ပ္ဍဲခရိုင်သမုတ်သဃန် ကၟိန်ဍုင်သေံ၊ ဍုင်မဟာၛာဲဂှ် ဟိုတ်နူကွဳစက်ပၟတ်လိုန်ဒးတုဲ သၟာကမၠောန်ကောန်ဍုင်မန်ဗၟာ မၞိဟ်ဗြဴမွဲတၠ ဒးချိုတ်အာလဝ်ရောင် ပရိုင်သေံဂမၠိုင် ချူဓမံက်လဝ်ရ။

တ္ၚဲဏံ ဂိတုဇှ်ေ (၅) မံက်၊ ၜိုတ်အခိင်နူဂယး (၈) နာဍဳသေံဂှ် ပ္ဍဲခရိုင်သမုတ်သဃန်၊ ဍုင်မဟာၛာဲဂှ် ကွဳစက်ဖ္ဍိုက်လဝ်သၟာကမၠောန်ကောန်ဍုင်ဗၟာ (၈) တၠ၊ အဃောတက်ကၠောံဂၠံင်ကွဳစက်ပၟတ်ဂှ် ဟိုတ်နူအသိင်ဖေက်လကိုတ် ကွဳစက်ပၟတ်တေံကၠုင်ဂှ်ရ ဆင်စှ်ေနူကဵုကွဳစက်ဂှ် သၟာကမၠောန်ကောန်ဍုင်မန်ဗၟာ မၞုံယၟု (မိဖျူဖျူ) အာယုက် (၂၇) သၞာံ ဂှ် ဟိုတ်နူကွဳစက်ပၟတ်လိုန်ဒးဂှ်ရ ကေတ်အရီုဗင်ဟွံဂတာပ် သ္ဒးချိုတ်အာဓဝါဲဂှ်မာန်ရောင် ဂွံတီကေတ်ရ။

ညးဒးချိူတ်အာလဝ် (မိဖျူဖျူ)ဏံဂှ် ပွိုင်ဍုင်ဇြပ်ဗု၊ ဇာတိကွာန်ပၚ မဒှ်သၟတ်မၞိဟ်ဗြဴ နူကဵုဍုင်ပိုဲတေံမွဲတၠရောင်တုဲ ဒှ်သာ်ဂှ်ရ နူကဵုဂကောံရီုဗင်ဟံင်ပြာ်မၞိဟ်သေံတအ် ကပှ်သီဂိုင်ကေတ်ဇွဂှ်တုဲ ပလံင်ပစိုပ်ဏာရုင်ဂဥုဲ စၟဳစၟတ်ဒၟံင်တင်နင်ပရူပရာနွံရ။

ပ္ဍဲကၟိန်ဍုင်သေံဂှ် စပ်ကဵုပရေင်ကွဳစက်၊ ကွဳလိုန်ဓါတ်ဗ္ဂပ်၊ ပရေင်တေက်ဇီုတအ် မွဲနှေံမွဲနှေံ ဒှ်ကၠုင်တုဲ သၞာံ (၂၀၂၃) တုဲကၠုင်တေံဂှ်လေဝ် ပ္ဍဲခရိုင်ဇြူရာတ် သၟာကမၠောန်ကောန်ဍုင်မန်ဗၟာ ဂကောံသ္ၚိကၟိန် (၃) တၠ ဟိုတ်နူကွဳလိုန်ဓါတ်ဗ္ဂပ်ဂှ်ရ ဒးချိုတ်အာ သီု(၃) တၠတုဲ သွက်သၟာကမၠောန်ကောန်ဍုင်မန်ဗၟာပိုဲတအ်မ္ဂးတှ်ေ ထေက်ကဵုသ္ဒးစွံသတိဇၞော်ဇၞော်မာန်ရောင်။