သၟတ်ဒးဒုၚ်ရပ်လဝ် နကဵုကွဳလိုန်ဓာတ် လိုၚ်ဇြေန်ဟွံမွဲ (Without) လ္ၚဵုဂှ် မၞိဟ်ဆက်စပ်တအ် အာဗက်လေဝ် ညးတာလျိုၚ်မဆေၚ်စပ်တအ် ဟွံကဵုဆဵုတုဲ သွက်ဒးဒှ်ဂဝိၚ် ဂွိၚ်ဖေက်ဒးဒုၚ်ကော်ဏာ သ္ပကောန်ပၞာန်နွံရောၚ် မသသၟတ် ဒးဒုၚ်ရပ်လဝ် နူပွိုၚ်ဍုၚ်ရေဝ်သၟဝ်ကျာမွဲတၠဂှ် ဟီုရ။
“ရပ်ဏာဂှ် အမှုကွဳလိုန်ဓာတ်လိုၚ်ဇြေန်ဟွံမွဲ (Without) ရ၊ မၞိဟ်လ္ၚဵုဂှ်တှ်ေ အာဗက်နုက်ပ္တိတ်နၚ်ကဵုဩန်တုဲတှ်ေ ကွဳဒးဒုၚ်သီတုဲ ဂွံဖျဴနၚ်မၞိဟ်နွံ၊ မၞိဟ်လ္ၚဵုဂှ် အဆက်ခိုဟ် ဥက္ကဌကွာန်ညးခိုဟ်တုဲတှ်ေ နုက်ပတိတ်ဂွံသီုကွဳ သီုမၞိဟ်လေဝ်နွံ၊ မၞိဟ်လ္ၚဵုဂှ်တှ်ေ မၞိဟ်အာဗက်လေဝ် ဍေံဟွံထ္ၜးပုဟ်၊ ဍေံဟီုဂှ်တှ်ေ ဒးဒုၚ်ထံၚ်ဂးဟဂှ် ဒးဒှ်ဂဝိၚ်ဂှ် ဖေက်ဍေံကော်ဏာကဵု သ္ပကောန်ပၞာန်” သာ်ဝွံ မသကောဒေံ သၟတ်ဒးဒုၚ်ရပ်ဂှ် ဟီုထ္ၜးရ။
ပ္ဍဲဍုၚ်မန်ဝွံ စတမ်နူ မေ ၃၁ ဂှ်တုဲ စရပ်ဒၟံၚ် ကွဳလိုန်ဓာတ်၊ ကွဳစက်ကာ လိုၚ်ဇြေန်ဟွံမွဲ (Without) ဇၟာပ်ပွိုၚ်ဍုၚ်နွံဂှ်တုဲ ဗွဲမဂၠိုၚ်ဂှ် စောဲပ္တိုန်ဒုဟ်ဂဗုတ် ရပ်စပ်သုၚ်စောဲ ကပေါတ်ဟွံလုပ်သၞောဝ်ဥပဒေ သ္ဂးတုဲ တက်ဒန်ဩန်တုဲမ္ဂး ဗၠးစဴနွံ၊ ဒးဒုၚ်သီစက်ယာန်တုဲ မၞိဟ်ဗၠးစဴလေဝ်နွံ၊ လ္ၚဵုဂှ် စက်ယာန်လေဝ်ဒးဒုၚ်သီ မၞိဟ်ဟွံဗၠးလေဝ်နွံမံၚ် သ္ဂးရ။
“ၜိုတ်ဍေံရပ်ဂွံလဝ်ဂှ်တှ်ေ ဍေံတအ် (ညးတာလျိုၚ်ဗၠာဲသၟိၚ်) ဟီုဂှ်တှ်ေ ဒးဒုၚ်ထံၚ်ဖအိုတ်ရဏောၚ်၊ ဆဂး မၞိဟ်ဇကုဗက်စိုပ် ဗက်ဂတာပ်တှ်ေ ကဵုဩန်တုဲ ဗၠးသၟးရဂၠိုၚ်၊ ဆဂး မၞိဟ်လ္ၚဵုဂှ်တှ်ေ အဝဲလေဝ်ထတ်ယုက်ဍောတ်မံၚ်၊ မၞိဟ်ဗက်ဂှ်လေဝ် လဇုဲလဇမံၚ်၊ မၞိဟ်ကၠုၚ်နုက်ဂတာပ်တဲ ဟွံမွဲပုဟ်တှ်ေ ဍေံကော်ဏာ အချုက် (ဒၞာဲခြိုၚ်မၞိဟ်) တုဲ ဍေံဟွံကဵုဆဵုရပုဟ်၊ အဵုမၞိဟ်ဂှ်တှ်ေ ဍေံစုတ်ထံၚ်ဟာ၊ ဍေံကော်ဏာကဵု တိုန်ဘာပၞာန်ဟာဂှ် ညးမွဲလေဝ်ဟွံတီ” သာ်ဝွံ အပါသၟတ် ဒးဒုၚ်ရပ်တုဲ နုက်ပတိတ်နၚ် နူပွိုၚ်ဍုၚ်မုဟ်ဍုၚ်မွဲတၠဂှ် ဟီုထ္ၜးရ။
လၟုဟ်မ္ဂး ပ္ဍဲဍုၚ်မန်ဂှ် ရပ်စပ်ဒၟံၚ်ကွဳလိုန်ဓာတ်၊ ကွဳစက်ကာ လိုၚ်ဇြေန်ဟွံမွဲ (Without) ဂွံပွိုၚ် (၅) တ္ၚဲရတုဲ ကွဳစက်ယာန်ကီု၊ မၞိဟ်ဒးဒုၚ်ထိၚ်လဝ်ဂမၠိုၚ်တအ်ကီု နွံဟွံအောန်ရောၚ်ဂှ်လေဝ် အပါသၟတ်ဂှ် ထပ်ဟီုထ္ၜးရ။
ကိုန်အစဳဇန် ရပ်စပ်ကွဳလိုန်ဓာတ်၊ ကွဳစက်ကာ လိုၚ်ဇြေန်ဟွံမွဲ (Without) ဏံဂှ် ဒှ်အစဳဇန် ဗပေၚ်ဇြဟတ်ပၞာန်တၟိတအ်ရောၚ်ဂှ်လေဝ် သ္ကိုပ်အုပ်ဓုပ်ကွာန်ပွိုၚ်ဍုၚ်ရေဝ်မွဲတၠ ဟီုထ္ၜးတုဲ ဂွံမိၚ်ကေတ်ရ။
ဗွဲကြဴနူကဵု ကံၚ်သဳပၞာန်တအ် ပ္တိတ်ကၠုၚ်စေဝ်ပၞောန် ကိုန်စဳဇန် ရပ်ကွဳစက်ယာန် လိုၚ်ဇြေန်ဟွံမွဲ (Without) အလုံဍုၚ်ဂှ်တုဲ ကွဳစက်ယာန်ဂကောံရပ်လွဟ် ကေတ်လဝ်ပရေၚ်ၜိုဟ်လလမ် ကုကံၚ်သဳပၞာန်တအ်ကီု၊ ကွဳစက်ယာန်ခၟဳသၚ်ဂမၠိုၚ်ကီု အကြာကာလဏံ လ္ပတိတ်မ္ၚး အာကၠုၚ်ညိဂှ် သွာၚ်ညးကဵုညး ဆဝ်ဗ္ၚုဟ် ကဵုလဝ်သတိနွံရ။
