ဂိတုအေဗြဴ စၟတ်တ္ၚဲ (၃) တ္ၚဲဏံဂှ်ဝွံ ပ္ဍဲကၟိန်ဍုင်ဗၟာ အသိင်ဘဲဒဏ်ကသဳတိ (တိချဳ) ကၠုင်လဝ် ပွိုင် (၆) တ္ၚဲတုဲ က္ဍိုပ်သ္ကိုပ်ပၞာန်မေန်အံင်လှာင် အာတိုန်စိုပ်ကောံဓရီု (BIMSTEC) ပ္ဍဲကဵုဍုင်ၜင်ကံက် ကၟိန်ဍုင်သေံဂှ်နွံရောင် ဂွံပရိုင်ရ။

အပ္ဍဲကဵုကောံဓရီု စနူဂိတုအေဗြဴ စၟတ်တ္ၚဲ (၃) စဵုကဵု (၄) ပွိုင် (၂) တ္ၚဲ ဂှ်ဝွံ သဳကၠဳဆေင်စပ်ကဵု ပရေင်ပိုန်ဒြပ် ကဵု နဲကဲပညာပံင်တောဲရေင်တၠုင် (BIMSTEC) ဂှ်ရောင် ဂွံတီကေတ်ရ။

က္ဍိုပ်သ္ကိုပ်ပၞာန် မေန်အံင်လှာင်ဂှ် ပ္ဍဲကၟိန်ဍုင်ဗၟာ ဟိုတ်နူအသိင်ကသဳတိဇြဟတ်မထတ်သကာတ် ရ.၇ နွံဂှ်ရ မၞိဟ် ဗ္ဒါဲ (၃၀၀၀) တၠ သ္ဒးချိုတ်ကၠုင်လဝ်ဂှ်ရ စပ်ကဵုပရေင်ကၟိန်ဍုင်ဗၟာ ဒးလဝ်ဘဲဒဏ်ကသဳတိ (တိချဳ)ဂှ်တုဲ သာ်လဵုသ္ဂောံကလေင်ဒက်ဗ္တန်ဂှ်ကီု သ္ဂောံပင်တောဲကဵု ကၟိန်ဍုင်သၟာင်မာန်ဂှ် ချပ်ဇန်သဳကၠဳအာရောင်။

နကဵုသ္ကိုပ်ဝန်ဇၞော်သေံ ဖိုအ်ဓံင်ဌာန်ယှေန်နဝါတ် ဂှ်လေဝ် သွက်ဂွံဆဵုဂ္ဗသဳကၠဳကဵု က္ဍိုပ်သ္ကိုပ်ပၞာန် မေန်အံင်လှာင်ဂှ်နွံတုဲ ကော်ဘိက်နင်အပ္ဍဲကဵုကောံဓရီု BIMSTEC ဍုင်ၜင်ကံက်ဏံရ။

အပ္ဍဲကဵုကောံဓရီု BIMSTEC ဏံဂှ်ဝွံ မပါလုပ်ဒၟံင် ကၟိန်ဍုင်အာယှ (၇) ကၟိန်ဍုင် သီုကဵုကၟိန်ဍုင်ဗၟာပါလုပ်တုဲ ရန်တၟံညးတအ် သ္ဂောံဇၞော်သၠောဲပ္တိုန် ပရေင်ပိုန်ဒြပ်အပ္ဍဲဒေသ၊ ပရေင်မၞိဟ်ကဵု နဲကဲပညာပံင်တောဲရေင်တၠုင်ဂှ်နွံရေင် ဂွံတီကေတ်ရ။

အပ္ဍဲကဵုပေါဲကောံဓရီုကၟိန်ဍုင်သေံဏံ လ္ပကဵုအခေါင် ကုက္ဍိုပ်သ္ကိုပ်ပၞာန်ဗၟာတိုန်စိုပ်ညိဂှ် အလဵုအသဳညဳသၟဟ်ဂကူ အာတ်မိက်လလောင်ကၠုင်လဝ်တုဲ နူကဵုဂကောံညးချဳဒရာင် အခေါင်အရာမၞိဟ်ဍုင်သၟာင်ကဵု ညးချဳဒရာင်ဒဳမိုဝ်ကရေဝ်ဇြဳဗၟာဂမၠိုင်တအ်လေဝ် ဒးစဵုဒးစးကၠုင်မံင် က္ဍိုပ်သ္ကိုပ်ပၞာန်ဇၞော်မေန်အံင်လှာင် ပွမအာတိုန်စိုပ်ကောံဓရီု ပ္ဍဲဍုင်ၜင်ကံက်ဂှ်နွံရောင် ဂွံတီကေတ်ရ။