ပ္ဍဲအခိင်ကၟာတ်ဘာတန် ပွိုင်ၜါဂိတုဏံဂှ် ကွးဘာတအ် ဒးဂစာန်ကတ်ဒၟံင်ပညာသဇိုင် သွာင်နာနာနွံတုဲ ဂွံအခိင်ဇူအောန်ဗွဲမလောန်ရောင် ကွးဘာဗွဲမဂၠိုင်ဂှ် ဟီုကရောတ်မံင်နွံရ။

ကၟာတ်ဘာတန်တုဲမ္ဂး ဘာဥတုကညင်ဗ္တောန်လိက်မန်ကီု၊ ပရေင်ကတ်လ္ၚတ်အေန်ကလိက် ကေုာံ ကမ်ပျူတာကီု မိမကွးဘာတအ် ဗလးထဴကဵု ကောန်ဇာတ်တအ် ကတ်လ္ၚတ်ဒၟံင်သွာင်ဂၠိုင်မံင်တုဲ ကွးဘာဗွဲမဂၠိုင်ဂှ် ရိုဟ်ရေင်ကရောတ်တဴမံင်ရ။

“ကၟာတ်ဘာတုဲ ဂွံမွဲၜါတ္ၚဲဂှ် ဒးတိုန်ဘာဥတုကညင်၊ တုဲဂှ် ဒးတိုန်ဗ္တောန်လိက်အေန်ကလိက်ကဵု ကမ်ပျူတာပၠန်၊ ကၟာတ်ဘာၜါဂိတုဂှ် အခိင်ဇူဟွံမွဲဟဂှ်” သာ်ဝွံ ကွးဘာကောန်ဂကူမန် Grade 9 နူပွိုင်ဍုင်ဇြပ်ဗု မိသဇင် ဟီုရ။

ဘာဥတုကညင်ဂှ် ပွိုင်ဍုင်လ္ၚဵုမ္ဂး ကၟာတ်ဘာတန်တုဲဗက် ပံက်ကၠုင်တုဲ အတးတုဲဂှ် သွဟ်လေဝ်နွံ၊ ပွိုင်ဍုင်လ္ၚဵုဂှ် ဗ္တောန်ဒၟံင် စဵုကဵုအခိင်တ္ၚဲဏံလေဝ်နွံရ။

ဒေသလ္ၚဵု သွဟ်လိက်ဘာဥတုကညင်တုဲဂှ် မိမကွးဘာလ္ၚဵုတအ် ထဴကဵုကောန်ဇာတ်ဇကု အာတိုန်ကတ်လ္ၚတ်လိက် အေန်ကလိက်ကဵု ကမ်ပျူတာပၠန်တုဲ ခြာဟွံလအ် စိုပ်အခိင်ပံက်ဘာရဂှ် ကွးဘာဗွဲမဂၠိုင်တအ် မတ်ဗ္ၜူဒၟံင်ကဵု ပရေင်ကတ်လ္ၚတ်ပညာ မ္ၚးဘာအိုတ်ရ။

ဗီုဒဒှ်ကောန်ကွးဘာတအ် ဒးဂစာန်ကတ်ဒၟံင်ပညာသဇိုင်ဂှ် ကွးဘာ Grade 10 နူဘာတန် (အလဵုအသဳ) ပွိုင်ဍုင်မုဟ်ဍုင်မွဲတၠ ဟီုရိုဟ်ရေင် သာ်ဏံပၠန်ရ။

“လိက်မန်ဂှ် ၜိုတ်ဂွံဂှ် လေပ်မံၚ်ညိညိတုဲတှ်ေ ဘာဥတုကညင်ဂှ် ဟွံဒှ်မံင်ဟဂှ်၊ နူကၟာတ်ဘာဗက်ဂှ် တိုန်မံင်အေန်ကလိက်ကဵု ကမ်ပျူတာ၊ ပ္ဍဲဂှ်တှ်ေ လိက်မန်လေဝ် ပါမံင်မွဲအခိင်ကီု၊ ဟွံလအ်တှ်ေ သွဟ်လိက်ရ၊ ဆဂး မုဟွံလအ် စိုပ်အခိင် ပအပ်ဘာပၠန်ရတှ်ေ ကၟာတ်ဘာဟီုလေဝ် အခိင်ဇူဟွံမွဲဟဂှ်” သာ်ဝွံ ကွးဘာဂှ် ဟီုရ။

ပ္ဍဲဂကောံဗ္တောန်လိက်ပတ်မန် ကေုာံ ယေန်သၞာင်ဗုဒ္ဓဘာသာအလုံဒေသရးမန်ဂှ် ကၠာနူတ္ၚဲပအပ်ဘာ ၃ တ္ၚဲ၊ ဂိတုပသာ် (၁၁) စွေက်၊ (မေ ၂၂) ဂှ် သွဟ်လိက်တုဲ တ္ၚဲစှ်ေဘာဂှ် ဒှ်တ္ၚဲစပံက်ပံက်ဘာ ဂိတုဇှ်ေ (၆) မံက်၊ (ဂျောန် ၁) ဂှ်ရ။

ကွးဘာ အဆံင်တန်လ္ဒောဝ်၊ အဆံင်တန်သၠုင်ဗွဲမဂၠိုင်ဂှ် မတ်ဗ္ၜူဒၟံင်ကဵု မပ္တံဘာဥတုကညင်၊ ဘာအေန်ကလိက် ကေုာံ ကမ်ပျူတာ၊ ဂျူယှေန် ပရေင်ကတ်လ္ၚတ်ပညာမ္ၚးဘာအိုတ်ဂှ် ဂွံတီကေတ်ရ။