ဟိုတ်နူဒးဘဲလွဟ်က္ၜင်ကျာပၞာန်ဗၟာ ပ္ဍဲတ္ရဲအတးကြာပ် တ္ရဲဏအ်ဂှ်တုဲ ညးဍုင်ကွာန် ပ္ဍဲကွာန် ကအ်ဗိုတ် ချိုတ် ၆ တၠကဵု ခမဳသင်၊ ညးဍုင်ကွာင် ဗၞတ် ၁၇ ဇကု/တၠတအ် ဒးဘဲဝပ်ရောင် ဂွံပရိုင်ရ။
တ္ရဲဏအ် အခိင်လ္ဒောဝ်တ္ရဲ ၜိုတ် ၁၂ နာဍဳကဵု ၂၇ မိဏေတ်ဂှ် က္ၜင်ကျာပၞာန်ဗၟာမွဲဖ္ဍိုက် လုပ်ဂြာတ် ကၠုင်ဖျေံဗမ် ပ္ဍဲဘာဇၞော် ကွာန်ကအ်ဗိုတ် မၞုံပွိုင်ဍုင်ကအ်ကြိက်၊ တွဵုရးကရေင်တုဲ ဇြပ်သဘင်ဓရ် ဘာလကျာ် ကေုာံ သ္ရိဒၟံင်ၜါမလေဝ် မ္ဒးလီုလာ်အာနွံရောင် ဂွံတီကေတ်ရ။
“ဍေံကၠုင်ကဵု ဂျက်ဖိုက်တာတုဲ ဍေံဂြာတ်ဖျေံဗမ် ၜိုတ် ၃ မဒှ်မံင်၊ ဟိုတ်နူအသိင်ဂှ်တုဲ မၞိဟ်ချိုတ်အာ ၆ တၠရ၊ ထပိုဲခမဳပ္ဍဲဘာလေဝ် ဒးအာဝပ်နွံ၊ ကောန်င္ရာ် ၂ တၠဂှ် ဒးဗက်ဂၠာဲကပှ်ကေတ်ဇွဟဂှ်ရ၊ သီုဖ္အိုတ်ဂှ် တှ်ေ ရဲကွာန်ကအ်ဗိုတ်ဖ္အိုတ်ရ” သာ်ဝွံ မၞိဟ်တြုံနူဒေသဂှ်မွဲတၠ လဴထ္ၜးကၠုင်ရ။
ပ္ဍဲကဵုညးဍုင်ကွာန်မ္ဒးချိုတ်အာ ဘဲလွဟ်က္ၜင်ကျာပၞာန်ဗၟာ ၆ တၠတ္ရဲဏအ်ဂှ်ဝွံ ကောန်င္ရာ်မၞိဟ်တြုံ အာယုက် ၂ သၞာံကဝက်မွဲတၠ၊ ကောန်င္ရာ်မၞိဟ်ဗြဴ အာယုက် ၃ သၞာံကဝက်မွဲတၠ၊ ကောန်င္ရာ်မၞိဟ်တြုံ အာယုက် ၉ သၞာံမွဲတၠ၊ ကောန်င္ရာ်မၞိဟ်ဗြဴ အာယုက် ၁၅ သၞာံမွဲတၠ၊ မၞိဟ်တြုံအာယုက် ၃၄ သၞာံမွဲတၠ ကေုာံ မၞိဟ်ဗြဴအာယုက်ဇၞော်ဇၞော် ၇၆ သၞာံမွဲတၠ ဖ္အိုတ် ၆ တၠ ပါလုပ်ရ။
ဟိုတ်နူက္ၜင်ကျာပၞာန်ဗၟာ ထောံဖျေံဗမ် ပ္ဍဲဇြပ်သဘင်ဓရ် ဘာဇၞော် ကွာန်ကအ်ဗိုတ် တ္ရဲဏအ်ဂှ် ခမဳ ၂ ဇကု၊ ထပိုဲ ၈ ဇကု ကေုာံ ခရှ် ၇ တၠ ဖ္အိုတ် ၁၇ ဇကု/တၠ ဒးအာဝပ်တုဲ သီုဖ္အိုတ်တအ်ဂှ် ပလံင်ပ္တိုန် ဏာလဝ်ရုင်ဂဥုဲမတ်မလီုရောင် ညးဒေသလ္တူဂှ် ထပ်ဟီုရ။
“ဗီုရုပ်ကွဳစက် တိုန်မံင်အတူလာင်ဂှ် ဒးကဝေက်ဗမ်၊ မိနော်ဗျုဂှ် ပိုတ်အာၜိုတ်ဂၞိင်ဒှ်မံင်” ညးဆက် ဟီုရ။
ပ္ဍဲကွာန်ကအ်ဗိုတ်ဂှ် ဂကောံရပ်လွဟ်တအ်ကီု ပေါဲဗ္တိုက်ကီု ဟွံမွဲမွဲသာ်တုဲ မုဟိုတ် ဒပ်ပၞာန်ဗၟာတအ် ကၠုင်ဂြာတ်ဖျေံဗမ်ကဵုက္ၜင်ကျာပၞာန်သာ်ဏအ်ဂှ် ညးမွဲလေဝ် တီကေတ်ဟွံမာန်ဏီရ။
တုဲပၠန် တ္ရဲဏအ် စနူအခိင်ဖါနူဂယးဂှ် လ္ပာ်ဂၠံင်ကွဳစက်ကအ်ကြိက်-ကြုင်ဒဵု တွဵုရးကရေင်ဂှ် အကြာဒပ်ပၞာန်ဗၟာကဵု ဒပ်ပၠန်ဂတးပံင်ကောံတအ် ပေါဲဗ္တိုက်သ္ကာတ်မြဟ် က္တဵုဒှ်မံင်တုဲ ညးဍုင်ကွာန် မၞုံဒေသတအ် ချိုတ်၊ ဒးဝပ်နွံလဝ်ကီုရ။
“ဒၞါဲဒှ်မံင်ပေါဲဗ္တိုက်ဂှ်ကဵု ကွာန်ကအ်ဗိုတ်ဂှ် သ္ရောဲမံင်ၜိုတ် ၇ မါင်ဒှ်မံင်၊ ဘာတၟာတၟာဂှ် ဍေံဟွံတီ ဒှ်ဟွံဂွံ၊ ဍေံပန်ရ” သာ်ဝွံ ညးဒေသမွဲတၠ ဟီုကၠုင်ရ။
ကွာန်ကအ်ဗိုတ် ပွိုင်ဍုင်ကအ်ကြိက် တွဵုရးကရေင်ဂှ်ဝွံ နူမလောန်ကၠုင် သၞာံ ၂၀၂၃ အခိင်တမ်သၞာံဂှ်လေဝ် ဟိုတ်နူဘဲပၟတ်ပၞာန်တုဲ ကေင်ဒးတူလေင်ကၠုင်လဝ်နွံတုဲရ။
