အကြာပွိုၚ်မွဲသတ္တဟဓဝ်ဂှ် ဒေၚ်ရာန်ထၜိုတ်ကြုက်တံ ရာန်ဖအောန်ဖျေံၚုဟ် ၂၀၀ ဒ္ကေဝ်ပြၚ်မံၚ်ရောၚ် တၠဆေၚ်ရာန်ထၜိုတ်နူဍုၚ်ဇြပ်ဗုမွဲတၠ ဟီုရ။

ထၜိုတ်ဍုၚ်မန်ဂှ် ဗွဲမဂၠိုၚ် သွံထပၠုပ်ဒၟံၚ်ကဵုဒေၚ်ရာန်ထၜိုတ်ကြုက် ပ္ဍဲဍုၚ်မုဟ်ဍုၚ်တံတုဲ အခိၚ်လၟုဟ်ဂှ် ဟိုတ်နူၚုဟ်ထၜိုတ်ဂၠးတိကီု၊ ကြပ်ကဵုအခိၚ်အတးကီုတုဲ ဒေၚ်ရာန်ထၜိုတ်ကြုက်တံ ရာန်ဖအောန်ဖျေံမံၚ်ၚုဟ်ရောၚ် သ္ဂးရ။

“ဒေၚ်ရာန်ထၜိုတ်ဇၞော်ဇၞော်ဂှ် ကြုက်နူမုဟ်ဍုၚ်တံရ ဒေၚ်ဇၞော်ဇၞော်တှေ်၊ ၚုဟ်ထၜိုတ်စှ်ညေိတှေ် ဍေံတံ(ကြုက်) တံ ရာန်ဍဵုၚုဟ်လၟိုန်ရ၊ အခိၚ်ဏံလေဝ် ကြပ်မံၚ်ကဵုသဘၚ်အတးကီု ဟိုတ်နူဂှ်ရ ဍေံတံရာန်ဍဵုယှအ်ဖျေံ ၂၀၀ ပြၚ်မံၚ်” သာ်ဝွံ နာဲလောန် တၠဆေၚ်ရာန်ထၜိုတ်ဂှ် ဟီုရ။

သတ္တဟတုဲကၠုၚ်တေံမ္ဂး ထၜိုတ်ကဆံၚ် Local 3 မွဲပံၚ်ဂှ် ၚုဟ်နွံအကြာ ၃၀၀၀ ဒ္ကေဝ်ပြၚ်တုဲ လၟုဟ်မ္ဂး နွံမံၚ် အကြာ ၂၈၀၀ ဓဝ်ရ။ အကြာပွိုၚ်မွဲတ္တဟဏံဂှ် ဟွံဒှ်ကၠုၚ်မွဲလှေ် ၚုဟ်ယအ်စှေ်အာ ၂၀၀ ဒ္ကေဝ်ပြၚ်ရ။

ဆေၚ်ရာန်ထၜိုတ်လတူဍုၚ် ပ္ဍဲကွာန်တံဗွဲမဂၠိုၚ်ဂှ် ရာန်နၚ်တုဲ အာပၠုပ်သွံမံၚ် ပ္ဍဲကဵုဒေၚ်ရာန်ထၜိုတ် ပ္ဍဲဍုၚ်မုဟ်ဍုၚ် ဖအိုတ်တုဲ ၚုဟ်လ္ပာ်တိုန်မ္ဂး တိုန်အကြာ ၅၀ ဒ္ကေဝ်တုဲ ကာလၚုဟ်စှေ်မ္ဂး စှေ်ကဵု ၁၀၀ ဒ္ကေဝ် ၁၀၀ ဒ္ကေဝ်ပြၚ်ပြၚ်၊ ပွိုၚ်မွဲၜါတ္ၚဲဓဝ် ၚုဟ်စှေ်အာ ၂၀၀ ဒ္ကေဝ်ပြၚ်ဂှ် ပ္ဍဲသၞာံဏံ ဒှ်အလန်ကၠာအိုတ်ရဂှ်လေဝ် တၠဆေၚ်ရာန်ထၜိုတ်တံ  သ္ဂးရ။

“ထၜိုတ်ဍုၚ်ပိုဲ(ဍုၚ်မန်)ဏံ ဒှ်အာအခိုက်ဣရ၊ ဠ လ္ပာ်တိုန်တှေ် တိုန်မွဲတဲ ကပါ် (၅၀)၊ ဠ လ္ပာ်စှေ်တှေ် စှေ်ကဵု(၁၀၀) (၂၀၀)၊ ကြုက်တံ ရာန်ဍဵုၚုဟ် စှေ်အာအခိုက်ရ” ဂှ် နာဲခေန်မိုၚ် မၞိဟ်ရာန်ဍာ်ထၜိုတ် ပွိုၚ်ဍုၚ်မုဟ်ဍုၚ် ထပ်ဟီုရ။

ၚုဟ်ထၜိုတ်စပံက်တၟိတၟိ အခိၚ်လိုက်ဝှ်သၞာံဏံဂှ် ထၜိုတ်ကဆံၚ် Local 3 မွဲပံၚ်မ္ဂး ၚုဟ်နွံအကြာ ၃၅၀၀ ဒ္ကေဝ်တုဲ ဂိတုတုဲကၠုၚ်ဏံဂှ် မွဲပံၚ်မ္ဂး ၚုဟ်နွံအကြာ ၃၀၀၀ ဒ္ကေဝ်ပြၚ်ညိဂှ် ဂွံတီကေတ်ရ။