လိက်ပရေင်လညာတ်၊ ယက္ခဂုမ္ဘဏ်

ပိုဲမၞိဟ်တံမ္ဂးဂှ် ဇၟာပ်ပ်တ္ၚဲ မ္ဒးဆဵုဂဗမံင်ကဵုပြသၞာဂမၠိုင်တုဲ ဇၟာပ်ပ်တ္ၚဲ ပိုဲမၞိဟ်တံ မ္ဒးပသောင်ဒၟံင် ပြသၞာရ။ စပ်ကဵုပသောင်ပြသၞာဂှ် ယဝ်ရစိစောန်မံင်အရာဇဳသာ်မ္ဂး က္လိဂွံဂုဏ်ဖဵု ဗွဲမဂၠိုင်မာန်ရ။ ပြသၞာလ္ၚဵု မဆဵုဂဗလၟုဟ်ဂှ် ကြံင်မ္ၚိုဟ်နူကဵု ပြသၞာကေင်ဆဵုဂဗလဝ် လောန်ကၠုင်တုဲတုဲတေံ ဂၠိုင်ကဵုဆလေဝ်ဒှ်မာန်ရ။ ပြသၞာဂှ် ဗွဲမဂတာပ်တဲ သီုဟွံမွဲကဵုပရေင်ခက်ခုဲ သောင်က္လးမာန်မ္ဂး ဒှ်ညးမၞုံကဵုအစောန်စရာဲခိုဟ်ရ။ ဇၟာပ်ပ်ပြသၞာ နဲသောင်က္လးဍေံ နွံမွဲဗီုဓဝ်ဟွံသေင်ရ။ သွက်သ္ဂောံသောင်က္လးပြသၞာဂှ် ဗီုလဵုပိုဲပလေဝ်ပလေတ်လဝ်နွံနွံ အရာပိုဲဟွံတီလဝ်တံ နွံမံင်လၟိုန်ရ။ ဟိုတ်ဂှ်ရ ပြသၞာညံင်ဟွံဂွံဒှ်ဂှ် မ္ဒးစွံလဝ်သတိလၟိုန်တုဲ ဒှ်ပြသၞာရမ္ဂး မ္ဒးပသောင်ကၠေံ ဍေံပြဟ်ဟ်ရောင်။

ပေါဲသဳကၠဳပညဳပညပ်ရေင်သ္ကံမွဲမွဲ ဂွံနွံကဵုသဘဴဓဝ်ဟီုဂှ် “မွဲလ္ပာ်ဂှ် ရပ်လဝ်လွဟ်မ္ဂး မွဲလ္ပာ်တေံ ဂန်လဝ်လွဟ်ကီုမှ ဟီုဂးပရေင်ဥပဒေဂွံရ” “မွဲလ္ပာ်ဂှ် ရပ်လဝ်မြတှ်ေ မွဲလ္ပာ်တေံ ဂန်လဝ်မြကီုမှ သဳကၠဳပရေင်စဳပၞောန်ဂွံရ” “မွဲလ္ပာ်ဂှ် ကၠုင်ကဵုတဲသၟးတုဲ မွဲလ္ပာ်တေံ ကၠုင်နင်ကဵုတဲသၟးမ္ဂး သဳကၠဳပြသၞာ နူတမ်မူလဂွံရ” ဆ္ဂး ပေါဲသဳကၠဳပညဳပညပ်မွဲမွဲ “မွဲလ္ပာ်ဂှ် ဂန်လဝ်လွဟ်တုဲ ပ္ဍဲတဲညးမွဲလ္ပာ်တေံ နွံဆမြမ္ဂး ဓဝ်ဍာံဂှ် နွံပ္ဍဲတဲ ညးမဂန်လဝ်လွဟ်ဂှ် သၟးရ” “မွဲလ္ပာ်ဂှ် ဂန်လဝ်လွဟ်တုဲ ညးမွဲလ္ပာ်ဂှ် မုဟွံမွဲမ္ဂး ပ္ဍဲတဲညးမဂန်လဝ်လွဟ်ဂှ် နွံဆလွဟ်သၟးဟွံသေင် လမျီုညးမကၠုင်လဝ်ကဵုတဲသၟးဂှ်လေဝ် နွံပ္ဍဲတဲညးဂန်လဝ်လွဟ်ဂှ်ရ” သၞောဝ်ဥပဒေကီု၊ စဳပၞောန်ကီု၊ ဓဝ်ဒ္ဂေတ်လၟေတ်တံဂှ် ဒုင်သဇိုင်ကဵု ပရေင်တုပ်သၟဟ်တုဲမှ နွံကဵုအဓိပ္ပါဲရောင်။

ပ္ဍဲလိုက်ဏံ ဓဝ်ဍာံဟီုဂှ် ထဝ်သြန်တံ ဟီုကၠုင်ဂလာန်မ္ဂး ဓဝ်ဍာံတံဂှ် မ္ဒးသ္ၚိတ်ဇြအာရ။ ၜိုန်ဂှ်လေဝ် လ္တူထဝ်သြန်ဂှ် အဝဵုဟီုကၠုင်ဂလာန်မ္ဂး ထဝ်သြန်တံဂှ် မ္ဒးဆုတ်က္လေင်အာပၠန်ရ။ ပ္ဍဲလိုက်ဏံ ဗွဲမဂၠိုင်ဂှ် ညးမချူဓဇက် ဖျေံလဝ်စဳပၞောန်တံဂှ်ပၠန်ရ ဗွဲကိုပ်ကၠာ မလေပ်ဖံက်ပလီုတဴရ။ မုဟိုတ်ဂွံဒှ်သာ်ဂှ်ရောမ္ဂး စဳပၞောန်တံဂှ် ချူဓဇက်လဝ် သွက်သ္ဂောံကၠေင်ဒက် ကုညးဒြဟတ်အောန်တံတုဲ သွက်ညးမၞုံကဵုဒြဟတ်ဇၞော်တံဂှ် ဒှ်ကပေါတ်ကြိယာ အခိင်နွံပၟိက် သွက်သ္ဂောံရပ်စပ်သုင်စောဲရ။ ပ္ဍဲလိုက်ဏံ အရာခိုဟ်ဟ်တံ သ္ဂောံက္လိဂွံဂှ် မ္ဒးရုန်ဂစာန်ကေတ် နကဵုနဲကဲနာနာသာ်ရ။

ပြသၞာပ္ဍဲဍုင်ပိုဲ မကတဵုဒှ်မံင်တ္ၚဲဏံဂှ် ဆလအ်ဂွံတုဲမာန်ရော နူကဵုစတမ်တေံ ၜိုန်ရနဲကဲပသောင်နွံကီုလေဝ် ဟွံဒုင်ပသောင်ရေင်သ္ကံ ဗီုညး ညးပတေင်တုဲ ပြသၞာဍေံဇၞော်ကၠုင်ရ။ ပတှ်ေဒြဟတ်တုဲ ပသောင်ဂှ် ဒှ်ကမၠောန် ဟွံဓဝ်ယာရ။ ဟွံဓဝ်ယာမ္ဂး ဟွံပြေပြံင်ရေင်သ္ကံတုဲ ဟွံၜိုဟ်သြိုဟ်ရ။ လၟုဟ်လေဝ် တၠအဝဵုပၞာန် သ္ကိုပ်ဗိုလ်ဇၞော်မေန်အံင်လှာင်တံ ကၠောန်ဏာပေါဲသဳကၠဳ ပရေင်ၜိုဟ်လလမ် ပွိုင်(၃)တ္ၚဲ တုဲဒှ်အာကီုလေဝ် သွဟ်ခိုဟ် သွက်ဍုင်သ္ဂောံၜိုဟ်သိုဟ် မုလေဝ်ဟွံတိတ်ကၠုင်ရ။

အလဵုအသဳပၞာန်တံ ဂန်လဝ်လွဟ်တုဲ ကော်ဘိက်ရဲပၠန်ဂတးတံ ကဵုသၠးကၠေံလွဟ်၊ ကဵုလုပ်ပေါဲရုဲမာဲ၊ ကဵုလုပ်သဳကၠဳ ပရေင်ၜိုဟ်လလမ်ဂှ် ဒှ်ညးဍိုက်ကဵုဒြဟတ်ရ။ ဟိုတ်နူဒြဟတ်ဇၞော်တုဲ ကၠောန်ပေါဲရုဲမာဲကီုဒှ်၊ ကၠောန်ပေါဲသဳကၠဳၜိုဟ်လလမ်ကီုဒှ် ကၠောန်မ္ဂးဒှ်ဖအိုတ်ရ။ ဆ္ဂး ပေါဲရုဲမာဲဟွံမွဲကဵုရှ်သာ၊ ပေါဲသဳကၠဳဟွံမွဲကဵုရှ်သာရဒှ်မာန် ဟိုတ်နူဒြဟတ်ဇကုဇၞော်တုဲ ညးဂှ် မိက်ဂွံပါလုပ်ကီုတှ်ေပါ ဟွံပါတှ်ေတုဲ နကဵုစရိုတ်ယုတ်မာ ကၠောန်သ္ပမံင် အတိုင်ဂွံဆဵုကေတ်ဂှ်ရ။ ဂလာန်ညးဟီုစနွံ “အကဝ်တှ်ေ သ္ကံရဲအဖဝ်နွံ ပရအ်တှ်ေ သ္ကံနွံ” ဂှ်ရ ကမၠောန်ညးမၞုံကဵုဒြဟတ်ဇၞော်တံကၠောန်မ္ဂး ခိုဟ်ဟ် ပရေံပရေံ တုဲဒှ်အာတွဵုရ။

က္လေင်ကျောဝ်အာ လ္ပာ်ဂကောံပၠန်ဂတးတံပၠန်လေဝ် အကြာဏံ နူကဵုဥက္ကဌအာဇြဳယာန် အာဂတတုဲ ဂစာန်ဆဵုဂဗဒၟံင်ကဵုဂကောံပၠန်ဂတးတံ သွက်သ္ဂောံသဳကၠဳအာ ပရေင်ၜိုဟ်လလမ် ကဵု အလဵုအသဳတၠအဝဵုပၞာန် မေန်အံင်လှာင်တံနွံရ။ ၜိုန်ဂှ်လေဝ် ညးက္ဍိုပ်သ္ကိုပ်ပၠန်ဂတး အေန်ယူဂျဳတံ ရမျာင်တိတ်ကၠုင် ဒးတက်ကျာသဳကၠဳကဵုပၞာန်ဂှ် ဟွံဒုင်တဲဂးပၠန်ရ။ “ပိုဲလုပ်ကၠုင်ပေါဲဗတိုက် ပ္ဍဲကဵုကြပ်စိုပ်တိုင်ပ္ကဴရဂှ် ပညဳကဵုတက်ကျာ ဗီုဏံဒုင်တဲဟွံမာန်” ဂးရ။ ပဋိပက္ခမွဲမွဲ သ္ဂောံပြေပြံင်မာန်ဂှ် ဟွံတက်ကျာ ဟွံသဳကၠဳကဵုညးတၠခန္ဓ ညးမဒှ်တၠပဋိပက္ခဂှ်မ္ဂး သာ်လဵုဂွံပြေပြံင်မာန်ရော? ဒြဟတ်သွက်သ္ဂောံဗတိုက်သၠေက်ကၠေံ ဗဗိုင်ကၠေံသီုရိုဟ်ဂှ် ဍိုက်ပေင်မ္ဂး သ္ပဂွံရ။

ရံင်ကဵုအကာဲအရာ ပကတိရုပ်ဍာံဍာံမ္ဂး သ္အာင်နူဒပ်ပၞာန်ရခေင်တုဲ အဆံင်သ္ဂောံဗတိုက်သရိုဟ်ကၠေံ မွဲမွဲလ္ပာ်ဂှ် ဟွံညာတ်အာဏီရ။ ယဝ်ဗတိုက်သရိုဟ်ကၠေံ အိုတ်ဒၟံင်ရမ္ဂး ဂကောံပၠန်ဂတးကောန်ဍုင်အရင်းတံ ကၠေံကၠက်အာလအ်ရ။ လ္ပာ်လဵုလေဝ် သ္ဂောံဗတိုက်သရိုဟ်ကၠေံရင်သ္ကံ လောဲလောဲသွာသွာဂှ် ဒှ်မာန်ဟွံလောဲရ။ ဗီုညး ညးပတေင်ဂှ် ဒှ်အရာသွက်ပဋိပက္ခ သ္ဂောံလလမ်ဟဲအာဟွံသေင်ရ။ မွဲလ္ပာ်ဂှ် ရပ်လဝ်လွဟ်တုဲ တက်ကျာမ္ဂး ဇကုလေဝ် ဂန်လဝ်လွဟ်တုဲ မ္ဒးတက်ကျာရ။ လ္ပာ်ဇကု ဒြဟတ်အောန်ဒၟံင်မ္ဂး ဒၞါဲဂီုကၠီုနွံသွက်ဇကုဂှ် ဇကုမ္ဒးအာတ်မိက်ဒၞါဲရ။ ဗီုလ္ပာ်ဇကု မိက်ဂွံဒှ်ဂှ် လိုန်လဝ်တိကၟောန်န်တုဲ မ္ဒးဟီုဂးသဳကၠဳရ။ ဂၠံင်တရဴဏံဟေင် အာစိုပ်ဂၠံင်တရဴၜိုဟ်လလမ်မာန်ရ။

သရောပ်ကၠေံမ္ဂး အကာဲအရာကာလပစ္စုပ္ပန်ဏံ သ္ၚဳဂၠိပ်ရံင်မ္ဂး အလဵုအသဳတၠအဝဵုပၞာန်ဂှ် ပတေင်လဝ် ဂၠံင်တရဴဍေံတုဲ သွက်ဍေံသ္ဂောံဆက်ဂါံကွာ်အာရ။ ပ္ဍဲတဲဍေံ လွဟ်နွံဏောင်၊ တိဍာ်ဍုင်ဇၞော်နွံဏောင်၊ ဂကောံဗက်ဍာ်သာ ဗက်လက်ကရဴဍေံနွံဏောင် ညးတၞဟ်မုဒှ်ဒှ် သွက်အဝဵုဍေံသ္ဂောံဆက်တန်ကြန်အာရ ဍေံကၠောန်အာဟေင်ရ။ လ္ပာ်ဂကောံပၠန်ဂတး အေန်ယူဂျဳဂှ်လေဝ် ကေမ်ၛာပ်လဝ် ဇကုဏောင်ဇၞးလဝ်မာဲ ပၞာန်တၠအဝဵုတံဂှ် ပၠံင်ကေတ်အဝဵု ဒှ်အလဵုအသဳဟွံလုပ်သၞောဝ် ကဵုတၠအဝဵုပၞာန်ရမ္ဂး သွက်သ္ဂောံဒးတက်ကျာဟွံမွဲသ္ဂးတုဲ ပတေင်ဒၟံင်ရ။ ပ္ဍဲတဲညးတံ လွဟ်နွံ၊ သြန်ထံက်ပင်နွံ၊ ဒၞါဲညးတံအာစိုပ်ဂှ် အဝဵုညးတံနွံရ။ ညးဍုင်ကွာန်ပိုဲတံဂှ် ပ္ဍဲတဲလွဟ်လေဝ်ဟွံမွဲ၊ အဝဵုလေဝ်ဟွံမွဲတုဲ ကြေပ်မံင်ညံင်ရဴချောဲဇုက်ဂၞင် အကြာခံက်ၜါတုဲ ဂလာန်မန်ဟီုလဝ်နွံဒၟံင် “အကြာဂၠဴၜါဒိ ချောဲဇုက်ဂၞင်သၠေက်” ဂှ် ကောန်ညးဍုင်တံဟေင် စိုပ်မံင်ဒဒိုက်ရောင်။