ဟိုတ်နူပရေင်ခက်ခုဲကၠေင်စက်တုဲ ဓာတ်လလဳဒေသရေဝ်သၟဝ်ကျာ ဖအောန်ဖျေံအခိင် ဗလးပၟတ်ရောင် နူကဵုတၠကမၠောန် ဗလးဓာတ်လလဳ ပတိတ်လလောင်လဝ်ရ။
“(နူတနေံတေံ) အခိင်ဒေါဝ်တ္ၚဲ (၁၁) နာဍဳဂှ် ပၟတ်ပၠိုတ်အာမှ ဂွံတီ ဒဒှ်ရ ဍေံဖအောန် ဖျေံအခိင်၊ ဇကုလေဝ် ဟွံဝေင်လာင်တှ်ေ ဇကုဟွံတီ၊ ဇကုလေဝ် ကၠောန်မံင်ကမၠောန် ကဵုပၟတ်စက်တှ်ေ ဒှ်တင်ခက်ခုဲတၟာဂလိုင်၊ ပၟတ်ဒေသပိုဲဏံ ပၟတ်ဍေံပၠိုတ်ဟွံမွဲ ၂၄ နာဍဳ ပေင်င် ကၠုင်မံၚ်တှ်ေ စက်ပၟတ်လေဝ် ဖျေံလဝ်ဟွံမွဲ၊ အဵု ဍုင်လီုလီုတှ်ေ ဒှ်မံင်စုင်ရလေဝ်” သာ်ဏံ ညးတၠကမၠောန်ကၠောန်ဒၟံင်ပရိဘောဂ ဒေသရေဝ်သၟဝ်ကျာမွဲတၠ ဟီုကရောတ် တိုန်ရ။
အတိုင်လိက်လလောၚ်တြး နူကမ္ပနဳ Northern Ye Electricity Distribution Service ချူထမံက်လဝ်ဂှ်မ္ဂး “တန်တဴကဵုအကာဲအရာဲ ကၠေင်စက်တုဲ ဖအောန်ဖျေံဏာ အခိၚ်ဗလးဓာတ်လလဳ သ္ပပတံနူစၟတ်တ္ၚဲ ၁၅ – ၂ – ၂၀၂၅ ၊ အခိင်ဒေါဝ်တ္ၚဲ ၁၁ နာဍဳ စဵုကဵုသဝ်တ္ၚဲ ၅ နာဍဳရောင်” ချူထမံက်လဝ်ရ။
တန်တဴကဵုရာန်ကၠေင်စက်ဂွံတုဲ အခိင်ပြံင်လှာဲနွံမ္ဂး ဆက်လလောင်တြးအာပၠန်ရောင် ကမ္ပနဳတြးပၟတ်ဓါတ်လလဳဂှ် ချူထမံက်လဝ်ရ။
ညးတၠကမၠောန် ဒးစကာမံင်ပၟတ်ဓာတ်လလဳ အလုံဒေသရေဝ်သၟဝ်ကျာတံဂှ် သ္ပမံင်ပဓာန် ကဵု ပၟတ်ကမ္ပနဳဂှ်တုဲ လ္တူကမ္ပနဳ ပွမဖအောန်ဖျေံအခိင်ဗလးဓာတ်လလဳ သာ်ဏံဂှ် ဒှ်တင်ဆိုအ်ဗ ခက်ခုဲအိုတ်ရောင် သ္ဂးရ။
ရုင်စက်ပၟတ်ဓာတ်လလဳ ဒေသရေဝ်သၟဝ်ကျာဂှ် နွံမံင်ပ္ဍဲကွာန်ဒဵုကြေင်တုဲ ကွာန်ဒဵုကြေင်၊ ကွာန်သၞေဟ်ခရေင်၊ ကွာန်ဝါဘာ၊ ကွာန်ကုန်ဗဴ၊ ကွာန်တၟံကၞေင်၊ ဍုင်လၟိုင်၊ ကွာန်ကအ်ဍောတ်၊ ကွာန်တံင်ပရင်၊ ကွာန်တံင်မောံ ပံင်ကွာန်(၉)ကွာန် နူကမ္ပနဳ Northern Ye Electricity Distribution Service တံ ဗလးမံင်ဓာတ်လလဳ နကဵုၚုဟ်မး မွဲယူဏေတ် ၂၂၀၀ ဒ္ကေဝ် ကေုာံ ပၟတ်ဂၠံင်ပွိုင်မွဲဂိတု မွဲသ္ၚိမ္ဂး သွက် (၅) ယူဏေတ်ရောင် ဂွံတီကေတ်ရ။