ပ္ဍဲကၟိန်ဍုင်သေံ စနူဂိတုမေစၟတ်တ္ၚဲ (၁၈) စဵုကဵုစိုပ် ဂိတုမေ (၂၄) ပွိုင်မွဲသတ္တဟဏံဂှ် မၞိဟ်ဒးဒုင်ကၠောံထၞာန်ယဲကိုဝ်ဗေတ် နွံလၟိဟ် (၆၅၀၀၇) တၠတုဲ ပ္ဍဲကဵုဂှ် မၞိဟ်ဒးချိုတ်အာ (၈) တၠရောင် ပရိုင်သေံဂမၠိုင် ချူဓမံက်လဝ်ရ။

ပ္ဍဲကဵုသၞာံ ၂၀၂၅ စနူဂိတုဂျာန္နဝါရဳ စဵုကဵုစိုပ် ဂိတုမေ (၂၈) တ္ရဲဏအ်ဂှ်ဝွံ မၞိဟ်ဒးဒုင်ကၠောံထၞာန်ယဲကိုဝ်ဗေတ် နွံလၟိဟ် (၂) ကိုဋ်တၠပြင်တုဲ ပ္ဍဲကဵုဂှ်တှ်ေ မၞိဟ်ဒးချိုတ်အာ နွံကၠုင် (၅၁) တၠရောင် ဂွံတီကေတ်ရ။

အတိုင်စရင်ဌာနဝန်ဇၞော်ပရေင်ထတ်ယုက်သေံတအ်လလောင်ပတိတ်လဝ်ဂှ်တှ်ေ လၟိဟ်မၞိဟ်ဒးဒုင်ကၠောံထၞာန်ယဲကိုဝ်ဗေတ် ဂွံလဝ်တင်နင်ချိုတ်တ်ပၠိုတ်တ်ဂှ် နွံမံင် (၂၀၄,၉၆၅) တၠ၊ ဟိုတ်နူယဲဂှ်တုဲ မၞိဟ်ဒးချိုတ်ကၠုင်လဝ် (၅၁) တၠ နွံကၠုင်ရ။

လၟုဟ်ပြဟ်ဟ်ဏံ မၞိဟ်ဒးဒုင်လွဳလွတ်မံင် ပ္ဍဲကဵုရုင်ဂဥုဲ၊ ဗဒမ်ဂဥုဲတအ် နွံလၟိဟ် (၃,၅၄၄) တၠတုဲ၊ မၞိဟ်ယဲဗၠးပရေင်ထတ်ယုက်ကလေင်ခိုဟ်တအ်ဂှ် နွံလၟိဟ် (၆၁,၄၆၃) တၠရောင် လလောင်လဝ်ရ။

ပ္ဍဲကၟိန်ဍုင်သေံ မၞိဟ်ဒးဒုင်ကၠောံထၞာန်ယဲကိုဝ်ဗေတ်နွံဂၠိုင်ဂှ်တှ်ေ ဍုင်ၜင်ကံက်ဂှ် နွံလၟိဟ် (၁၂,၁၈၄) တၠ၊

ခရိုၚ်ချောန်ၜူရဳဂှ် နွံလၟိဟ် (၄,၀၁၈) တၠ၊ နန်ထၜူရဳဂှ် နွံလၟိဟ် (၂,၈၉၁) တၠ သမုပရာကာန်ဂှ်နွံလၟိဟ် (၂,၈၃၇) တၠ ရယံင်ဂှ်နွံလၟိဟ် (၂,၃၅၅) တၠနွံတုဲ မၞိဟ်ဒးဒုင်ကၠောံယဲဗွဲမဂၠိုင်တအ်ဂှ် အာယုက်အကြာ (၂၀) သၞာံ ကဵု (၂၉) သၞာံဂှ် (၁၁,၂၉၈) တၠ၊ အာယုက်အကြာ (၃၀) သၞာံ ကဵု (၃၉) သၞာံဂှ် (၁၂,၈၆၀) တၠ၊ အာယုက်အကြာ (၆၀) သၞာံ ကဵု (၆၀)သၞာံ လ္ပါ်လတူဂှ် (၉,၈၈၇) တၠနွံကၠုင်လဝ်ရောင် လလောင်ပတိတ်လဝ်ရ။

လက်သဏ်ယဲကိုဝ်ဗေတ်ဏံဂှ်ဝွံ မပ္တံကဵု ဇကုဂမ္တဴ၊ ခ္ဍက်၊ ကအ်ဂိ၊ ရှ်သာကၠေံ၊ ဍောင်ၜိုတ်အိုတ်ဇိုင်တဲ ဒှ်ကၠုင်မာန်တုဲ ဗွဲတၟေင် ကောန်ၚ္ၚာ်သၟဝ်အာယုက် (၃) သၞာံ၊ ညးဗြဴမၞုံကဵုဂဝ်ဂၞဴ ကဵု မၞိဟ်အာယုက်ဇၞော် (၆၅) လ္ပါ်လတူ မၞိဟ်ဒှ်ယဲဍာ်ဇမၠိင်တအ်ဂှ် ထေက်ကဵုသ္ဒးစွံသတိဇၞော်ဇၞော်မာန်ရ။

ပ္ဍဲကဵုကၟိန်ဍုင်သေံဂှ် သၟာကမၠောန်ကောန်ဍုင်မန်ဗၟာပိုယ်တအ် မၞုံဒၟံင်တန်တဴကၠောန်မံင်ကမၠောန်ဗွဲမဂၠိုင်တုဲ အကြာယဲကပ်ကိုဝ်ဗေတ် – ၁၉ ကၠောံထၞာန်က္တဵုဒှ်ကၠုင်မံင်လၟုဟ်ဏံဂှ် နကဵုကောန်ဍုင်မန်ဗၟာတအ်လေဝ် ထေက်ကဵုသ္ဒးစွံသတိဇၞော်ဇၞော်မာန်တုဲ အာကၠုင်တိတ်မ္ၚးတှ်ေ စုတ်ကဵုယာတ်ဂြောပ်မုဟ်ပါင် (Mask) တအ်ညိဂှ် မိက်ဂွံဆဝ်ပ္ၚုဟ်ကဵုဏာသမ္တီ ကုသၟာကမၠောန်ကောန်မန်ဗၟာပိုယ်အိုတ်ရ။