လညာတ်သ္ရဳဂၠိပ်၊ မာံပိုန်။

လိက်လောင်တြးၜါတၞးဟီုဂှ် …

၁။ လိက်လလောင်တြး ပရေင်ပံင်ကောံ ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) NMSP (AD) ကေုာံ ဒပ်ပၞာန်ဗၠးၜးဍုင်မည် (MLA) ပ္တိတ်လဝ် ပ္ဍဲစၟတ်တ္ရဲ ၂၄၊ ဂိတုမေ။

၂။ လိက်လလောင်တြး လညာတ်ကံင်ဇြဳဖေဝ်ဒရေဝ်ဍုင်မန် MSFC လ္တူ NMSP (AD) ကေုာံ MLA တအ် ပံင်ကောံညးသ္ကအ် ပ္တိတ်လဝ် ပ္ဍဲစၟတ်တ္ရဲ ၂၅၊ ဂိတုမေတအ်ဂှ်ရောင်။

လိက်လလောင်တြး (၁)

§ ဒပ်ပၞာန်ဗၠးၜးကောန်ဂကူမန် MNLA (AD) ကေုာံ ဒပ်ပၞာန်ဗၠးၜးဍုင်မည် (MLA) တအ် ပံင်ကောံတုဲ သ္ပမွဲဒပ် ပြံင်သၠာဲတဴယၟု “ဒပ်မန်ရာမည” ရ။

§ သွက်ဂွံပၠတရဴကဵုဗော်ဂှ် ထပ်လံင်ဗပေင်စုတ် ညးက္ဍိုပ် နူ MLA တုဲ ကလေင်ဒက်ပ္တန် ကမ္မတဳပရေင်ဍုင်ကွာန် ပရေင်ပၞာန် ဗော် NMSP-(AD) တၟိ နကဵုလၟိဟ်မၞိဟ် ၂၆ တၠရ။

§ ပၞောဝ်ကဵု၂၆ တၠဂှ် က္လေင်ရုဲစှ်ပ္တိုန် ကမ္မတဳက္ဍိုက်ပ် ပရေင်ဍုင်ကွာန် ပရေင်ပၞာန် (၉) တၠ၊ ကမ္မတဳပၞာန် (၇) တၠရ။

§ “ဒပ်မန်ရာမည” ဂှ် မ္ဒးမံင်သၟဝ်ပၠတရဴ ပရေင်ဍုင်ကွာန်ပရေင်ပၞာန် ဗော် NMSP (AD) ရောင်။

လိက်လလောင်တြး (၂)

§ NMSP (AD) ကဵု MLA ပံင်ကောံတုဲ ဒက်ပ္တန် “ဒပ်မန်ရာမည” ဂှ် ဒုင်တၠုင်ရ။

§ ဒပ်မၞုံသၟဝ်ပၠတရဴ MSFC ကီု သီုဒပ်မဟာမိတ် MSFC တအ် ပ္ဍဲအရာဗ္တိုက်တၠအဝဵုပၞာန်ဂှ် ပံင်ဗစပ်အာကဵု “ဒပ်မန်ရာမည” ရောင်။

§ ပ္ဍဲအရာမပံင်ဗစပ် ပရေင်ဍုင်ကွာန် ပရေင်ပၞာန် ကာလပၠန်ဂတးတ္ရဲဏအ်ဝွံ စၞးဂကောံမွဲဂကောံဓဝ် စဳရေင်က္ဍိုက်ပ်ဂှ် သီုဖ္အိုတ်ပါလုပ် ပံင်ဗစပ်က္ဍိုက်ပ် နဲကဲပံင်တောဲ ရေင်တၠုင်အာမွဲစွံ (Coming Together Model) ရ ဒှ်ဂၠံင်ဍာန်ထေက်ကြိုက်အိုတ်ရောင်။

§ နဲကဲပံင်တောဲ မ္ဒးလုပ်မံင်သၟဝ်ဂကောံမွဲမွဲ (Coming Under Model) ဂှ် ဟွံဒုင်တဲရောင်။

§ MSFC ကဵု NMSP-(AD) ရန်တၟအ်ပရေင်ဍုင်ကွာန်တုပ်မံင်ဂှ်ရ ဆက်ဂၠာဲအာ နဲကဲသ္ဂောံပံင်ဗစပ် အရာပရေင်ဍုင်ကွာန်ရောင်။

ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) NMSP (AD)

အတိုင်လိက်လလောင်တြး (၁) တေံမ္ဂး နူကဵု (ဂကောံ) က္ဍိုက်ပ် ပရေင်ဍုင်ကွာန်ပရေင်ပၞာန်ဂှ် ဒှ်ကၠုင် (ကမ္မတဳ) က္ဍိုက်ပ် ပရေင်ဍုင်ကွာန်ပရေင်ပၞာန်တုဲ NMSP (AD) က္လေင်သ္ပလဝ် ပရေင်ပြံင်သၠာဲ စပ်ကဵု ဗီုပြင်ဒက်ပ္တန်ဗော်နွံဂှ် ဂွံဆဵုကေတ်ရ။

သာ်ဂှ်ကီု ပ္ဍဲအရာခါန်ကၞက်ကဵုတာလျိုင်တအ်ဂှ်လေဝ် စပ်ကဵုဝေါဟာအဆံင်အလံင် မစကာဒၟံင်နူတမ် မတွံဂး ဒၞါဲ (ညးက္ဍိုပ်၊ ဒု ညးက္ဍိုပ်) ဂှ် ပြံင်သၠာဲစကာကၠုင် (ဥက္ကဌ၊ ဒု ဥက္ကဌ၊ ညးအုပ်ကာ) ရ။

လ္တူမပြံင်သၠာဲလဝ် ဗီုပြင်ဒက်ပ္တန်ဗော်ဝွံ NMSP (AD) ဇၞော်သၠဲ၊ ပခိုင်ကၟောန်ပ္တိုန် ဆေင်ကဵုပရေင်ဍုင်ကွာန်၊ ပရေင်အုပ်ဓုပ်ဗော်ရောင် ဖျေံတၟော်ဂွံရ။ မုဟိုတ်ရောမ္ဂး အခိင်စပါ်တိတ်ကၠုင်နူ ဗော်ဍုင်မန်တၟိ (ဗဟဵု) သၞာံ ၂၀၂၄၊ ဂိတုဖေဖဝ်ဝါရဳ စၟတ်တ္ရဲ ၁၄ တေံဂှ် ပရေင်ပၞာန်ဟေင် ဒှ်ပထမ ဒးကဵုဖျုန်ဂၠိုင်တုဲ စပ်ကဵုပရေင်ဍုင်ကွာန်၊ ပရေင်အုပ်ဓုပ်တအ်ဂှ် ဒှ်ဒုတိယရောင် NMSP (AD) ဒုင်ကေတ်လဝ်ရ။

လၟုဟ် ပ္ဍဲကဵုကမ္မတဳက္ဍိုက်ပ် ပရေင်ဍုင်ကွာန်ပရေင်ပၞာန် NMSP (AD) ဂှ် ခါန်ကၞက်လဝ် နဒဒှ် ဥက္ကဌ နာဲဇဲယတုဲ ဒုဥက္ကဌ နာဲလျးဂကူ ကေုာံ ညးအုပ်ကာ နာဲဗညာလဴတအ်ရ။ ဗီုမကၠိုဟ်ကေတ်လောဲမ္ဂး ညးတအ် ၃ တၠဂှ် ဒှ်ဥက္ကဌ၊ ဒု ဥက္ကဌ၊ ညးအုပ်ကာ ဗော် NMSP (AD) ရောင်။

ပ္ဍဲကဵု “ဒပ်မန်ရာမည” သၟဝ်ပၠတရဴ ဗော် NMSP (AD) ဂှ် ခါန်ကၞက်ပ္တိုန်လဝ် ဒုသ္ကိုပ်ပၞာန် စၠန်ထဝ် နဒဒှ် ညးဂအုပ်က္ဍိုက်ပ်ဒပ်ပၞာန် (စစ်ဦးစီးချုပ်) တုဲ ဒု ညးဂအုပ်က္ဍိုက်ပ်ဒပ်ပၞာန် (၁) ဂှ် သ္ကိုပ်ဗိုလ်ဇၞော် သဵုဝေန်၊ ဒု ညးဂအုပ်က္ဍိုက်ပ်ဒပ်ပၞာန် (၂) ဂှ် သ္ကိုပ်ဗိုလ်ဇၞော် ကျဳဇြာန်တအ်ရ။

ယၟုမ္ဂး ဒပ်ပၞာန်ဗၠးၜးကောန်ဂကူမန် MNLA (AD) ကေုာံ ဒပ်ပၞာန်ဗၠးၜးဍုင်မည် MLA တအ်ဂှ် မ္ဒးရိုဟ်ပလီုထောံ သီု ၂ ဒပ်ဏောင်တုဲ သွက်ဂွံဒှ်မွဲအမိင်ဓဝ် မွဲစၞောန်ဓဝ် ဗွဲမကၟောန်ဓရောန် သၟဝ်အလာံ “ဒပ်မန်ရာမည” ဂှ် ပၟိက်ဇၞော်ကၠုင်ရ။

ကံင်ဇြဳဖေဝ်ဒရေဝ်ဍုင်မန် MSFC

ကြဴနူပၞာန်သီအဝဵု ပ္ဍဲသၞာံ ၂၀၂၁၊ ဂိတုဖေဖဝ်ဝါရဳ စၟတ်တ္ရဲ (၁) တုဲဂှ် တၞဟ်နသ္ဂောံ သ္ပစၞးကဵု တွဵုရးဍုင်မန် ကေုာံ ကောန်ဂကူမန် ပ္ဍဲအရာဒစဵုဒစးတၠအဝဵုပၞာန်တုဲ ဒက်ပ္တန်ပ္တိုန် ကမ္မတဳပံင်ကောံရေင်တၠုင်ကေင်ကာဍုင်မန် (MSICC) မွဲဂှ် ရုဲစှ်ပ္တိုန်လဝ် နာဲသုဝဏ္ဏ (ညးမနုက်တိတ်နူဗော် MUP) နဒဒှ်ဥက္ကဌရ။

နူကဵုကမ္မတဳ (MSICC) ဂှ်ဟေင် ဗလးဏာလဝ် နဒဒှ်ညးစၞးဂကူမန် သွက်ဂွံလုပ်ကေတ်တာလျိုင် ပ္ဍဲအလဵုအသဳညဳသၟဟ်ကောန်ဂကူ NUG အဆံင်ဝန်ဇၞော်၊ ဒုဝန်ဇၞော် ဖ္အိုတ် (၃) တၠ (နာဲကောရတ်၊ နာဲသုဝဏ္ဏ ကေုာံ မေန်ဇြေယျာဥု) တအ်ရ။

ကာလစိုပ်သၞာံ ၂၀၂၃ ဂိတုဂျာန္နဝါရဳ စၟတ်တ္ရဲ ၁၅ ဂှ် သွက်ဂွံဗဒှ်ဇြဟတ် ပရေင်ဍုင်ကွာန် မသ္ပစၞးကဵုတွဵုရးဍုင်မန် ကေုာံ ဂကူမန်အိုဿီုဂးတုဲ ကမ္မတဳ (MSICC) ဂှ် ပြံင်သၠာဲကၠေံယၟု ကံင်ဇြဳဖေဝ်ဒရေဝ်ဍုင်မန် MSFC နဒဒှ်ဖေဝ်ဒရေဝ်ယူနေတ် (Federal Unit) မွဲရောင်။

ပြဟ်ဟ်ဏအ်ဝွံ ပ္ဍဲကံင်ဇြဳဖေဝ်ဒရေဝ်ဍုင်မန်ဂှ် ဒက်ပ္တန်လဝ် နကဵုဒြဟတ်ညးချဳဒရာင် နူဂကောံမဟာဇန်မန်၊ ညးဒစဵုဒစးတၠအဝဵုပၞာန်၊ သၟာပရေင်ဍုင်ကွာန် ပ္ဍဲဍုင်၊ မ္ရးဍုင်၊ သၟတ် ကေုာံ ဂကူကောန်ဍုင်အရင်မၞုံတွဵုရးဍုင်မန်လ္ရဵုတအ်ရ။

ဒုင်သ္ဇိုင်ကဵုလိက်လလောင်တြး (၂) တေံမ္ဂး MSFC ဂှ် ဟိုတ်နူအာမံင် ဗီုပြင်ဒပ်ပံင်ကောံ ရန်တၟအ် ဒက်ပ္တန်ရးဍုင်မန် State Unit တုဲ ပ္ဍဲအရာသဳကၠဳပရေင်ပံင်ဗစပ် ဂွံလုပ်အာ သၟဝ်အာက္ဍိုပ်ပရေင်ဍုင်ကွာန် ဗော် NMSP (AD) ဂှ် ဟွံအံင်ဇၞး ဟီုဓမံက်လဝ်ရ။

တုဲပၠန် သၟဝ်ဌာနစဵုဒၞါ ကံင်ဇြဳဖေဝ်ဒရေဝ်ဍုင်မန်ဂှ် ဒပ်စဵုဒၞါဍုင်မန် MSDF၊ ဒပ်ပၠန်ဂတးဍုင်မန် MSRF ကေုာံ ဒပ်စဵုဒၞါညးဍုင်ကွာန်ရေဝ် YPDF ဖ္အိုတ်နွံမံင် ၃ ဒပ်ရောင်။ လ္တူဒပ် ၃ ဒပ်ဏအ် နူကဵုဌာနစဵုဒၞါ MSFC ၜိုတ်လဵုထိင်ကောပ်အာ ဆက်စပ်ကဵု အမိင်၊ စၞောန် ဗွဲမစှ်ေသၞောတ်မာန်ရောဂှ် ပၟိက်ဇၞော်လောန်ရ။

သရောပ်မ္ဂး –

အခိင်အခါတ္ရဲဏအ်ဝွံ ပရေင်ပံင်ကောံလုပ်ပေါဲဗ္တိုက်မွဲစွံဂှ် နွံဇြဟတ်ဂၠိုင်အိုတ်ရ။ “မန်ညဳမ္ဂး သၞဖေက်အိုတ်” ဂွံဒှ်ကၠုင်နတဲမာန်ဂှ် ဂကောံပရေင်ဍုင်ကွာန်ၜါလ္ပာ် တံင်ပတေင်လဝ်တၞုင်ဇုက်ရေင်သ္ကအ်မ္ဂး ဖဵုဂုဏ်သွက်မန်နွံအောန်သၟးဟွံက သီုဗဒှ်ဏာဇြဟတ် သွက်သၞဂကူမန်တအ်လေပ်ရောင်။

မုဟိုတ်ရောမ္ဂး ကံင်ဇြဳဖေဝ်ဒရေဝ်ဍုင်မန် MSFC ကီု ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန် NMSP (AD) ကီုဂှ် ရန်တၟအ်ကဵု သ္ဂောံဗ္တိုက်သရိုဟ်တၠအဝဵုပၞာန်၊ သ္ဂောံဓမံက်ပ္တိုန်ဍုင်မန်တုဲ ဒက်ပ္တန်ကၠုင်လဝ်ရ။

ဒှ်သာ်ဂှ်ရ ကာလဏအ် နပရေင်ဍုင်ကွာန် သ္ဂောံပံင်ဗစပ်ဒှ်မွဲဂှ် ဝါတ်မံင်ဏီ ဒးကေတ်အခိင်ဒှ်ကၠာလေဝ် နပရေင်ပၞာန် ပ္ဍဲအရာလုပ်ပေါဲဗ္တိုက်ကဵုတၠအဝဵုပၞာန် သ္ဂောံထ္ဍေင်ပ္တိတ်သၞ နူတိဍာ်ဍုင်မန်မာန်ဂှ် မ္ဒးကဵုဖျုန် စွံအာရီုဂၠိုင်င်ထေက်ရောင်။