ပ္ဍဲသၞာံဗ္တောန်ပညာ (၂၀၂၅-၂၀၂၆) ဏံဂှ် ကွးဘာစွံဘာပုဂ္ဂလိကဂၠိုၚ်မံၚ်ရောၚ် ညးရေၚ်တၠုၚ်ကေတ်မံၚ်တာလျိုၚ် သွာၚ်ကောပ်ကာဲကွးဘာ ပ္ဍဲဘာပုဂ္ဂလိက လတူဍုၚ်မတ်မလီုမွဲတၠ ဟီုလဴထ္ၜးရ။
ဟိုတ်ကွးဘာဂမၠိုၚ် ဂွံစွံဘာပုဂ္ဂလိဂၠိုၚ်ဂှ်ဝွံ ပ္ဍဲဘာတန်အလဵုအသဳဂှ် ပရေၚ်ဗ္တောန်လိက်ပ္ဍဲဘာ ဟွံဇြိုဟ်နက်ကီု၊ ပရေၚ်ကောပ်ကာဲကွးဘာ ပ္ဍဲဘာကဵု ဘာပုဂ္ဂလိက ဟွံတုပ်ညးသ္ကအ်ကီုတုဲ မိမကွးဘာတအ် ပအပ်ဘာကုကွးဘာတအ် ပ္ဍဲဘာပုဂ္ဂလိကဂၠိုၚ်ရောၚ် ညးဟီုထ္ၜးသာ်ဝွံရ။
“သၞာံဏံ ကွးဘာတအ် ကၠုၚ်မံၚ်ဘာပုဂ္ဂလိက ဂၠိုၚ်နူသၞာံတုဲကၠုၚ်တေံဏီ၊ မုဒှ်ရော ၜိုတ်ပိုဲညာတ်ဂှ်တှ်ေ မံၚ်ပ္ဍဲဘာတန်အလဵုအသဳဂှ် ပရေၚ်ဗ္တောန်လိက်ပ္ဍဲဘာဂှ် ဗ္တောန်ထောံညိညရဓဝ်တုဲတှ်ေ ဗ္တောန်လိက်ပ္ဍဲဂျူယှေန်ဂှ်ရောၚ် ဒှ်မံၚ်အဓိက ဒှ်မံၚ်ဗီုဂှ်၊ သၞောတ်ဍေံလီုမံၚ် ဣဏံမွဲသာ်၊ မွဲသာ်ပၠန်ဂှ်တှ်ေ ကိစ္စမၞိဟ်ဍောတ်ဍောတ်လၟုဟ်ဏံ ဒးဟီုတှ်ေ စပ်ကဵုဒ္ဂေတ်လီုလာ် အာနူသ္ၚိဂှ် အာတိုန်ဘာကွေံရ၊ ဍေံတိုန်မံၚ်ဘာဍာံဍာံရဟာ၊ မုဒှ်မံၚ် မုဍေံသ္ပမံၚ် ကွးဘာဗြဴဗြဴကီု၊ ကွးဘာတြုံတြုံကီုဂှ် ဒ္ဂေတ်လီုလာ်ဂၠိုၚ် ပြးဇးဂၠိုၚ်၊ တိုန်ဘာဂှ်တှ်ေ မိမတအ် ဂွံပတှ်ေစအောန်၊ ပ္ဍဲဘာပုဂ္ဂလိဂှ်တှ်ေ ပရေၚ်ထိၚ်ဒဝ်ကောပ် ကာဲကွးဘာဏံ သၞောတ်ဍေံစှ်ေဂၠိုၚ်” သာ်ဝွံ ညးတာလျိုၚ်ကောပ်ကာဲကွးဘာဂှ် ဟီုရ။
ပ္ဍဲကဵုအခိၚ်ပံက်ဘာလၟုဟ်ဏံဂှ် ဟိုတ်နူကွးဘာတအ် လုပ်မံၚ်ဘာပုဂ္ဂလိကဂၠိုၚ်လောန်ဂှ်တုဲ ဘာပုဂ္ဂလိကလ္ၚဵု ကွးဘာတအ်မံၚ်ဟွံရုမ်ဂပ်ဒှ်တုဲ ဒးဖျေံဗီု သိုၚ်ခၞံပတိုန်ဘာယာယဳတၟိ လေဝ် ဒှ်ကၠုၚ်နွံရ။
“ဘာပုဂ္ဂလိက ပ္ဍဲဍုၚ်ဇြပ်ဗု ဒုၚ်မံၚ်တဲလၟိဟ်ကွးဘာ အကြာ (၁၅၀) တၠရဂှ် သၞာံဏံ ဒှ်အာ (၃၀၀) တၠပြၚ်၊ ကွးဘာတအ် သ္ဇက်မံၚ်ဟွံမွဲတုဲတှ်ေ ဒးဂၠာဲရာန်ကၠအ်ဂအာၚ် ဃရေက်ဃရေက်တုဲ ဒးဂစာန်သိုၚ်ပတိုန်ဘာယာယဳ အရၚ်ကွးဘာတအ် ဂွံ မံၚ်ဂွံ၊ ဘာပုဂ္ဂလိက တၞဟ်တၞဟ်လေဝ် ကွးဘာတအ်ပေၚ်ကၟိုဟ်မံၚ်ဖအိုတ်ရ” သာ်ဝွံ မိမကွးဘာ စွံလဝ်ပ္ဍဲဘာပုဂ္ဂလိက လတူဍုၚ်ဇြပ်ဗုမွဲတၠ ဟီုထ္ၜးရ။
ပ္ဍဲဘာတန်အလဵုအသဳဂှ် ၚုဟ်စရိတ်မံၚ်ဘာဂှ် ၜိုန်ရဩန်ဟွံအိုတ်ကီုလေဝ် မိမကွးဘာတအ် ဟွံစှေ်စိုတ်ကဵု ပရေၚ်ဗ္တောန်လိက်ပ္ဍဲဘာဂှ်တုဲ မိမကွးဘာဗွဲမဂၠိုၚ်တအ် အပ်စွံကၠုၚ်ကောန်ကွးဘာတအ် ပ္ဍဲဗဒမ် (အဆောၚ်) ဂၠိုၚ်၊ အပ်စွံကၠုၚ် ပ္ဍဲဘာပုဂ္ဂလိက ဂၠိုၚ်ကၠုၚ်ရ။
ပရေၚ်ဗ္တောန်လိက်ပ္ဍဲဗဒမ် (အဆောၚ်) တအ်ဂှ် ပံက်လဝ် သီုသၞောတ်ဗ္တောန်လိက်မ္ၚးဘာ ကော် ဂျူယှေန်တုဲ ကွးဘာတန်ဒေါဝ်မွဲတၠမ္ဂး သီုစ သီုမံၚ် သီုဗ္တောန်လိက် ပွိုၚ်မွဲသၞာံ ဗၞတ်အကြာ (၂၀) ကိုဋ်နွံတုဲ ကွးဘာတန်သၠုၚ်မွဲတၠမ္ဂး သီုစ သီုမံၚ် သီုဗ္တောန်လိက် ပွိုၚ်မွဲသၞာံ ဒၞာဲသဝ်အိုတ် ဗၞတ်အကြာ (၃၀) ကိုဋ်ပြၚ် ဒဵုကဵု (၅၀) ကိုဋ်ပြၚ်နွံမံၚ်ရောၚ် ဂွံတီကေတ်ရ။
ပ္ဍဲဒေသဍုၚ်မန်ဂှ် ဗွဲကြဴနူကဵု ပၞာန်သီအဝဵု (၂၀၂၁) တုဲဂှ် ကွးဘာဒေါံဇူနူဘာဂၠိုၚ်၊ အ္စာဘာလေဝ် ဒေါံဇူဂၠိုၚ်တုဲ လတူဍုၚ်ဂမၠိုၚ်တအ်ဂှ် ပံက်ကၠုၚ်ဘာပုဂ္ဂလိက ဂၠိုၚ်ကၠုၚ်ရောၚ် ဂွံတီကေတ်ရ။
