က္ဍိုပ်သ္ကိုပ်ပၞာန် မေန်အံင်လှာင် အဃောအာစိုပ်ဝေင်မံင် ဍုင်ဗဳဠာရုတ်ဂှ် ဟီုဓမံက်ကၠုင် ပ္ဍဲဂိတုလဵု ကၠောန်ဗဒှ်ကဵုပေါဲရုဲမာဲရ။

ပေါဲရုဲမာဲကၟိန်ဍုင်ဗၟာဂှ် ဖျေံဇန်လဝ် သွက်ဂွံကၠောန်သ္ပအာ ပ္ဍဲသၞာံ ၂၀၂၅ ဂိတုဒဳဇြေမ်ဗါ ဟွံသေင်မ္ဂး သၞာံ ၂၀၂၆ ဂိတုဂျာန္နဝါရဳတေံရောင် နူကဏေံ (မာတ် ၇) ဏအ် က္ဍိုပ်သ္ကိုပ်ၜါဍုင် (ဗၟာ-ဗဳဠာရုတ်) ဆဵုဂဗသဳကၠဳညးသ္ကအ်တုဲ အဃောကၠောန် ပေါဲသောင်က္လးပရိုင်ဂှ် က္ဍိုပ်သ္ကိုပ်ပၞာန် မေန်အံင်လှာင် ဟီုပ္တိတ်လဝ်ရ။

ပြဟ်ဟ်ဏအ်ဝွံ ဗော်ပရေင်ဍုင်ကွာန် သွက်ဂွံလုပ်ပြိုင် ပေါဲရုဲမာဲဂှ် ပၠောပ်ပ္တိုန်လဝ်စရင် ၅၃ ဗော်နွံရောင်ဂှ်လေဝ် ဆက်သ္ဂးလဝ်ရ။

သွက်ဂွံမင်ရံင်အာ ပေါဲရုဲမာဲကၟိန်ဍုင်ဗၟာဂှ် ဗလးဏာကဵုမၞိဟ်ဏောင် သမ္မတ လူကာယှာန်ကိုဝ်ဟာ ဍုင်ဗဳဠာရုတ် ဟီုရ။

ကံင်ဇြဳပၞာန် က္ဍိုက်က္ဍိုပ် ဖန်ဇန်တုဲ ကၠောန်ဗဒှ်ကဵုပေါဲရုဲမာဲဏောင် က္ဍိုပ်သ္ကိုပ်ပၞာန် မေန်အံင်လှာင် မဟီုမံင်လၟုဟ်ဂှ် ကြုက်၊ ရုတ်ယှာ ကေုာံ ဗဳဠာရုတ်တအ် ထံက်ဂလာန်ကၠာလေဝ် ဍုင်ပလိုတ်လ္ရဵု ဗီုကဵုအမေရိကာန်၊ ပြင်သေတ် စတမ်တအ် ဟွံထံက်ဂလာန်ဏီအိုတ်ရ။

အခိင်စသီလဝ်အဝဵုတၟိတၟိတေံ သၞာံ ၂၀၂၃ ဂိတုအဝ်ဂါတ်မ္ဂး ကၠောန်ဗဒှ်ကဵုပေါဲရုဲမာဲဏောင် က္ဍိုပ်သ္ကိုပ်ပၞာန် မေန်အံင်လှာင် ကေင်ဟီုပ္တိတ်လဝ်နွံကၠာလေဝ် ဟွံဒှ်ကၠုင်တုဲ အလန်ဏအ် ထပ်ဟီုပ္တိတ်ကၠုင် မွဲဝါပၠန်ရ။