ဒပ်ပၞာန်ဗၠးၜးကောန်ဂကူမန် (ဗ္တိုက်သရိုဟ်တၠအဝဵုပၞာန်) MNLA-AD ကေုာံ ဒပ်ပၞာန်ဗၠးၜးဍုင်မန် (MLA) တအ် ပံင်တောဲဒက်ပတန်လဝ် “ဒပ်မန်ရာမည” ဂှ်ဝွံ နကဵုဒပ်ပၞာန်တအာင် (TNLA) တအ် ဗီုပြင်မဟာမိတ်မွဲ ပံင်တောဲရေင်တၠုင်အာမွဲစွံရောင် လလောင်ပတိတ်ရ။
တုဲကၠုင်ဂိတုမေ၊ စၟတ်တ္ၚဲ ၂၄ တေံ NMSP-AD ကဵု MLA တအ် ပံင်တောဲဒက်ပတန်အာ “ဒပ်မန်ရာမည” ရောင် လလောင်ပတိတ်ကၠုင်တုဲဂှ်ဗက် သွက်ဂွံပံင်တောဲရေင်တၠုင်အာမွဲစွံကု“ဒပ်မန်ရာမည” ဂှ် ဒပ်ပၞာန်တအာင် (TNLA) လလောင်ပတိတ်ကၠုင်ရ။
စပ်ကဵုပံင်တောဲဒက်ပတန် ဒပ်ပၞာန်မန်သာ်ဝွံဂှ် ဒှ်ဂၠံင်တရဴဍာံပြမွဲကီု၊ လ္တူပံင်တောဲကၠုင်ညးသ္ကအ်ဗီုဏံတုဲ နကဵုဒပ်ပၞာန်တအာင် (TNLA) လေဝ် ဒုင်တၠုင်မိပ်စိုတ်ဗွဲမလောန်ရောင် ဂးရ။
နကဵုကောန်ဂကူမန်၊ ဝ၊ တအာၚ်တအ်ဝွံ ဂကူညးကဵုညး ညံင်ဂွံပါလုပ်ပ္ဍဲပၠန်ဂတးဂှ် ဒးစန်ဒက်တုဲ ညံင်ဂွံစဵုဒၞာအာတိဍာ်ဒေသဇကု၊ ကောန်ဂကူဇကုမာန်ဂှ်လေဝ် ဒးပကောံပကေဝ် ဒက်ပတန်စန်ဒက်အာ ဇြဟတ်ဒပ်ပၞာန်ခိုင်ခိုင်မွဲမာန်လေဝ် နွံပၟိက်ရောင်။
တင်ရန်တၟအ် “ဒပ်မန်ရာမည” ဝွံ တုပ်တဴမံင်ကဵုဒပ်ပၞာန်တအာင်ကီု၊ ဟိုတ်သာ်ဝွံတုဲ စၟတ်သမ္တီအာ နဒဒှ်ဒပ်မဟာမိတ်မွဲကီု၊ ပၠန်ဂတးဏံ ဗွဲမပြဟ် ဂွံအံင်ဇၞးအာမာန်ဂှ် ပံင်တောဲရေင်တၠုင်အာမွဲစွံရောင် ချုဓမံက်လဝ် ပ္ဍဲလိက်လလောင်ဝွံရ။
ဒပ်ပၞာန်ဗၠးၜးကောန်ဂကူမန် MNLA-AD ကဵု ဒပ်ပၞာန်ဗၠးၜးဍုင်မန် MLA တအ်ဝွံ ရန်တၟအ်ကဵု သ္ဂောံဗတိုက်သရိုဟ်တၠအဝဵုပၞာန်၊ သ္ဂောံဓမံက်ပတိုန်ဍုင်မန် မဍိုက်ပေင်ကဵုအခေါင်အရာတုပ်သၟဟ် ကေုာံ အခေါင်ကံကုသဵုဇကု ဇကုဖန်ဖက်ကေတ်မာန်တုဲ ပံင်တောဲဒက်ပတန်ကၠုင် “ဒပ်မန်ရာမည” ဝွံရ။
“ညံင်ဂွံဗတိုက်သရိုဟ်ဖျေံအာ တၠအဝဵုပၞာန် ဗွဲမပြဟ်မာန်၊ အတိုင်ကောန်ဂကူပိုဲ ရန်တၟအ်လဝ်ဂှ် ဂွံကတဵုဒှ်တိုန်ကၠုင်မာန်၊ ဂကူမန်ပိုဲ ဂွံကလေင်ကလိဂွံ တိဍာ်မန်ပိုဲပၠန်မာန်၊ အခေါင်အရာပိုဲမာန်ဂှ် ပိုဲတအ် မံင်အာအတိုင်ဏံဟွံဂွံ ဒးပံင်တောဲဏောင်။ ပံင်ကောံဏံဂှ် ပံင်ကောံသာမညဟွံသေင်ရ၊ ဒှ်အာဗီုပြင် မွဲဒပ်ဓဝ်ရ” သာ်ဝွံ နူဂအုပ်ရုင်ပၞာန် ဒပ် MLA ဗညာမင်ကာန်စဳဂှ် ဟီုကဵု ဌာန်ပရိုင်ဗၠးၜးမန်ရ။
ပ္ဍဲကဵုဒပ်မန်ရာမညဝွံ ရုဲစှ်ပတိုန်လဝ် ကမ္မတဳက္ဍိုက်ပ်ပရေင်ဍုင်ကွာန်၊ ပရေင်ပၞာန် (၉) တၠတုဲ နဒဒှ်ဥက္ကဋ္ဌ နာဲဇဲယ၊ ဒု-ဥက္ကဋ္ဌ နာဲလျးဂကူ၊ ညးအုပ်ကာ နာဲဗညာလဴတအ် ပါလုပ်ရ။
တုဲပၠန် သ္ဂောံဓမံက်အာရုပ်ရဴပရေင်ပၞာန် “ဒပ်မန်ရာမည” မာန် ပံက်ပတိုန် ကမ္မတဳပၞာန် (၇) တၠတုဲ ရုဲစှ်ခန် ကၞက်ပတိုန် နဒဒှ် ညးဂအုပ်က္ဍိုက်ပ်ဒပ်ပၞာန်ဂှ် ဒု-သ္ကိုပ်ပၞာန်စၠန်ထဝ်၊ ဒု-ညးဂအုပ်က္ဍိုက်ပ်ဒပ်ပၞာန် (၁) သ္ကိုပ်ဗိုလ်ဇၞော်သဵုဝေန်၊ ဒု-ညးဂအုပ်က္ဍိုက်ပ်ပၞာန် (၂) ဂှ် သ္ကိုပ်ဗိုလ်ဇၞော်ကျဳဇြာန်တအ် ပါလုပ်ရောင်။
“ဒပ်မန်ရာမည” ဝွံလေဝ် ပံင်တောဲအာကဵု ဂကောံမဟာမိတ်ပၠန်ဂတးကောန်ဍုင်အရေင်ဘဝတုပ်ဂမၠိုင် ကေုာံ ဒပ်ပၠန်ဂတး စဵုဒၞာညးဍုင်ကွာန်ဂမၠိုင်တအ်တုဲ လုပ်အာပေဲါဗတိုက်မွဲစွံရောင် လလောင်ပတိတ်လဝ်ကီုရ။
