ဗၟာကွာန်ညးကဵုညးဂှ် နကဵုကောန်ကွာန်တံ ဟွံဒးကေတ်တာလျိုၚ်သ္ပကောန်ပၞာန်တှ်ေတုဲ ဩန်သွက်ဒးကဵုလၟေင်ဂိတု ၅၀၀၀၊ ၁၀၀၀၀ ဂှ် ကောန်ကွာန်တံ ဟွံဇြိုင်စိုတ်ရောင်ဂှ်လေဝ် ဆက်သ္ဂးရ။
ပ္ဍဲဒေသဍုင်မန်ဂှ် ဇၟာပ်မၞိဟ်အဝဲစိုပ် (၁၈ သၞာံ) ဇၟာပ်ဍုင် ဇၟာပ်ကွာန်ဂှ် ဗီုပြင်အကာဲအရာ ဍုင်၊ ကွာန် ညးကဵုညးဂှ် ဒးဂၠာဲဗပေၚ်မံင်မၞိဟ် သွက်လၟေင်ဘာပၞာန်ဗၟာနွံတုဲ ကွာန်မန်ဗွဲမဂၠိုင်မ္ဂး ဂကူမန်တံ မၞိဟ်ဂွံလုပ်သ္ပကောန်ပၞာန်ဗၟာ နွံအောန်ကၠာလေဝ် စၞးဂှ် အုပ်ဓုပ်ကွာန်တံ ဗက်ကေတ်ဩန် ပ္ဍဲညးဍုင် ကွာန်တုဲ ဗက်လိင်စုတ်ဂကူဗၟာ သၟာကမၠောန်ဆုဲပြံင်တံ ဗီုပြၚ်ကွာန်ညးကဵုညးနွံရ။
ပ္ဍဲကဵုဗက်ဩန် သွက်ဂွံလိင်စုတ်မၞိဟ်စၞးသ္ပကောန်ပၞာန်ဗၟာဏံဂှ် ဖေက်ရဲပၠန်ဂတးတံ ကရေပ်ဂရတ် မွဲမွဲသာ်တုဲ ဇၟာပ်ဒေသ ဇၟာပ်ကွာန်ဂှ် ကၠတ်ဗက်မံင်ဩန် နဲကဲညးကဵုညးနွံတုဲ လၟုဟ်မ္ဂး ကၠတ်ဗက်မံင် ဩန် ပ္ဍဲညးဍုင်ကွာန်တံ ကြပ်ပေၚ်သၞာံရရောင်ဂှ်လေဝ် ဂွံတီကေတ်ရ။
ကြဴနူကံင်ဇြဳပၞာန်ဗၟာတံ က္လေင်ပၠုပ်လမျီုသၞောဝ်ဥပဒေ ဇၟာပ်ညးဍုင်ကွာန် ဒးလုပ်ယိုက်ဝန်ပၞာန်ဂှ် ပံက်ဗ္တောန်ကၠုင်လဝ် ဘာသ္ဇိုင်ကွတ်ဗ္တောန်ပၞာန် လၟေင်ဘာမွဲတုဲမွဲတုဲ ပ္ဍဲသၞာံ ၂၀၂၅ ဂိတုဖေဖဝ်ဝါရဳ စၟတ်တ္ရဲ ၁၄ ဂှ် စပံက်လဝ်ဘာပၞာန် လၟေင် ၁၀ ရောင် ဂွံတီကေတ်ရ။
0 Comments