အခိၚ်ပရေၚ်ဍုၚ်ကွာန်ဟွံညိၚ် ပရေၚ်ဍုၚ်ကွာန်ပရေံဏံဂှ် ပရေၚ်ပိုန်ဒြပ်စှေ်ဒၟံၚ်ကီုလေဝ်  ဟိုတ်နူၚုဟ်ထဝ်တိုန်ဗက်ဩန်ဂၠးတိတုဲ တိကၠအ်ဂအာၚ်သ္ၚိလေဝ် က္ဍၚ်ဗက်တိုန်အာနွံရောၚ် ညးရေၚ်တၠုၚ်သွံရာန်ကၠအ်ဂအာၚ်သ္ၚိတအ် ဟီုရ။

တိကၠအ်ဂအာၚ်သ္ၚိတုဲကၠုၚ်တေံ မၞုံၚုဟ်မး မွဲဂအာၚ် (၂၀၀) ကိုဋ်ဂှ် လၟုဟ်မ္ဂး ဒှ်အာဗၞတ် (၄၀၀) ကိုဋ်တုဲ ၚုဟ်က္ဍၚ်တိုန်အာ ကြပ်ကဝက်ဒှ်ဒၟံၚ်ရောၚ် သ္ဂးရ။

“နူကဵုၚုဟ်ထဝ်တိုန်အာ မွဲဒ္ကေဝ် (၈၀) ကိုဋ်တုဲဂှ် ၚုဟ်ဂအာၚ်သ္ၚိလေဝ် က္ဍၚ်ဗက်တိုန်အာ မွဲဂအာၚ်ကၠာကၠာတေံ ၜိုတ်အကြာ (၂၀၀) ကိုဋ်ဂှ်တှေ် လၟုဟ်ဒှ်အာ ဗဒဲါ (၄၀၀) ကိုဋ်ဒှ်မံၚ်၊ တိကၠအ်ဂအာၚ်သ္ၚိလေဝ် တိုန်ဗက်မံၚ်ၚုဟ်ထဝ် ၚုဟ်ဒဝ်ဠာ ကီု” သာ်ဝွံ ညးရေၚ်တၠုၚ်သွံရာန်တိကၠအ်ဂအာၚ်သ္ၚိ ပ္ဍဲဍုၚ်မတ်မလီုမွဲတၠ ဟီုရ။

ၜိုန်ရၚုဟ်တိကၠအ်ဂအာၚ်သ္ၚိ က္ဍၚ်တိုန်ဗက်ၚုဟ်ထဝ် ဗဒဲါၜါဆဒှ်အာကီုလေဝ် ပဲါနူရဲရာန်စွံထိၚ်ဒဝ် သွက်ဂွံသွံရာန်စတုဲ မၞိဟ်ရာန်သိုၚ်သ္ၚိကွေံကွေံဂှ် အောန်မံၚ်ရောၚ် ညးဆက်ဟီုရ။

“ရဲသွံရာန်မံၚ်တိကၠအ်ဂအာၚ်သ္ၚိလၟုဟ်ဂှ်တှေ် ရာန်ထိၚ်စွံလဝ်သၟးရ နွံဂၠိုၚ်၊ သိုၚ်သ္ၚိတုဲ ရာန်ဂှ် နွံအောန်ကွေံကွေံမွဲတဲ၊ လ္ၚဵုဂှ်တှေ် လှုဲနွံတုဲ ရာန်စွံလဝ်၊ ဂွံၚုဟ်တှေ် ကလေၚ်သွံ၊ ဒးဟီုတှေ် ရဲသၠာဲဂတးကၠောန်စပရေၚ်ပိုန်ဒြပ်ကဵု ဂအာၚ်သ္ၚိဂှ်နွံဂၠိုၚ်၊ ဂအာၚ်သ္ၚိၚုဟ်ဂွံတိုန်ဂှ် ဟိုတ်နူဏံလေဝ် ပါမွဲတၚ်” သာ်ဝွံ သ္ဂးရ။

တိကၠအ်ဂအာၚ်သ္ၚိဂှ် ဟိုတ်နူဂွံၚုဟ်ခိုဟ်တုဲ ကၠအ်သတ်ဆု ဇိုၚ်ဍုၚ် ကရပ်ကွာန်တအ်ကီု၊ ကၠအ်ထ္ၜိုတ်သ္ကဲဂၠံၚ်ဇၞော်တအ်ဂှ်ကီု ပလီုတုဲ ကလေၚ်ကၠောန်ပ္တိုန်တိကၠအ်ဂအာၚ်သ္ၚိ ဂၠိုၚ်ကၠုၚ်ကွေံကွေံရ။

တၟော်ကဵုသၞာံတုဲကၠုၚ်တေံမ္ဂး ဂအာၚ်သ္ၚိလတူဍုၚ်မွဲဂအာၚ် (၂၀၀၀) ကိုဋ်ဂှ် လၟုဟ်ဒှ်အာ ဗဒဲါ (၅၀၀၀) ကိုဋ်ကီု၊ တိကၠအ်ဂအာၚ်သ္ၚိမ္ၚးဍုၚ် သ္ကဲဂၠံၚ်ဇၞော်မွဲဂအာၚ် (၁၀၀၀) ကိုဋ်ဂှ် ဒှ်အာ အကြာ (၂၀၀၀) ကိုဋ်ကီု၊ တိကၠအ်ဂအာၚ်အကြာကွာန် မွဲဂအာၚ် အကြာ (၂၀၀) ကိုဋ်ဂှ် ဒှ်အာ ဗၞတ် (၄၀၀) ကိုဋ်ရ။