နူကဏေံ (မေ ၂၈) အခိင်ဖါနူဂယးပြဟ်ဂှ် ဒပ်ပၞာန်သေံကဵု ဒပ်ပၞာန်ကမ္ဗဝ်ဒဳယျာ ဒှ်ပန်ပှော်ညးသ္ကအ်တုဲ အကြာပ်ဒပ်ဇၞော် ဒပ်ပၞာန်ကာမ္ဗဝ်ဒဳယျာ အာယုက် ၄၈ သၞာံမွဲတၠ မ္ဒးပြဟ်လလုဲအာရောင် ဌာနဝန်ဇၞော်ပရေင်စဵုဒၞါ ကာမ္ဗဝ်ဒဳယျာ ဟီုပ္တိတ်လဝ်ရ။

ပရေင်ပန်ပှော်ဏအ်ဂှ် က္တဵုဒှ်အာလဝ် ပ္ဍဲကဵုပွိုင်ဍုင်ဏာမ်ယင် ခရိုင်ဥဖန်ရာစ္ဆဌာနဳ ဒၞါဲပယျဵုဒၞက်တိဍာ်သေံကဵု ကာမ္ဗဝ်ဒဳယျာတုဲ ဟိုတ်နူပရေင်ပရူတိဍာ် ဆေင်ကဵုပယျဵုဒၞက်ဍုင်ဂှ် အကြာဒပ်ပၞာန်ၜါလ္ပာ် ရမျှာင်လွဟ်ဗြုအာ ဗၞတ်ပွိုင် ၁၀ မိဏေတ်ဒှ်ရောင် ပ္ဍဲဌာန်ပရိုင်သေံဂမၠိုင် ချူဓမံက်လဝ်ရ။

“ရန်တၟအ်ဟွံမွဲမွဲသာ် ဒှ်အာပရေင်ပန်ပှော်ညးသ္ကအ်ရ၊ ဒပ်ပၞာန်ၜါလ္ပာ် အဃောဂေတ်မံင်ကင် ဒၞါဲတိဍာ်ညးကဵုညးဂှ် တ္ရဲတၟးဟွံခိုဟ်ဏီ ဟွံစၟဳလဝ်မွဲသာ် ဒှ်အာရ၊ နူဂှ်တုဲ ဒုသ္ကိုပ်ဝန်ဇၞော် ကဵု ဝန်ဇၞော်ပရေင်စဵုဒၞါ ကမ္ဗဝ်ဒဳယျာတေံ ညးတအ်ဆက်နင်ဖုင်ရ၊ အရင်ဂွံဒေါံပန်ပှော်ဂှ် ပညဳညးသ္ကအ်တုဲရ၊ ဆဂး ဒပ်ပၞာန်တအ်ဂှ်တှ်ေ ဟွံဂွံကလေင်ဆုတ်တိတ်နူဒၞါဲဂှ်ဏီပုဟ်” သာ်ဝွံ ဒုသ္ကိုပ်ဝန်ဇၞော်သေံ ဟီုဂးလဝ်ကဵုအ္စာပရိုင်တအ် ပ္ဍဲတ္ရဲဏအ်ရ။

ပ္ဍဲကဵုဒှ်ပရေင်ပန်ပှော်ညးသ္ကအ် မွဲချိုန်ခဏဂှ် လ္ပာ်ဒပ်ပၞာန်သေံ ဒးဝပ်၊ ချိုတ်အာ ဟွံမွဲရောင် ဂးရ။

အတိုင်မချူဓမံက်လဝ် ပ္ဍဲကဵုပရိုင်ဂမၠိုင်မ္ဂး လ္ပာ်သေံဟီုဂှ် ဒပ်ပၞာန်ကမ္ဗဝ်ဒဳယျာ ဖံက်ပန်လွဟ်ကၠာတုဲ လ္ပာ်ကမ္ဗဝ်ဒဳယျာဂှ်လေဝ် နူကဵုဒပ်ပၞာန်သေံ ဖံက်ပန်လွဟ်ကၠာဏောင် က္လေင်ဟီုလဝ်ညးသ္ကအ် ဂတးဂတန်နွံ ဂွံဆဵုကေတ်ရ။

ဆဂး ဒၞါဲဒှ်အာပန်ပှော် ပ္ဍဲပယျဵုဒၞက်လၟုဟ်ဂှ် အကြာသေံကဵု ကမ္ဗဝ်ဒဳယျာ ဒှ်မံင်ကယျာန်ဓဝါန်ညးသ္ကအ် ဆေင်ကဵုပရေင်ပိုင်ပြဳတိဍာ် သၞာံဗွဲမလအ်လရတုဲ အတိုင်တုပ်လဝ်စိုတ်နူသၞာံ ၂၀၀၀ တေံမ္ဂး ပ္ဍဲကဵုဒၞါဲပယျဵုဂှ်ဝွံ လ္ဇံက်ဗ္ဒိုပ်ပၞာန်တၟိကီု၊ ၜံက်ခါဲကတိုင်ကီု၊ ဗပေင်ဇြဟတ်ပၞာန်တအ်ကီုဂှ် ကၠောန်သ္ပဟွံဂွံရောင် ဌာန်ပရိုင်သေံတအ် ဓမံက်ထ္ၜးလဝ်ရ။

ဆက်စပ်ကဵုပရေင်ပရူတိဍာ်ပယျဵုဂှ်တုဲ ဟွံမိက်ညာတ် ပေါဲပၞာန်၊ ဟွံမိက်ပသောင်ပြသၞာကဵုလွဟ်ရောင်ဟီုကၠာလေဝ် လ္တူဒပ်ပၞာန်ကမ္ဗဝ်ဒဳယျာတအ် ရေင်တၠုင်ကၠောန်ဏာကမၠောန်တအ်ဂှ် ထံက်ဂလာန်ပေင်င်ရောင် သ္ကိုပ်ဝန်ဇၞော်တြေံ ကမ္ဗဝ်ဒဳယျာ ဟန်သာန် ဟီုပ္တိတ်လဝ်ရ။

သေံကဵု ကမ္ဗဒဳယျာဂှ် ပယျဵုဒၞက်တိဍာ် နွံကြပ်မံင်ညးသ္ကအ်တုဲ ဆေင်ကဵုပရေင်ပိုင်ပြဳတိဍာ် ကေုာံ ကပေါတ်အာဲကၟာဲတြေံတြဟ်တအ်ဂှ် ဒြပ်ညး ဒြပ်အဲ ဒှ်ကၠုင်မံင်ပရေင်ကယျာန်ဓဝါန်ညးသ္ကအ် အဆက်က်နွံကၠုင်ရ။