သ္ဘၚ်သၟာန်သွဟ်လိက်ဝၚ်မန် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် မရနုက်ကဵု ၂၆ ဝါဏံဂှ် ကွးဘာ ၄၁၀၂တၠ လုပ်သွဟ်ကၠုၚ်လဝ်နွံတုဲ ၃၄၉၀ တၠအံၚ်ကၠုၚ်လဝ်နွံရောၚ် ဂွံတီကေတ်ရ။
သ္ဘၚ်သၟာန်သွဟ်လိက်ဝၚ်မန် အလုံဒေသရးမန်သၞာံဏံဂှ် ပါ်လဝ် (၆) ဌာန မပ္တံကဵု ဘာကျာ်လ္ဒောဝ်သာသနာ လ္တူဍုၚ်မတ်မလီု၊ ဘာဟံသာထဝ်လ္တူဍုၚ်ဇြပ်ဗု၊ ဘာကျာ်ဒဵုတၟအ်ဗြာတ် အပ္ဍဲပွိုၚ်ဍုၚ်ရေဝ်၊ ဘာကွာန်ဒဵုတၟအ် ပ္ဍဲရးတနၚ်သဳ၊ ဘာပန်ထဝ် အရာပ်စဳပျးမန် ဍုၚ်ဟံသာဝတဳ ကေုာံ ဘာသုဓမ္မဝတဳ ဍုၚ်ၜံၚ်ကံက် ကၟိန်ဍုၚ်သေံတအ်နွံရ။
ပၞောဝ်ကဵုကွးဘာဂမၠိုၚ် နူ (၆) ဌာနတအ်ဂှ် ကွးဘာတန်အဘိဓရ် လုပ်သွဟ် ၁၂၈၆တၠဂှ် အံၚ်ဇၞးအာ ၁၆၃၃တၠ၊ တန်ဝၚ်ဟံသာဝတဳ ၈၅၄တၠဂှ် အံၚ် ၈၂၀တၠ၊ တန်မုတ္တမ ၄၁၁တၠဂှ် အံၚ် ၄၀၂တၠ၊ တန်သုဝဏ္ဏဘုမ္မိ ၃၃၅တၠဂှ် အံၚ် ၃၂၁တၠ၊ တန်ဝၚ်လိက်ပတ်မန် ၁၈၇တၠဂှ် အံၚ် ၁၈၄တၠ ကေုာံ တန်ဝၚ်အခိုက်ကၞာမန်၁၃၁ တၠဂှ် အံၚ်အာသီုဖအိုတ်ရောၚ်ဂွံတီကေတ်ရ။
ဟိုတ်ဂှ်ရ ရံၚ်အာဗွဲသရောပ်မ္ဂး အပ္ဍဲကဵုကွးဘာလုပ်သွဟ်လဝ်လိက်သီုဖအိုတ်ဂှ် ၈၅ က္ဍိုပ်ကၠံအံၚ်ဇၞးအာလဝ်ရောၚ် ဂွံဆဵုကေတ်ရ။
“သၞာံဏံဂှ် ကွးဘာတအ်လေဝ် ဂွံမံၚ်အခိၚ်ညိကီု၊ ရဲညးပတိတ်ပုစ္ဆာတအ်လေဝ် ချိၚ်ပတိတ်လဝ်ကီု ဟိုတ်ဂှ်ရ အံၚ်ဂၠိုၚ်ညိ။ တုဲပၠန်သၞာံဏံဂှ် ဍုၚ်သေံလေဝ် ပဵုတိုန်မွဲဌာနကီု။ ရဲလ္ရဵုတအ်ဂှ် တိုန်လဝ်တန်ဝၚ်လေဝ်ဟွံတုဲ အာကၠောန်စမံၚ်ကလောန်ဍုၚ်သေံတုဲ ညးတအ် မိက်ဂွံသွဟ်ကီု ကရၚ်ပ္တီလဝ်တၠဂုဏ်အ္စာတအ်၊ ဟိုတ်ဂှ်ရ ဌာနဍုၚ်သေံဂှ်ဒှ်သွဟ်ကၠုၚ်” သာ်ဝွံ ညးတာလျိုၚ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် ကျာ်ဇၞော်အ္စာ ဘဒ္ဒန္တ သဳလဝန္တ ဘာဟံသာထဝ်၊ ဍုၚ်ဇြပ်ဗုဂှ် ဟီုမြော်လဝ်ရ။
နကဵုဂကောံဗ္တောန်လိက်ပတ်မန်ကေုာံယေန်သၞာၚ်ဗုဒ္ဓဘာသာ အလုံဒေသရးမန်ဝွံ ပ္ဍဲကဵုဂိတုဇှ်ေ(၆)မံက် (ဂိတုဂျောန် စၟတ်တ္ရဲ ၁)၊ တ္ရဲအဒိုတ်တေံမ္ဂး ကဵုအာလပ် ကုကွးဘာ ညးမသ္ကေက်သ္ကာ ကေုာံ ကွးဘာညးမအံၚ်လဝ်လိက်တအ် ပ္ဍဲကဵုဌာနကွာန်သာံလှေဝ်၊ ပွိုင်ဍုင်ဘာအင်၊ တွဵုရးဍုင်ကရေင်ဂှ်ရောၚ် သ္ဂးရ။
” ခေတ်တ္ရဲဏံဂှ် ဗ္တောန်လိက်ဘာဥတုကညၚ်ဏံတအ် ပါလုပ်ပ္ဍဲကဏ္ဍကိစ္စဇၞော်အိုတ်မွဲရ၊ မုဟိုတ်ရောတှ်ေ အခိၚ်လၟုဟ်ဏံဂှ် ဘာအလဵုအသဳကီု ဘာတက္ကသိုဟ်တအ်ကီု ဗျာပ်တြးမံၚ်တုဲ ကွးဘာဗွဲမဂၠိုၚ် ညးဍုၚ်ကွာန်ဗွဲမဂၠိုၚ်ဂှ် စိုတ်လုပ်စမံၚ်ကဵုပညာတအ်ဏံသၟးရဂၠိုၚ်။ ဗွဲမဂၠိုၚ် ဂွံအခိၚ်သၠးတှ်ေ အာကတ်လိက်အေၚ်ဂလိက်၊ ကောန်ပျူ၊ အာဍုၚ်မ္ရးသၟးရဂၠိုၚ်။ ဆ္ဂး ကွးဘာသှ်ေမံၚ်ပ္ဍဲဍုၚ်ပိုဲတအ်ဏံဂှ် အခိၚ်ဥတုဏံမှ ဟွံကတ်လိက်မန်တှ်ေ အခိၚ်လဵုမှဂွံကတ်ဏီရော၊ မန်ပိုဲဟွံကတ်လိက်မန်ပိုဲတှ်ေ ဒှ်လက်သဏ်ဂကူပိုဲဂွံကၠေံရ” သာ်ဝွံ ကွးဘာတန်ဝၚ်လိက်ပတ်မန် ညးမကလိဂွံလာဘ်တၟေၚ် အလုံဒေသရးမွန်မွဲတၠ နူပွိုၚ်ဍုၚ်ဗုဂှ် ဟီုရ။
ၜိုန်ဂှ်ကီုလေဝ် နကဵုဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဝွံ ဇၟာပ်သၞာံ ကၠောန်ဗဒှ်ကၠုၚ်မံၚ် ပေါဲပြိုၚ်သွဟ်လိက်မန်ကီု ပတိုန်ဂုဏ်စရာဲ ကုကွးဘာမန် ညးမသ္ကေက်သ္ကာ ကေုာံ ညးမအံၚ်တန်ဝၚ်တံကီု ဇိုန်နှၚ်ကဵုလာပ်တဆိပ်ကြာ ကုကွးဘာအံၚ်တန်ဝၚ်တုဲတံဂမၠိုၚ်ကီုနွံတုဲ စရိတ်တက်လိက်၊ စရိတ်သွဟ်လိက်၊ စရိတ်ကဵုလာပ်စှ်ေဘတံ မ္ဒးရပ်စကာကၠုၚ် ဗၞဟ်ဟွံအောန်နွံကၠုၚ်ရ။
ဟိုတ်ဒှ်သာ်ဂှ်ရ ခက်ခုဲကၠုၚ်ဒၟံၚ်စပ်ကဵုကိစ္စသြန်နွံတုဲ ရန်တၟအ်ကဵုတန်ဗ္တောန်လိက်ပတ်မန် ညံၚ်သ္ဂောံဗ္တောန်အာ ဗွဲမလံလကာဖာမာန်ဂှ် နကဵုညးတာလျိုၚ်ဂကောံတအ် ခၞံဗဒှ်ကၠုၚ်လဝ် သြန်ဗွဝ်ထာဝရနိဓိ ပ္ဍဲဂိတုမေ ၂၅ဂှ်ရ။
သၞာံတုဲကၠုၚ်တေံမ္ဂး ဌာန သၟာန်သွဟ်လိက် ၅ ဌာနမပ္တံကဵု ဘာကျာ်လ္ဒောဝ်သာသနာ လ္တူဍုၚ်မတ်မလီု၊ ဘာဟံသာထဝ်လ္တူဍုၚ်ဇြပ်ဗု၊ ဘာကျာ်ဒဵုတၟအ်ဗြာတ် အပ္ဍဲပွိုၚ်ဍုၚ်ရေဝ်၊ ဘာကွာန်ဒဵုတၟအ် ပ္ဍဲရးတနၚ်သဳကေုာံ ဘာပန်ထဝ် အရာပ်စဳပျးမန် ဍုၚ်ဟံသာဝတဳတအ်ဟေၚ် ကၠောန်သ္ပသၟာန်သွဟ်ကၠုၚ်လဝ်တုဲ အပ္ဍဲကဵုကွးဘာ ၃၀၀၀ တၠပြၚ် လုပ်သွဟ်လဝ်ဂှ် ၁၅၀၀ တၠပြၚ် အံၚ်ဇၞးကၠုၚ်လဝ်ရ။
ပ္ဍဲသၞာံဏံဂှ် ဌာန ဘာသုဓမ္မဝတဳ၊ ဍုၚ်ၜံၚ်ကံက်၊ ကၟိန်ဍုၚ်သေံလေဝ် ကၠောန်ဗဒှ်ကၠုၚ်သဘၚ်သၟာန်သွဟ်လိက်ပတ်မန်မာန်ကၠုၚ်တုဲ လၟိဟ်ကွးဘာအံၚ်လိက်လေဝ်ဂၠိုၚ်တိုန်ကၠုၚ်ရ။
သၞာံဂတဏံမ္ဂးလေဝ် သွက်ကွးဘာမန်ဂမၠိုၚ် တန်တဴဒၟံၚ်ပ္ဍဲဍုၚ်သေံတအ် ညံၚ်သ္ဂောံကတ်လ္ရတ်အာ လိက်ပတ်မန် ဥတုကညၚ် ကေုာံ သၟာန်သွဟ်အာလိက်ပတ်ဝၚ်မန်ဂှ် ဆက်ရေၚ်တၠုၚ်ပ္တိတ်အာဇြဟတ်ရောၚ် ကျာ်ဇၞော်အ္စာ မဟာနန္ဒဇယ(မဟာထဝ်) မၞုံပိုန်ဘာ သုဓမ္မဝတဳ၊ ကွာန်ၜၚ်က္ဍဳ၊ ဍုၚ်ၜံၚ်ကံက်ဂှ် ဟီုမြော်လဝ်ရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဝွံ ဘာသာအဘိဓရ်၊ တန်ဝၚ်ဍုၚ်ဟံသာဝတဳ၊ တန်ဝၚ်ဍုၚ်မုဟ်တၟံ၊ တန်ဝၚ်ဍုၚ်သုဝဏ္ဏဘုံ၊ ဝၚ်လိက်ပတ်မန် ကေုာံ လိက်အခိုက်ကၞာမန်တံ ကၠောန်ဗဒှ်ကၠုၚ်ဒၟံၚ် သဘၚ်သၟာန်သွဟ်လိက်လၟေၚ်လၟေၚ်တုဲ ကွးဘာအံၚ်ဇၞးအာ (၆) တန်တုဲမ္ဂး ဇိုန်ကဵုတဆိပ်ကြာ တန်ဝၚ်အာစိုပ်ဒတုဲရောၚ် ဂွံတီကေတ်ရ။
0 Comments