ဒေသဍုၚ်မန်သကုတ်လ္တူ ပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်ဂှ် ဒၟာနူဒပ်ကံၚ်သဳပၞာန်တအ် ထ္ပက်လုပ်ကၠုၚ်နကဵုဇြဟတ်ဂၠိုၚ်ဂၠိုၚ်တုဲ ရဲနူကဵုမတ်မလီု၊ မုဟ်ဍုၚ်၊ ဇြပ်ဗု အာကၠောန်မံၚ်ကၠအ်ဒေသဂှ်ဝွံ ဒးကလေၚ်စဴကၠုၚ်အိုတ်ရောၚ် ညးမကၠောန်မံၚ်ကၠအ်မွဲတၠ ဟီုထ္ၜးရ။
ဒေသပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်ဂှ် ညးဍုၚ်ကွာန်နူဒေသမုဟ်ဍုၚ်ကဵု ဇြပ်ဗုတအ် ရာန်လဝ်တိကၠအ်ဒေသဝွံတုဲ အာကၠောန်မံၚ်ကၠအ် နွံတဴဗွဲမဂၠိုၚ်ဂှ် အကြာမွဲၜါတ္ၚဲဏံ ဒၟာနူ ဒပ်ကံၚ်သဳပၞာန်တအ်ထ္ပက်လုပ်ကၠုၚ်တုဲ ရဲကၠောန်ကၠအ်ဗွဲမဂၠိုၚ် မ္ဒးကလေၚ်စဴကၠုၚ်ရောၚ် သ္ဂးရ။
“မွဲၜါတ္ၚဲဏံ ပၞာန်ဗၟာတအ်ဍိုက်ထပက်လုပ်ကၠုၚ် နကဵုဇြဟတ်ပၞာန်ဟွံအောန်ပုဟ်၊ ညးဍုၚ်ကွာန်မန်ပိုဲ အာကၠောန်မံၚ်ကၠအ်ထၜိုတ် ဒေသသဓီုကဵု ၜဳကလေၚ် ၜိုတ်နွံဂှ် ကလေၚ်စဴကၠုၚ်အိုတ်ရ၊ လ္ၚဵုဂှ် ထောံလဝ်ကၠအ်အတိုၚ်ဂှ်၊ လ္ၚဵုဂှ် လိၚ်ဗလးလဝ်ကောန်ရဲနွံ” သာ်ဝွံ နာဲၚာ် နူမုဟ်ဍုၚ် ညးအာကၠောန်မံၚ်ကၠအ်ထၜိုတ် အကြာၜဳကလေၚ်ကဵု ကျာ်ထဝ်ဂှ် ဟီုရ။
ဒေသပွိုၚ်ဍုၚ်သဓီု၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ကျာ်ထဝ် (၃) ပွိုၚ်ဍုၚ်ဂှ်ဝွံ မ္ၚးဇိုၚ်ဝုတ်ဒိုဟ်လတူဍုၚ် ဒေသကွာန်ဂမၠိုၚ်ဂှ် ဂကောံပၠန်ဂတးဂမၠိုၚ်တအ် အုပ်ဓုပ်ထိၚ်ဒဝ်လဝ်တုဲ ကံၚ်သဳပၞာန်တအ် ထ္ပက်လုပ်ကၠုၚ်မ္ဂး သွက်ဂွံဒှ်ပေါဲဗတိုက်နွံဂှ်ရ ညးဍုၚ်ကွာန် ကွာန်ဗဒါဲတအ်ဂှ်ကီု ညးဍုၚ်ကွာန်အာကၠောန်မံၚ်ကၠအ်ထၜိုတ် နူဒေသမတ်မလီု၊ မုဟ်ဍုၚ်၊ ဇြပ်ဗုတအ် ညးဂမၠိုၚ် ကလေၚ်စဴကၠုၚ်အိုတ်ရ။
“ဒေသသဓီု၊ ၜဳကလေၚ်၊ ကျာ်ထဝ်တေံဂှ် ဂကူမန်ပိုဲအာကၠောန်မံၚ်ကၠအ်ဒေသတေံ နွံဂၠိုၚ်ကွေံကွေံမွဲတဲ၊ လ္ပာ်တေံဂှ် ၚုဟ်လေဝ်ဒးမံၚ်တုဲတှေ် မန်နူကဵု မတ်မလီု၊ မုဟ်ဍုၚ်၊ ဇြပ်ဗု အာရာန်လဝ်တိဒေသတေံ နွံဟွံအောန်၊ ကၠောန်မံၚ်ကၠအ်အတေံ မံၚ်မံၚ်အတေံလေဝ် နွံဟွံအောန်၊ သၞာံတုဲကၠုၚ်ဏံလေဝ် အသိၚ်ပေါဲပၞာန်ဏံရ လ္ၚဵုဂှ် ထောံလဝ်ကၠအ်အတိုၚ်ဂှ်လေဝ်နွံ၊ အဵုလၟုဟ်ပၠန် ပေါဲဗတိုက်ဂှ်လေဝ် ဂစာန်တေၚ်တိုန်၊ ပၞာန်ဗၟာဂှ်လေဝ် ဍိုက်ထပက်လုပ်ကၠုၚ်ပၠန်တှေ် ရဲကၠအ်ဆက်ကၠောန်မံၚ်လၟုဟ်ဂှ်လေဝ် ဒးထပ်ဂြိပ်ကလေၚ်စဴကၠုၚ်ပၠန်” သာ်ဝွံ ညးအာကၠောန်မံၚ်ကၠအ် ပ္ဍဲဒေသဍုၚ်ကျာ်ထဝ် ကရပ် (ကၚ်းမွန်းချောၚ်း) မွဲတၠဂှ် ထပ်ဟီုရ။
ဒေသပွိုၚ်ဍုၚ်သဓီု၊ ၜဳကလေၚ်၊ ကျာ်ထဝ် မွဲဒမြိပ်ဂှ်ဝွံ ညးဍုၚ်ကွာန် နူဒေသသကုတ်သၠုၚ်ကျာတအ် အာရာန်လဝ်တိကၠအ်နွံဗွဲမဂၠိုၚ်တုဲ ကၠောန်တဵုမံၚ်ကၠအ်ထၜိုတ်အိုတ်ရ။ ကၠအ်လ္ၚဵုဂှ် ခွါတ်ဂွံတုဲ မံၚ်မံၚ်အတေံလေဝ်နွံ၊ လ္ၚဵုဂှ် အာမွဲအံၚ် စဴမွဲအံၚ်လေဝ်နွံ၊ လ္ၚဵုဂှ် ဗလးလဝ်ကောန်ရဲတဝ်ခွာတုဲ ကၠောန်မံၚ်လေဝ်နွံရ။ ကြဴနူကဵုပၞာန်သီအဝဵုတုဲဂှ် ဒေသဝွံ ဂကောံပၠန်ဂတးဇဳ ချဳဒရာၚ်ကၠုၚ်ဂှ်တုဲ ဒှ်ကၠုၚ်ဒေသမုက်ပၞာန်ရ။
ဒေသဍုၚ်မန်သကုတ်လတူ မပ္တံကဵု ပွိုၚ်ဍုၚ်သဓီု၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ကျာ်ထဝ်ဂှ် ဂကောံပၠန်ဂတးကရေၚ် (ကေအေန်ယူ) တအ်ကဵု ဂကောံပၠန်ဂတး ဒပ်စဵုဒၞာညးဍုၚ်ကွာန်ဒေသတအ် ချဳဒရာၚ်ဒၟံၚ်ဂၠိုၚ်တုဲ နူလ္ပာ်ဒပ်ကံၚ်သဳပၞာန်တအ်လေဝ် ပန်ထဍိုၚ်ဏာ နကဵုအမၠံက်ဇၞော်ကီု၊ ထောံဗမ်နကဵုက္ၜၚ်ကျာကီုဂှ် ကၠောန်သ္ပကၠုၚ်နွံအရိုဟ်ဒဒှ်တ္ၚဲရဂှ်လေဝ် တၠကၠအ်တအ်ဟီုရ။
လၟုဟ်မ္ဂး နူကဵုဒပ်ပၠန်ဂတးကရေၚ် (ကေအေန်ယူ) ကေုာံ ဒပ်စဵုဒၞာ ညးဍုၚ်ကွာန်ဒေသတအ် ပံၚ်တောဲတုဲ ဗတိုက်သီဒၟံၚ် ဗဒိုပ်၊ တမ်ဒပ် ကံၚ်သဳပၞာန် မွဲဒမြိပ်အကြာဒေသတိဍာ်ပယျဵုသေံ ဂၠိုၚ်ကဵုဒၞာဲဂှ် သွက်ဂွံအာကဵုရီုဗၚ်တုဲ ဍိုက်ထပက် ကၠုၚ်ဇြဟတ်ပၞာန်ဏံဂှ် ပေဲါပၞာန်သွက်ဂွံဒှ်သ္ကာတ်မြဟ်နွံမံၚ်ရောၚ်ဂှ်လေဝ် ညးဒေသတအ် တော်မံၚ်အိုတ်ရ။
