သ္ရဳဂၠိပ်လညာတ်၊ အံက်သာ

“ပး အဲမိက်သ္ဂောံအာချိုတ်ထောံကွေံ၊ သွဟ်လဝ်ဒးမံင် ဇၟာပ်ပုစ္ဆာဖိုဟ် ပ္ဍဲစရင်အံင် ယၟုဇကုဟွံပါ ဒုင်လဝ်ဒဒိုက်မွဲမွဲသၞာံ ဂစာန်ကတ်လဝ် ဂလိုင်ဏံဒးဒှ်ကီု” ရမျာင်ကောန်နာဲခၟဳဗၠာဲမွဲဇကု ခတိုဟ်တိတ်ကၠုင် နူပ္ဍဲဂၠံသြိုဟ် ပ္ဍဲဗ္ဒမ်ဘာဂုတ် တိုက်ပရိယတ္တိမွဲတိုက်ရ။ ရမျာင်ကောန်သင်ကတ်လိက် ကရေဝ်ကရောတ်ဒၟံင် ဗီုဗီုဏံ မွဲတိုက်ပရိယတ်ဓဝ်ဟွံသေင် တိုက်လိက်မန်ပိုဲတံ ဗွဲမဂၠိုင် ဒးဒုင်စသိုင်ကၠုင် ကေင်မိင်ကၠုင်မံင်ရ။

ဘဝဂကူမန်ပိုဲ ပ္ဍဲဘဝခရှ်သၟးဟွံသေင် ဒးဒုင်ပ္ဍဵုပ္ဍိုက်သ္ပမာန်ဒၟံင်ကဵု ဂကူမဟာဝါဒဳတံ ဘဝဒှ်ခၟဳသင်လေဝ် ဒးဒုင်ပ္ဍဵုပ္ဍိက်သ္ပမာန်ဒၟံင် မွဲနဲမွဲဗီုရ။ ညံင်သ္ဂောံရုန်တိတ်နူဘဝဍိက်မာန် ကမ်ကုသဵုဇကု ဇကုမ္ဒးကၠောန်ကေတ်တ် ဖန်ကေတ်တ်ထေက်ရ။ ယီုကဵုကသိုင်မုဟ်ညးတၞဟ်မ္ဂး ယီုဖဲဟွံသေင် ပ္ဍဲဂကောံသင်မန်ပိုဲတံ ထေက်ကဵုဒးချပ်ဗ္စာ ဇြိုဟ်ဟ်နက်က်ထေက်ရောင်ဂှ် ပတိုန်ထ္ၜးဏာ နူကဵုလိက်ပရေင်ဝွံရ။

“မုၝလေပ် မုၝတီ ၝဂွံကၠုင်ဝေတ်မံင်သင် ကမၠောန်သင် မုဟွံဆေင်ကဵုခရှ်” ဂလာန်ဗီုဏံ ဒၟါနူလိက်မွဲပိုတ်ဏံတုဲ ကာလဒးဒုင်လေဝ် ဒးဒုင်မာန်ဒၟံင်ရောင်ဂှ် နူကဵုချူလိက်ဏံ တော်ချပ်လဝ်တုဲတုဲရ။ ဂလာန်ခရှ် ဟီုပတိုန်ထ္ၜးကဵုသင်ဂှ် ဗွဲမဂၠိုင် ဒးဒုင်ဟီုစ တကေတ်ဝေတ်က္ဍိုပ်ရ။ အရာလဵုမွဲဟွံဟီု တန်တဴကဵု လစွံစိုတ်ရ။ စွံပတန်လဝ်ဂၠံစိုတ်ဗွဲမ္ဒးရးတုဲ ချပ်ဗ္စာမ္ဂး ဟွံညာတ်ဒုဟ်ရ။ စွံပတန်လဝ်ဂၠံစိုတ်ဒးဒးရးရးဟွံမာန်တုဲ ချပ်ဗ္စာနကဵုအတ္တမ္ဂး ညာတ်ဒုဟ်ရ။ လိက်ပရေင်ဏံ ဒုင်သဇိုင်ကဵု ပရေင်ဒးဒုင်စသိုင်ပူဂဵုသၟးတုဲ ချူလဝ်ဟွံသေင် ဗွဲတၟေင် သၟာန်လ္ၚတ်လဝ် အကြာကောန်သင်ကတ်လိက်တံ ဗွဲမဂၠိုင်တုဲဟေင် ဒှ်ချူကၠုင်လိက်ပရေင်ဏံရ။

ကောန်သင်ပရိယတ် အံင်ဇၞးလဝ်တန်ဓမ္မာစရိယ ပိကၞပ် ပ္ဍဲမွဲသၞာံဓဝ်မွဲဇကု ညးဟီုထ္ၜးဂှ် “ဘဝကောန်သင် ကတ်လိက်မန်ပိုဲ ဒးသွဟ်မံင်ပ္ဍဲအလဵုအသဳဂှ် ဒဒိုက်ဇၞော်မံင် ဒကာဘာ၊ သွဟ်လဝ်တုဲ အံင်ဟာ ဟွံအံင်ဟာဂှ် ဟွံဒှ်ဒဒိုက်စိုတ်ပုဟ်၊ စရင်အံင်တိတ်တေံ ယၟုဇကုပါဟာ ဟွံပါဟာဂှ်ဏောင် ဍောင်မံင်စိုတ်ရ။ ကျာ်ဇၞော်ပိုဲလဴ ဘာတိုက်လိက်မန် ယၟုဇၞော်ပြာကတ်မွဲတိုက်ဂှ် ကျာ်ဇၞော်ဂှ်လေဝ် အဆံင်အလံင်ညးဇၞော်မံင်ကီုတုဲ အခိင်စၟဳစၟတ်လိက်ဂှ် ညးလေဝ်ပါမံင် လုပ်စိုပ်မံင် ပ္ဍဲဌာနစၟဳစၟတ်လိက်ဂှ်ကီုရ။ စၟဳစၟတ်လိက်တုဲဒှ်အိုတ်တုဲ ညးကျောဝ်ရံင် စရင်ကောန်သင်ဘာညး အံင်(၅)ဇကုရ။ ကာလစရင်ဍေံတိတ်ကၠုင်ဂှ် ယၟုသင်အံင်(၅)ဇကုဂှ် မွဲဇကုလေဝ် ဟွံပါကၠုင်တုဲ ယၟုသင်ဟွံအံင်လဝ်(၃)ဇကုဂှ် ပါကၠုင်ပ္ဍဲစရင်အံင်ရ။ ဒှ်မံင်အေဗီုဂှ်ဏောင် ဒကာဘာ” ညးလဴထ္ၜးရ။

ညးချူလိက်ဏံ ပလံင်ဒၟံင်သင်သွဟ်လိက် ရိုဟ်ဒဒှ်သၞာံကီုတုဲ မွဲသၞာံဂှ် သင်သွဟ်လိက်တံ တိတ်ကၠုင်နူဗ္ဒမ်သွဟ်လိက်ဂှ် မုက်မတ်အီတ္ၚက် သၠောင်မံင်သၟးရ ဂွံဆဵုကေတ်တုဲ သၟာန်ရံင်မ္ဂး သွဟ်လောဲကွေံ သွဟ်ဒးမံင်သၟးရဂၠိုင်ရောင် ဂွံတီကေတ်ရ။ ဂုဏ်အာစာဖျေံဗ္တောန်မံင်လိက် မွဲဇကုဂှ် ဟီုတိုန် “အေဗီုဏံ ဒးဂွိင်အိုတ်ရ။ သွဟ်လိက်လောဲတှ်ေ ကာလစရင်အံင်တိတ်တေံ ယၟုဟွံပါကၠုင်ဂှ် ဒှ်စဂၠိုင်မံင်ဏောင်” သာ်ဝွံ သ္ဂးရ။

ပိုဲတံက္လေင်ကျောဝ်ရံင် အတိက်တေံညိမ္ဂး အခိင်ညးချူလိက်တံ ဒှ်မံင်ဘဝထပိုဲတေံ အလဵုအသဳဗၟာ ကၟာတ်ထောံသင်မန် ဟွံကဵုအခေါင်သွဟ်လိက် နကဵုဘာသာမန် ပ္ဍဲပေါဲသၟာန်သွဟ်လိက် ဌာနအလဵုအသဳတံရ။ သင်မန်တံ ဟွံဒုင်တဲဒးသွဟ်နကဵုဘာသာဗၟာတုဲ ဗ္ကပ်ဗဗေင်ကဵုအလဵုအသဳ သင်မန်တံ ညးလဵုလေဝ်ဟွံသွဟ်လိက်ဗၟာရ။ စနူဂှ်တုဲ သင်မန်ဂိုဏ်ရာမည နိကာယပိုဲတံ သ္ပဒတန် နဗီုပြင်အလဵုအသဳသင်မန် သွဟ်လိက်ပ္ဍဲဘာလ္ဒောဝ်သာသနာ ဍုင်မတ်မလီု အံင်အာမ္ဂး တုပ်သၟဟ်ကဵု အဆံင်အလဵုအသဳဗၟာကီုရ။

သ္ပပ္တံနူဂှ်တုဲ သင်မန်ပိုဲတံ လိက်ဘာသာ ဇကုကဵုဇကု၊ ဌာန်သၟာန်သွဟ်လိက် ဇကုကဵုဇကု၊ သင်မန်ဇကုစၟဳစၟတ်ကေတ် ပတိတ်စရင်ကေတ် ဟွံဒးယီုစကဵု ကသိုင်မုဟ် ဂကူညးတၞဟ်ရ။ အခိင်ဂှ် ကောန်သင်ပရိယတ်တံ ဒှ်တသိုက်စိုတ်ရ။ ကမ်ကုသဵုဇကု ဇကုဖန်ကေတ်တ်ဂှ် ဣဏံရ။ လက္ကရဴဏံ အလဵုအသဵဗၟာတံ ကဵုအခေါင်ကဵုသွဟ်လိက် နကဵုဘာသာမန် ပ္ဍဲဌာနသၟာန်သွဟ်လိက် သၟိင်အလဵုအသဳတံပၠန်တုဲ သင်မန်ပိုဲတံ လၟောဝ်ဇွောဝ်ဗက်အာဍေံပၠန်ရ။ အခိင်လၟုဟ် စအာခေတ်ကဵု အံင်ပ္ဍဲဌာနအလဵုအသဳမှ ဒှ်အံင်လိက်အဆံင်စိုပ်ရ။

အခေါင်အရာဏံ ၜိုန်ရခိုဟ်ဒးရးဒၟံင်ကီုလေဝ် စှ်ေမံင်ဗဗွဲဓဝ် သွက်ကောန်သင်ပရိယတ်တံ ကီုရဟာ? သွဟ်လဝ်ဒးဒၟံင်ဖိုဟ် ပ္ဍဲစရင်အံင်ပါမံင်ဖအိုတ်ရဟာ? ပ္ဍဲစရင်အံင်ဟွံပါကၠုင်ဂှ် အခေါင်က္လေင်စၟဳစၟတ် တၞးလိက်ဇကုသွဟ်လဝ် နွံဒၟံင်ကီုရဟာ? နကဵုတင်ဟာ???? ဗွဲမဂၠိုင် နွံဒၟံင်ပ္ဍဲဂၠံသြိုဟ် ကောန်သင်ပရိယတ်တံရ။ ကောန်သင်ပရိယတ်တံဂှ် ၜိုန်ရမိက်ဂွံပံက်ဒၟံင်သြိုဟ် ပံက်ဟီုပတိတ်ကီုလေဝ် ဖေက်ဒၟံင်အာစာ ဟွံဂံင်ဟာပါင်အိုတ်ရ။

စပ်ကဵုပရေင်ပညာဏံ ခရှ်ကဵုသင်ဂှ် ဟွံတုပ်ရေင်သ္ကံလးလးရ။ လောန်ကၠုင်တုဲတုဲတေံ ပိုဲက္လေင်ကျောဝ်ရံင်မ္ဂး ခရှ်ဂှ် က္လိဂွံတဆပ်ကြာဒဳဂရဳ ပ္ဍဲဌာနအလဵုအသဳ မွဲမွဲဒၞါဲတုဲမှ ဂွံကၠောန်ပ္ဍဲကမၠောန်မွဲမွဲဒၞါဲပြေပြံင်တုဲ ပါဲဟွံဗၠး မ္ဒးသ္ပဓာန်ကဵုအလဵုအသဳဍေံရ။ သင်မန်ပိုဲတံဂှ် ၜိုန်ရက္လိဂွံလဝ် တဆိပ်ကြာတန်ဓမ္မာစရိယ ပ္ဍဲဌာနအလဵုအသဳကီုလေဝ် လွဳအာလမျီု ပတန်အာသာသနာ အကြာဘာမန် ကွာန်ဌာန်ဒေသမန်ပိုဲတံသၟးရဂၠိုင်ရောင် ဂွံဆဵုကေတ်မံင်ရ။ ဟိုတ်ဂှ်ရ သင်ကဵုခရှ်ဂှ် တၠုင်လအာတန်တဴ လွဳပရာလမျီု ဟွံတုပ်ရေင်သ္ကံရ။

သရုပ်ကၠေံ မိက်ဂွံသ္ဂးဂှ် တဆိပ်ကြာပညာလဵုဒှ်ဒှ် ဂွံလဝ်ဂှ် ခိုဟ်ဒၟံင်ဖအိုတ်ရ။ ပ္ဍဲသင်မန်ပိုဲ မိက်ဂွံကဵုဒှ်မွဲသာ်ဂှ် ပ္ဍဲဌာနအလဵုအသဳလေဝ် မိက်ဂွံသွဟ်လေဝ်သွဟ်ညိ။ ဆ္ဂး လ္ပစွံလဝ်အဓိက၊ အဓိကဂှ် မိက်ဂွံကဵုဒှ် ပ္ဍဲဂကောံဓမ္မာစရိယ ဌာနဘာလ္ဒောဝ်သာသနာ ဍုင်မတ်မလီုရ။ အံင်ဇၞးပ္ဍဲဂကောံမန်ဇကုဂှ် မိက်ဂွံကဵုဒှ်အဓိကတုဲ အံင်ဇၞးပ္ဍဲဌာနအလဵုအသဳဗၟာဂှ် မိက်ဂွံကဵုစွံလဝ်သာမညရ။ ကာလဂှ်မှ ကောန်သင်ကတ်လိက် ဂွံတိတ်ဗၠးနူဘဝဍိက်ရောင်။