မိက်ဂွံကဵုကောန်ၚာ်ဇကု ဍိုဟ်ကေက်ဇိပ်ဂၠိပ်မ္ဂး ဒးစွံဍေံ ပ္ဍဲဘာထိၚ်ဒဝ်ကောန်ၚာ် ဒၞာဲဟီုအရေဝ်ဘာသာဍေံ(မန်) ရောၚ် ညးတာလျိုၚ်ပရေၚ်ပညာကောန်ဂကူမန် မွဲတၠ ဟီုရ။

“ကောန်ၚာ်ဇကု မိက်ဂွံဍိုဟ်ကေက်တုဲ မိက်ဂွံစွံဘာထိၚ်ဒဝ်ကောန်ၚာ်ဏောၚ်ဟီုတှ်ေ ဒးစွံကဵုဍေံ ဒၞာဲဌာန်ဟီုအရေဝ် ဗ္တောန်ကဵုဍေံ အရေဝ်ဘာသာဍေံ (မန်) ဟီုဂှ်ဏောၚ်၊ အ္စာတအ် ဟီုကဵုဍေံ အရေဝ်ဍေံကၠိုဟ်မှ ကောန်ၚာ် ဍေံဂွံတီ၊ ဍေံ ဂွံကၠိုဟ်၊ ကောန်ၚာ်ဇကုဂှ် ဂကူမန် ယဝ်အာစွံဒး ဘာထိၚ်ဒဝ်ကောန်ၚာ် ဟီုအရေဝ်ဂကူညးတၞဟ်တှ်ေ ကောန်ၚာ် ဂွံကၠိုဟ်ဂှ် လ္ပဟီု ဍေံဓီုဓုဲအာ ဍေံဟွံကၠိုဟ်အရေဝ်ဘာသာတုဲ က္ဍဟ်ဍေံလေဝ် ဇြိုၚ်ဇြုဲဓီုဓုဲအာမာန်ဏောၚ်” သာ်ဝွံ ကမ္မတဳပညာဗဟဵု (သမၠဲ) မွဲတၠ ဟီုထ္ၜးကဵုရ။

ဂိတုမေ ၂၅ ဏံမ္ဂး အလုံမွဲကၟိန်ဍုၚ်ဗၟာမွဲဂှ် ဒှ်တ္ၚဲပအပ်ဘာတုဲ သွက်ကောန်ၚာ်သၟတ် အဝဲဒၟံၚ်ဘာ ဟွံစိုပ်ဏီတအ်လေဝ် ရန်တၟံကဵုကောန်ၚာ် ကောန်ဇာတ်ညးတအ် မိက်ဂွံဍိုဟ်ကေက်တုဲ နူကၠာဟွံစိုပ်အခိၚ်တိုန်ဘာဂှ် ပအပ်စွံကၠုၚ် ဘာထိၚ်ဒဝ် ကောန်ၚာ်နွံဂၠိုၚ်ကၠုၚ်ရ။

“ကောန်ၚာ်အဝဲကတ်ဗ္တောန်ပညာ ဟွံစိုပ်ဏီ အကြာ ၃ သၞာံ ၄ သၞာံဏံဂှ် ကောန်ၚာ်တအ် အဃောအဝဲဍေံ စဗ္တောန်ဟီု စဗ္တောန်ချပ်ဝေၚ်က္ဍဟ်ဍေံရဏောၚ်၊ အဵုအခိၚ်ဂှ်ဂှ် ကောန်ၚာ်တအ် ကိစ္စဇၞော်ကွေံကွေံဏောၚ်၊ ဂွံဗ္တောန်ဟီုကဵုဍေံ အရေဝ် ဘာသာဍေံ(မန်)တှ်ေ ဍေံကၠိုဟ်လောဲဏောၚ်၊ ဍေံတီလောဲဏောၚ်၊ ဍေံချပ်လောဲဏောၚ် ဍေံကေက်ပြဟ်ဏောၚ်၊ ဗီုဂှ် ဟွံသေၚ်မွဲသာ် ယဝ်ဗ္တောန်ဟီုကဵုဍေံ အရေဝ်ဘာသာဍေံဟွံသေၚ် ဟီုကဵုဍေံလေဝ် ဍေံဟွံကၠိုဟ်ပုဟ်၊ ပါဲနူဍိုဟ်ကေက်ဂှ် ပဵုတုဲ က္ဍဟ်ကောန်ၚာ်ဂှ် ဓီုဓုဲဒှ်ကၠုၚ်ဏောၚ်၊ ဇှ်ရ မိမကောန်ၚာ်တအ် အခန်စွံဘာထိၚ်ဒဝ်ကောန်ၚာ်ဏံ မိက်ဂွံကဵုကောန်ၚာ်ဇကု ဍိုဟ်ကေက်ဍာံတှ်ေ ဒးစွံကဵုဍေံ ဒၞာဲဟီုအရေဝ်ဘာသာမိ (မန်) ဍေံတွဵုဏောၚ်” သာ်ဝွံ ညးဆက်ဟီုရ။

စပ်ကဵုကောန်ၚာ်သၟတ် အဝဲဒၟံၚ်ဘာဟွံစိုပ်ဏီတအ်ဂှ် သွက်ဂွံပအပ်စွံ ဗ္တောန်ကဵုဍေံ အရေဝ်ဘာသာမိ (မန်) မာန်တုဲ ပ္ဍဲဍုၚ် ပ္ဍဲကွာန်မန်တအ် ညံၚ်ဂွံသိုၚ်ပ္တန်ပ္တိုန် ဘာထိၚ်ဒဝ်ကောန်ၚာ်မန်ဂၠိုၚ်ဂၠိုၚ်ညိဂှ်လေဝ် ဇၟာပ်ညးတာလျိုၚ်ကမ္မတဳပရေၚ်ပညာ ကောန်ဂကူမန်တအ် ဆဵုဂဗသဳကၠဳကဵု မိမညးဍုၚ်ကွာန်တအ်မ္ဂး ဟီုဆဝ်ဗ္ၚုဟ်ကၠုၚ်လဝ်လၟိုန်ရ။

ဘာထိၚ်ဒဝ်ကောန်ၚာ်ဂှ် ပြာကတ်ဗြော်ဗြေဝ်ကၠုၚ်တုဲ ပ္ဍဲဘာတန် (အလဵုအသဳ) ကီု၊ ပ္ဍဲဘာကောန်ဂကူမန်ကီု၊ ဘာပုဂ္ဂလိကကီု ဗီုညးကဵုညး ပံက်ကၠုၚ်လဝ်နွံတုဲ မိမကောန်ၚာ်တအ်လေဝ် ကောန်ဇာတ်စိုပ်အဝဲ စွံဘာထိၚ်ဒဝ်ကောန်ၚာ်ဂွံမ္ဂး ပအပ်စွံကၠုၚ် ဘာထိၚ်ဒဝ်ကောန်ၚာ် ဂၠိုၚ်ကၠုၚ်မံၚ်ဂှ် ဂွံဆဵုကေတ်ရ။

သၞောတ်ပရေၚ်ပညာအလုံမွဲကၟိန်ဍုၚ်ဂှ် ကောန်ၚာ်အာယုက်စိုပ် ၃ သၞာံ ကဵု ၄ သၞာံဂှ် စၟတ်သမ္တီလဝ် အဝဲစွံဘာ ထိၚ်ဒဝ်ကောန်ၚာ်တုဲ စိုပ်အဝဲအာယုက် ၅ သၞာံမ္ဂး ဒှ်အဝဲတိုန်ဘာဗ္တောန်ပညာ (တန်မူလ) ရ။