စရိတ်ကတ်ပညာတန်သၠုင်ဂှ် ၚုဟ်သၠုင်တိုန်မံင်ဂှ်တုဲ ဂွံပ္အပ်စွံဘာကဵု ကောန်ဇာတ်ဇကုဂှ် ဒှ်ဒၟံင်ဆိုအ်ဗကဵု ပရေင်ဩန်နွံရောင် မိမကွးဘာလ္ၚဵုတအ် ဟီုကရောတ်ဒၟံင်နွံရ။
ပ္ဍဲကဵုပ္အပ်စွံဘာဂှ် ဟွံဒးစရိတ်ကီုလေဝ် သွက်ကွးဘာတန်သၠုင်တအ်မ္ဂး ဂျူယှေန်ဂှ် ဒှ်ဒၟံင်အဓိကနူဘာဏီဂှ်တုဲ စရိတ်ဂျူယှေန်သၞာံဏံဂှ် ဗက်ဗွဝ်ဖျာတုဲ ၚုဟ်သၠုင်တိုန်ကီုဂှ်ရ မိမကွးဘာတန်သၠုင်တအ် ဒှ်ဆိုအ်ဗဒၟံင်နွံရ။
“ကွးဘာ ၁၀ တန်မွဲ သၞာံဏံတှ်ေ အောန်အိုတ်ဂှ် ၃၀ ကိုဋ် ဂၠိုင်ညိ ၃၅ ကိုဋ် သၠုင်အိုတ် ဒဵုကဵုအကြာ ၅၀ ကိုဋ်နွံမံင်၊ ဂွံအပ်စွံဘာ ဂွံအပ်ဂျူယှေန် သၞာံဏံဂှ် ဆိုအ်ဗမံင်ဖိုဟ်၊ တော်ကဵုလၟိဟ်ဩန်ကဵု ၚုဟ်ဖျာ ၚုဟ်ထဝ်ဂှ် ဍေံဟွံဂၠိုင်ကီုလေဝ် ဇကုမၞိဟ်ဟွံမွဲတှ်ေ ဩန် ၃၅ ကိုဋ် ၅၀ ကိုဋ်ဟီုဂှ် ဝါတ်ပိက်မံင်” သာ်ဝွံ မိမကွးဘာတန်သၠုင် ပွိုင်ဍုင်မုဟ်ဍုင် မိထိုဲယျဳ ဟီုရ။
ကွးဘာ ၁၀ တန် (Grade 10) မွဲတၠမ္ဂး စရိတ်ဂျူယှေန်၊ စရိတ်ဒၟံင်၊ စရိတ်စ ပွိုင်မွဲသၞာံမ္ဂး သဝ်အိုတ် အကြာ ၃၀ ကိုဋ်၊ ကွးဘာ ၁၁ တန် (Grade 11) မ္ဂး အကြာ ၃၂ ကိုဋ်တုဲ ကွးဘာ ၁၂ တန် (Grade 12) မ္ဂး အကြာ ၃၅ ကိုဋ်နွံရ။ မွဲဒၞာဲကဵုမွဲဒၞာဲ ၚုဟ်မး ဟွံတုပ်နွံတုဲ ဒၞာဲဒၟံင်လေဝ် ကဆံင်သၠုင် ကဆံင်သဝ်နွံတုဲ ၚုဟ်မးဂှ်လေဝ် တၞဟ်ခြာနွံညိညိရ။
ခြာဟွံလအ်ဏံမ္ဂး စိုပ်အခိင်ပ္အပ်ဘာရတုဲ ၚုဟ်စရိတ်ပ္အပ်စွံဘာ ကုကောန်ကွးဘာတန်သၠုင်တအ်ဂှ် ဟိုတ်နူၚုဟ်က္ဍင်ဗက်တိုန်ဗွဝ်ဖျာတုဲ မိမကွးဘာပရေင်ပိုန်ဒြပ် ဟွံပြေပြံင်လ္ၚဵုတအ်မ္ဂး သွက်ဂွံဖန်စွံဘာကုကောန်ဇာတ်ဇကုဂွံ ဆက်မံင်အာဘာမာန်ဂှ် ဒှ်မံင်တင်ကော်ဆဴ ဇၞော်ဇၞော်မွဲရ။
“ဇကုမၞိဟ်ဟွံမွဲတှ်ေ ဂွံစွံကောန်ကဵုဘာ မွဲမွဲသၞာံ ဒးဂစာန်ကၠောန် ပကောံ ဘဲဟွံသာပုဟ် လၟုဟ် အပ်ဘာဟီုဂှ် ၃၀ ကိုဋ် ၅၀ ကိုဋ် ဟီုဂှ်တှ်ေ မိမကွးဘာ ဗီုကဆံင်ပိုဲဏံ ယီုဝါတ်တၟာဂလိုင်ဏောင် ဗီုလဵုဂွံသ္ပဂှ် ဝါတ်မံင်ဖိုဟ်” မိမကွးဘာ ၁၀ တန် နူပွိုင်ဍုင်ဇြပ်ဗု မိအေတာန် ဟီုရ။
သၞောတ်ဗ္တောန်ပညာဘာတန်အလဵုအသဳ (ကံင်သဳပၞာန်) တ္ၚဲဏံဂှ် ၜိုန်ရဒုင်လဝ်ယၟု ဗ္တောန်ပညာမသက္ကုၚုဟ် (သၟးသၟး) ဂးကီုလေဝ် ကွးဘာဂွံအံင်ဂှ် စတမ်နူ တန်မူလ၊ တန်ဒေါဝ်၊ တန်သၠုင်ဂှ် စှ်ေအာသၞောတ် ဒးအပ်စွံဗ္တောန်လိက် ပ္ဍဲဂျူယှေန် (ဗ္တောန်လိက်မ္ၚးဘာ) ဖအိုတ်ရ။
စရိတ်ၚုဟ်ဗ္တောန်ပညာသၞာံဏံဂှ် ဗက်တိုန်ဒၟံင်ၚုဟ်ဗွဝ်ဖျာကီုတုဲ စရိတ်ဂျူယှေန်၊ စရိတ်တိက်ဒၟံင်ကီု၊ စရိတ်စကီုဂှ် က္ဍင်ဗက်တိုန်အာ နူသၞာံတုဲကၠုင်တေံ ၁၀ ကိုဋ်ပြင်မံင်ရောင် ဂွံတီကေတ်ရ။
