ပွိုင်ဍုင်မုဟ်ဍုင်၊ ပ္ဍဲကွာန်ကၠအ်သတ်ဂှ် မၞိဟ်တြုံ အဝဲပၠိုင်င်ၜါတၠ ဒးဒုင်ပန်ကဵုလွဟ်တုဲ လောတ်ဒေါမ်ချိုတ်မံင် ဗ္ဒါဲရုင် အုပ်ဓုပ်ကွာန် (ကၠအ်သတ်) ဂှ်ရောင် ဂွံတီကေတ်ရ။

အတိုင်တမ်ရိုဟ်ပရိုင် နူဒေသဂမၠိုင် ဟီုကၠုင်လဝ်မ္ဂး သၟတ်တြုံၜါတၠ မဍိုက်တဴကွဳလိုန်ဓါတ်မွဲဖဍိုက်ဏအ်ဂှ် ဒးဒုင်ပန်ဂစိုတ်လဝ် ပ္ဍဲဂိတုမာတ် စၟတ်တ္ရဲ ၁၀ အကြာအခိင်နူဂယး ၜိုတ် ၂ နာဍဳရောင် သ္ဂးမံင်အိုတ်ရ။

သၟတ်တြုံပၠိုင်င် ဒးဒုၚ်ပန်ဂစိုတ် (၂)တၠဂှ် မၞုံယၟုမာံမန်ဓာဲ အာယုက်ဗၞတ်(၂၇) သၞာံမွဲတၠ၊ မွဲတၠဂှ် သ္ကအ်ရဲမာံမန်ဓာဲ နူကွာန် ကအ်ခပဳထဝ် အဝဲတုပ်ကဵု မာံမန်ဓာဲ မွဲတၠ ပံၚ်(၂)တၠ ဒေါမ်လောတ်ချိုတ်မံၚ် ဗ္ဒါဲရုင်အုပ်ဓုပ်ဓုပ် ကွာန်ကၠအ်သတ်ဂှ် နူဂယးပြဟ်ဏအ် ညးကွာန်တအ် ဂွံဆဵုကေတ်လဝ်ရ။

မာံမန်ဓာဲကဵု သ္ကအ်ရဲညးတေံမွဲတၠဂှ် ဒဒှ်ရ ကြမ်ကြမံင် ပ္ဍဲကွာန်တုဲ ဒပ်မင်ကၚ်ကွာန်တအ်ရ ပန်ဂစိုတ်ထောံဂှ် ညးကွာန် ကၠအ်သတ်တအ်ကီု၊ ညးကွာန်ကအ်ခပဳထဝ်တအ်ကီု ဟီုစောဒကဒၟံင်လေဝ် နွံရ။

“ဒးဒုင်ကၠတ်ပန်ရ၊ ရဲကၠအ်သတ်မွဲ ကံခပဳထဝ်မွဲ၊ ဗတံ ၂ နာဍဳ၊ ညးၜါဂှ် ရဲပၠံင်ကွဳလိုန်ဓါတ် ပါမွဲတၠ၊ (ပြည်သူ့စစ်) ဟွံသေင် ပန်၊ လွဟ်ဗြုတုဲမှ ရဲကင် (ကွာန်) တအ် ဂွံစိုပ်” သာ်ဝွံ တမ်ရိုဟ်ပရိုင်နူကွာန်မွဲတၠ ဟီုလဴကၠုင်ရ။

အတိုင်တင်နင်နူကဵုမုက်လိက်တြးဝါဒပၞာန်ဗၟာ (Telegram) ချူဓမံက်လဝ်မ္ဂး ဗ္ဒာဲသၟတ်တြုံၜါတၠ မချိုတ်ဒၟံင် ပ္ဍဲကွာန်ကၠအ်သတ်ဂှ်ဝွံ ဂွံဆဵုညာတ်လဝ် သီုခၞော်မကမ် လွဟ် AK-47 ဗၞတ် ၆ မလေဝ် နွံရောင် သ္ဂးလဝ်ကီုရ။

ဇွသၟတ်တြုံၜါတၠဂှ် ဂကောံပရိဟိတရီုဗၚ် ပရေၚ်မၞိဟ်ပ္ဍဲကွာန်တအ် ပလံၚ်ပတိုန်ဏာ ရုၚ်ဂဥုဲ ဍုၚ်မုဟ်ဍုၚ်တုဲ မုဟိုတ် သာ်လဵု ဒးဒုၚ်ပန်ဂစိုတ်၊ တၠတဲ ညးလဵုဒှ်ဍာံ သွဟ်ဍာံဂှ် သ္ပဒတန်ဟွံမာန်ဏီရောင် ဂွံတီကေတ်ရ။