လၟေင်အရိုဟ်ဟ်သၞာံ စိုပ်ကၠုင်ဂိတုမာ်၊ ဖဝ်ရဂိုန်မ္ဂး ဒှ်အခိင်သွံကွဳလိုန်ဓာတ်ခိုဟ်ကီုလေဝ် သၞာံဏံဂှ် ဟိုတ်နူသၟတ်တအ် ဂြိပ်ပါဲဒဴ နကဵုအသိင်ဘဲဒးသ္ပကောန်ပၞာန်ဂှ်တုဲ သၟတ်ဒၟံင်တန်တဴ ပ္ဍဲဍုင်ကွာန်တအ် အောန်ဂှ်ရ သွံရာန်ကွဳလိုန်ဓာတ် လေဝ် ပရေံမံင်ရောၚ် တၠဆေင်သွံရာန်ကွဳလိုန်ဓာတ် လတူဍုင်ဇြပ်ဗုမွဲတၠ ဟီုရ။
အခိင်အတးကြပ်ကၠုင် ဗီုကဵုအခိင်လၟုဟ်မ္ဂး သၟတ်အာကၠောန်စဒၟံင် ဍုင်သေံ ဍုင်သအာၚ်တၞဟ်ဟ်တအ် ကၟာတ်ဇူကမၠောန် ကေတ်အခေါင်တုဲ စဴသ္ရိဌာန် စဴဝေင်ကွာန်ဗီုညးကဵုညး နွံဂၠိုင်မံင်ရ။
ဒှ်သာ်ဂှ်ရ လၟေင်သၞာံမ္ဂး အခိင်ဏံဂှ် ဒှ်အခိင်သွံရာန်ကွဳလိုန်ဓာတ်ခိုဟ်ကီုလေဝ် သၞာံဏံဂှ် ဟိုတ်နူအသိင်သၟတ်တအ် ဒးယိုက်ဂၠေင်ပၞာန်ဂှ်တုဲ သၟတ်တအ် သှ်ေပ္ဍဲဍုင် ပ္ဍဲကွာန်အောန်ဂှ်ရ အခိင်သွံကွဳလိုန်ခိုဟ်ဂှ် သွံဟွံဂြိပ် (ဟွံခိုဟ်) ရောင် သ္ဂးရ။
“အခိင်ဏံတှ်ေ သၟတ်တအ် စဴကၠုင်နူသေံ နူဍုင်တၞဟ်ဟ် စဴကၠုင်ဝေင်သဘင်အတး နွံဂၠိုင်တုဲ အခိင်သၟတ်တအ် စဴဂၠိုင်အခိင်ဏံဂှ်တှ်ေ ဒှ်အခိင်သွံရာန်ကွဳလိုန်ဓာတ်ခိုဟ်အိုတ်ရ၊ သၞာံဏံဂှ် အသိင်ဒးဖေက်ဒးသ္ပကောန်ပၞာန်တုဲ သၟတ် ပ္ဍဲဍုင် ကွာန်တအ်လေဝ် သှ်ေအောန်၊ သၟတ်အာကၠောန်စမံင်ဍုင်သေံ ဍုင်တၞဟ်တအ်လေဝ် ဟွံစဴကၠုင် စဴနွံကီုလေဝ် အောန်ကွေံကွေံ သၟတ်တအ် အောန်တှ်ေ မၞိဟ်ရာန်ဍိုက်ကွဳလိုန်ဓာတ်လေဝ် အောန်ကွေံကွေံ အခိင်သွံရာန်ကွဳလိုန် ဓာတ်ဂြိပ်ဂှ် သွံပရေံကွေံကွေံ” နာဲကောန်ဗာဲ တၠဆေင်သွံရာန်ကွဳလိုန်ဓာတ် လတူဍုင်ဇြပ်ဗုဂှ် ဟီုရ။
အခိင်သွံရာန်ကွဳလိုန်ဓာတ်ခိုဟ်ဂှ် ကွဳလိုန်ဓာတ် သွံရာန်ဟွံဂြိပ်(ဟွံခိုဟ်)တုဲ ပ္ဍဲကဵုသွံရာန် တိတ်အာမွဲမွဲဖ္ဍိုက်ဂှ်လေဝ် ပရဲပရင်ဂွံအောန်ကွေံကွေံဂှ်လေဝ် တၠဆေင်သွံရာန်ကွဳလိုန်ဓာတ်ဂှ် ဆက်ဟီုထ္ၜးပၠန်ရ။
“ဗီုဆေင်ပိုဲဏံတှ်ေ မွဲသတ္တဟ(မွဲအပါတ်)တှ်ေ သွံတိတ်မံင်ကဵု စှော်ဖ္ဍိုက်ဏောၚ်၊ လၟုဟ်ဏံတှ်ေ မွဲသတ္တဟ(မွဲ အပါတ်)မှ လဆောဝ် ၁ ဖ္ဍိုက် ကဵု ၂ ဖ္ဍိုက်၊ အောန်ကြဳစှ်ေအာကွေံကွေံမွဲတဲ၊ သွံတိတ်အာပၠန်လေဝ် ပရဲပရင်အရင် ဇကု ဂွံအောန်ကွေံကွေံ၊ ယဝ်ဟွံယှအ်ကဵုတှ်ေ ကပေါတ်ဇကုဟွံတိတ်၊ ကမၠောန်ဇကုဏံ ဟွံကၠောန်ပၠန်လေဝ် ကမၠောန်ပိုတ်အာ ကၠောန်ဟွံကိတ်လေဝ် ဒးထိင်အာဆေင်ဇကုညံင်ဟွံလီုတုဲ ဒးကၠောန်အာဗီုဏံရလေဝ်” တၠဆေင် သွံရာန်ကွဳလိုန်ဓာတ်ဂှ် ဟီုကရောတ်ရ။
လၟုဟ်မ္ဂး ကွဳလိုန်ဓာတ်တၟိတၟိမွဲဖ္ဍိုက်ဂှ် နွံၚုဟ်အကြာ ၉၅ ကိုဋ်တုဲ ယဝ်ခါရလိုင်ဇြေန်နွံမ္ဂး ၚုဟ်အကြာ ၁၅၀ ကိုဋ်နွံမံင်ရောင် ဂွံတီကေတ်ရ။
