ၚုဟ်ထၜိုတ်ဒတုံစှ်ေအာ မွဲလစုတ်ဓဝ်ဂှ် တၠကမၠောန်ကၠောန်ဂဒဵုဂတှ်ေထၜိုတ်တအ် ကျဗြမ်ဂိဂိ

by | Apr 19, 2025 | ပရိုၚ် | 0 comments

အခိၚ်ဗၞတ်ပွိုၚ်သတ္တဟပြၚ်ညိဓဝ် ၚုဟ်ထၜိုတ်ဒတုံစှေ်အာဂှ် တၠကမၠောန်ခြိုၚ်ကၠောန်ဂဒဵု ဂတှ်ေထၜိုတ်တအ် ကျဆောံဗြမ်အာ ဂိဂိရောၚ် တၠကမၠောန်ဂဒဵုထၜိုတ်တအ် ဟီုထ္ၜးရ။

ပွိုၚ်ခြာတ္ၚဲအောန်အောန်ဂှ် ၚုဟ်ထၜိုတ်စှေ်အာ မွဲပံၚ်အကြာ ၅၀၀ ဒ္ကေဝ်ပြၚ်ပြၚ်ဒှ်တုဲ သွက်တၠကမၠောန်ခြိုၚ်ဂဒဵုထၜိုတ် ဂတှ်ေဂမၠိုၚ်တအ် ကျဆောံအာ ဘဲဟွံသာရောၚ် သ္ဂးရ။

“အသိၚုဟ်ဖျာဂၠးတိဏံ ညးဂွံတော်ဒးအောန်မံၚ်၊ ၚုဟ်ထၜိုတ်စှ်ေအာမွဲလစုတ်ဓဝ်ဂှ် ဇကုလေဝ်ဟွံဂွံသတိပုဟ်၊ အဃောအသိၚ်ၚုဟ်ထၜိုတ်ခိုဟ်ဂှ် ဒတုံစှ်ေအာ တ္ၚဲကၠာမွဲတ္ၚဲဂှ် အကြာၜိုတ် ၃၀၀ ဒ္ကေဝ်၊ တုဲဂှ် ၁၀၀ ၊ ၂၀၀ စှေ်မံၚ်၊ လၟုဟ်တှ်ေ ဒတုံစှ်ေအာ ၜိုတ် ၅၀၀ ပြၚ်ပြၚ်ဣရ၊ ရဲကၠောန်ဂဒဵုစွံလဝ်ထၜိုတ်ဗီုပိုဲဏံတှေ် အောန်အိုတ် ကဵု ၁၀၀၀ ပံၚ်၊ လ္ၚဵုဂှ် ၃၀၀၀၊ ၅၀၀၀ နွံဂၠိုၚ်တှ်ေ ကျဆောံဂၠိုၚ်၊ ဒးလတုန်ဏံ ရဲကၠောန်ဂဒဵုထၜိုတ်တအ် ကျဆောံအာ ဂိကွေံကွေံရောၚ်” သာ်ဝွံ တၠကမၠောန်ရုၚ်ဂဒဵုထၜိုတ် ဍုၚ်မုဟ်ဍုၚ်မွဲတၠ ဟီုထ္ၜးရ။

ၚုဟ်ထၜိုတ်ဂှ် ဒတုံဗက်စှ်ေအာ ဗၞိက်ဗွဝ်ဖျာဂၠးတိကီုတုဲ ၚုဟ်ထၜိုတ်ဂၠးတိစှ်ေအာဂှ် နူကဵုကြုက်တအ် ရာန်ကေတ်မံၚ် ထၜိုတ်ပ္ဍဲဍုၚ်မန်တအ်လေဝ် ရာန်ယှအ်ဖျေံၚုဟ်ဂှ်တုဲ တၠကၠအ်ထၜိုတ်တအ်ကီု၊ ရဲသွံရာန်ထၜိုတ်ဂမၠိုၚ်တအ်ကီု၊ ရဲရာန်ဍာ်ထၜိုတ် ကၠောန်ဂတှ်ေတအ်ကီု ဟိုတ်နူၚုဟ်ထၜိုတ်ဆက်စှ်ေမံၚ် လၟေၚ်တ္ၚဲတုဲ ကျဆောံဗြမ်မံၚ်အိုတ်ရ။

“လၟုဟ်တှ်ေ ထၜိုတ် မုက်ဂၞန် ၃ ဂဒဵုစိန်တုဲဂှ် ၚုဟ်သှ်ေမံၚ် မွဲပံၚ် အကြာ ၂၆၀၀ ဓဝ်ရ၊ ပိုဲရာန်လဝ်ဂှ် မွဲပံၚ် အကြာ ၃၀၀၀ ဒ္ကေဝ်ပြၚ်ညိ၊ ဒတုံကျမံၚ် မွဲပံၚ် ၄၀၀ ပြၚ်ကဵု ၅၀၀၊ ထၜိုတ်ကဵု ၁၀၀၀ ပံၚ်တှ်ေ ကျမုစိရ တော်ကေတ်ရ၊ ရဲရာန်ဍာ်ထၜိုတ်တုဲ ကၠောန်ဂဒဵုထၜိုတ်တအ် ကျဖအိုတ်ရ၊ နွံအောန်တှ်ေ ကျအောန်ညိရ၊ ရဲကၠောန်ပိုန်ဒြပ်ထၜိုတ်တအ် ဒးဗီုဏံမွဲလတုန်တှေ် ပိုတ်တိတ်အာမာန်မံၚ်” ရဂှ် တၠကမၠောန်ရုၚ်ဂဒဵုထၜိုတ်ဂှ် ဆက်ဟီုထ္ၜးရ။

ၚုဟ်ထၜိုတ်ဒေသဍုၚ်မန်တ္ၚဲဏံဂှ် ထၜိုတ် Local 3 ကှ်ကှ် မွဲပံၚ်နူကဵု ၂၈၀၀ ဒ္ကေဝ်ဂှ် လၟုဟ်ၚုဟ်သှ်ေမံၚ် ၂၂၀၀ ဓဝ်တုဲ ထၜိုတ် RSS 1 နူကဵု မွဲပံၚ် ၃၅၀၀ ဂှ် လၟုဟ်သှ်ေမံၚ် အကြာသၟဝ် ၃၀၀၀ ရရောၚ် သ္ဂးရ။

အခိၚ်မွဲလစုတ်ဓဝ် ၚုဟ်ထၜိုတ်စှ်ေအာသာ်ဏံဂှ် ဗက်အာကရောံ ၚုဟ်ဗၞိက်ဗွဝ်ဖျာဂၠးတိကီုတုဲ တၠကၠအ်ထၜိုတ်၊ တၠကမၠောန်ပရေၚ်ပိုန်ဒြပ် ထၜိုတ်သီုဖအိုတ်တအ် ဟွံကေၚ်ဆဵုမွဲလှ်ေ ၚုဟ်ပိုတ်ဒတုံစှ်ေအာသာ်ဏံဂှ် ရဲခြိုၚ်စွံလဝ်ထၜိုတ်လ္ၚဵုတအ် မၚ်ရံၚ်ၚုဟ်တုဲ ဆက်ခြိုၚ်စွံအာပၠန်ဟာ ဟွံသေၚ်မ္ဂး သွံထောံနကဵုၚုဟ်အောန်အောန်ဏံ ခိုဟ်ဟာဂှ် ပါ်ပဲါဝါတ်မံၚ်ရောၚ် ဂွံတီကေတ်ရ။

Written by

Related Posts

ဂကောံညဳသၟဟ်ရာမညတအ် သွက်ဂွံပံၚ်အာတောဲကု ဂကောံမန်မၞုံဍုၚ်သေံတအ်နွံ

ဂကောံညဳသၟဟ်ရာမညတအ် သွက်ဂွံပံၚ်အာတောဲကု ဂကောံမန်မၞုံဍုၚ်သေံတအ်နွံ

ဂကောံညဳသၟဟ်ရာမည ဖျေံသ္ဇိုၚ်ဍုၚ်ဖူကေတ် ကၟိန်ဍုၚ်သေံဝွံ ရန်ကဵုကောန်ဂကူမန်မၞုံဍုၚ်သေံတအ် ဂွံညဳသၟဟ်၊ ဂွံဒှ်မွဲဂကောံမွဲဇြဟတ်ရောၚ်ဂးတုဲ သွက်ဂွံရေၚ်တၠုၚ်ချဳဒရာၚ်ပံၚ်အာတောဲကု ဂကောံမှာဇန်မန် မၞုံဍုၚ်သေံဂမၠိုၚ်နွံရောၚ်ဂှ် ညးတာလျိုၚ်ဂကောံညဳသၟဟ်ရာမညတအ် သ္ဂးလဝ်ရ။

ဒူရေန်ဆက်မတ် တိတ်ပြဟ်ကဵု တိတ်လဇုဲ ၚုဟ်ခြာကဝက်

ဒူရေန်ဆက်မတ် တိတ်ပြဟ်ကဵု တိတ်လဇုဲ ၚုဟ်ခြာကဝက်

ဒူရေန် (ဆက်မတ်) စတိတ်တၟိတၟိကဵု ဒူရေန်တိတ်လဇုဲဂှ် ၚုဟ်ခြာဒၟံၚ်ကဝက်တုဲ ကၠအ်ဒူရေန်တိတ်ပြဟ်တအ်ဂှ် ဒှ်ပရေၚ်ပိုန်ဒြပ်ခိုဟ်ခိုဟ်မွဲရောၚ် တၠကၠအ်ဒူရေန်မွဲတၠဂှ် ဟီုရ။

မတၞံထ္ၜိုတ်ဆက်မတ် သၞာံဏံ ၚုဟ်က္ဍၚ်တိုန်ကဝက်

မတၞံထ္ၜိုတ်ဆက်မတ် သၞာံဏံ ၚုဟ်က္ဍၚ်တိုန်ကဝက်

ဟိုတ်နူဗၞိက်ဗွဝ်ဖျာနာနာ က္ဍၚ်တိုန်အာဂှ် ၚုဟ်ထ္ၜိုတ်လေဝ် သၠုၚ်တိုန်ကီုတုဲ မတၞံထ္ၜိုတ်ဆက်မတ် သၞာံဏံလေဝ် ၚုဟ်က္ဍၚ်တိုန်အာကဝက်ဒှ်ရောၚ် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.