နူတနေံဏံ ဂိတုမေ စၟတ်တ္ၚဲ (၂၆) အခိင်နူဂယး ၜိုတ် (၉) နာဍဳသေံ လ္ပါ်ကဵုပယျဵုသေံ-ဗၟာ ဒေသကျာ်ပိဂှ် သၟတ်တြုံမွဲတၠ ဟိုတ်နူကၠတ်ထပၠုပ်ဏာဩန်သေံ ဗွဲဟွံလုပ်သၞောဝ် ဗၞတ် (၁၇.၉) ပြကောတိကိုဋ်ၝာတ်ဂှ်ရ နူကဵုဒပ်ဗၠာဲသၟိင်သေံ တၞံပကုက်တအ် ရပ်သီဂွံဏာလဝ်ရောင် ဂွံဆဵုကေတ်ပရိုင်ရ။

အပ္ဍဲကဵုမရပ်စၟဳစၟတ်ဂွံ ဂကူကွဳစက် (TOYOTA Fortuner) အရံင်သာ်ဗ္စံက်မွဲဖ္ဍိုက်ဂှ် ဩန်သေံ ဗၞတ် (၁၇.၉) ပြကောတိကိုဋ်ၝာတ် စုတ်လဝ်ကဵုထိုင်ခွက် (၂) ထိုင်တုဲ ဩန်တဏံဂမၠိုင်ဂှ် သွက်ဂွံထပၠုပ် ပ္ဍဲဩန်ဗါန် ပွိုင်ဍုင်သၚ်္ခဠၜူရဳ (ကွာန်ဝၚ်္က) တေံရောင်ဂးတုဲ အပ္ဍဲကဵုဂှ်မဂး တၞး (၅၀၀) ၝာတ် ကဵု တၞး (၁၀၀၀) ၝာတ် ပါမံင်ရောင် ဂးရ။

ဒှ်သာ်ဂှ်ရ သၟတ်တြုံ မၞုံအာယုက် (၂၅) သၞာံဏံဂှ် ဟိုတ်နူကၠတ်ထပၠုပ်ဏာဩန်သေံ ဗွဲဟွံလုပ်သၞောဝ်ဂှ်ရ ရပ်ထိင်လဝ် ပ္ဍဲကဵုရုင်ဗၠာဲသၟိင်သေံသၚ်္ခဠၜူရဳ (ကွာန်ဝၚ်္က) ဂှ်တုဲ စၟဳစၟတ်ကေတ်အရေဝ် ကဵုအာဒုဟ်ဒဏ်ရောင် ဂွံတီကေတ်ရ။

နူတနေံဏံ အပ္ဍဲကဵုအခိင်သဝ်တ္ၚဲဂှ်ရ သၟတ်မၞိဟ်တြုံ မရပ်ဂွံလဝ်ဂှ် နူကဵုညးတာလျိုင်ဗၠာဲသၟိင်သေံတအ် ကဵုထ္ၜးဒၞါဲပၞော်ဂၠံင်မကၠတ်လုပ်ကၠုင်လဝ်တုဲ ဟိုတ်နူကၠောန်သ္ပ ပရေင်ဟွံလုပ်ကဵုသၞောဝ် ပ္ဍဲတိဍာ်ဒေသပယျဵုသေံဏံဂှ်ရ နူကဵုဗၠာဲသၟိင်သေံတအ် ဂၠိုက်ဂၠာဲအာပရူဒဒှ် သုင်စောဲစကာဒၟံင် ဩန်ၝာတ်ဂှ်ဏီရောင် ဂွံတီကေတ်ရ။

အပ္ဍဲကဵုဒေသပယျဵုသေံ-ဗၟာ ဍုင်ကျာ်ပိဂှ်တှ်ေ စပ်ကဵုပရေင်ကၠတ်ပလံင်ထပၠုပ်မံင် ကပေါတ်ဟွံလုပ်သၞောဝ် ဂဥုဲၜူမာဲ၊ ၜံက်၊ စၞစဒကှ်တအ်နွံဂၠိုင်ဂှ်ရ နူကဵုဒပ်ပၞာန်သေံမင်ပယျဵု (တၞံပကုက်) တအ် စၟဳစၟတ်တေင်ဂြတ်မံင်တုဲ ကပေါတ်ဟွံလုပ်ကဵုသၞောဝ်ကဵု မၞိဟ်ကၠတ်လုပ်ဍုင်သေံတအ်ဂှ်လေဝ် ရပ်ဂွံမံင်မွဲနှေံမွဲနှေံနွံရောင် ဂွံတီကေတ်ရ။