ဒၟာနူဟိုတ်မွဲမွဲသာ်တုဲ ကွးဘာနူဘာကောန်ဂကူမန်လ္ၚဵု ပြံၚ်ကၠောံအာ ပ္ဍဲဘာတန်အလဵုအသဳဂှ် ညးတာလျိုၚ်တအ် ဒုၚ်လဝ်တဲဆယာယဳနွံဂှ် အ္စာဘာကောန်ဂကူမွဲတၠ ဟီုလဴထ္ၜးရ။

မိမကွးဘာလ္ၚဵုဂှ် ဒၟာနူဟိုတ်မွဲမွဲသာ်တုဲ ပြံၚ်စိုပ်ကၠုၚ်လ္တူဍုၚ်လ္ၚဵုဂှ် ကောန်ဇာတ်ကွးဘာ ဂှ်လေဝ် ဒးပြံၚ်စွံဘာ ပ္ဍဲဘာတန်အလဵုအသဳနွံဂှ်ရ နူကဵုညးတာလျိုၚ် ဘာတန်အလဵုအသဳ တအ် သွက်ဒးစၟဳစၟတ်နွံမံၚ်ဏီသ္ဂးတုဲ ဒုၚ်လဝ်တဲ ဆဗွဲယာယဳကၠာရ။

“ကွးဘာဂှ် ဂွံအခေါၚ်ဗ္တောန်လိက်ရ၊ ဆဂး ညးတအ် ဒုၚ်လဝ်တဲယာယဳကၠာ၊ ညးတအ် စၟဳစၟတ်မံၚ် တၚ်နၚ်ကွးဘာဏံ၊ ယဝ်ရပြေပြံၚ်တှေ် ဂွံဒှ်ကွးဘာလုပ်သၞောဝ် ပေၚ်ပေၚ်၊ ယဝ်ရ ဟွံစှေ်ဗီုပုဟ်တှေ် အခေါၚ်ဗ္တောန်လိက်ဂှ် ဂွံဗ္တောန်၊ ဆဂး ဒှ်အာ ဗီုကဵုကွးဘာမ္ၚးတုဲ ဒးသွဟ်လိက် ဗီုပြၚ်ကွးဘာမ္ၚး” သာ်ဝွံ အ္စာဘာကောန်ဂကူ ဗွိုၚ်ပ္ဍဲဍုၚ်မွဲတၠ ဟီုရ။

ဌာနပရေၚ်ပညာကောန်ဂကူမန်ဂှ် စၠောံလဝ်ဒဒန်ကဵု ဌာနပရေၚ်ပညာအလဵုအသဳတုဲ စပ်ကဵုပရေၚ်ကွးဘာလေဝ် ကွးဘာနူဘာကောန်ဂကူ ကၠောံပြံၚ်ဘာတန်အလဵုအသဳဂွံ၊ ကွးဘာနူဘာတန်အလဵုအသဳ ပြံၚ်ကၠောံကၠုၚ် ပ္ဍဲဘာကောန်ဂကူဂွံရ။

ဆဂးဂှ် ပ္ဍဲကဵုသၞာံဗ္တောန်ပညာ (၂၀၂၅-၂၀၂၆) ဏံဂှ် လ္ပာ်ပရေၚ်ပညာအလဵုအသဳ ကံၚ်သဳ ပၞာန်တအ် ပတိတ်လဝ်စၞောန်ပၟိၚ် သွက်ဂွံစၟဳစၟတ်အာ ရဲဒစဵုဒစး သဳဒဳအေမ် (CDM) နွံဂှ်တုဲ ကွးဘာနူဘာကောန်ဂကူလ္ၚဵုတအ် ပြံၚ်ကၠောံပ္ဍဲဘာတန်အလဵုအသဳဂှ် ခက်ခုဲကၠုၚ်ရ။

ပရေၚ်ကွးဘာပြံၚ်ကၠောံဘာဂှ် ဒှ်ခက်ခုဲဂှ်ရ ညးတာလျိုၚ်တအ် ဂစာန်ပညဳပညပ်တုဲ ပွိုၚ်ဍုၚ်လ္ၚဵု ပြေပြံၚ်အာနွံရဂှ်လေဝ် အ္စာဘာပွိုၚ်ဍုၚ်ရေဝ်မွဲတၠ ဟီုသာ်ဝွံရ။

“ကိစ္စကွးဘာပြံၚ်ကၠောံဘာဂှ် ကၠာတဲဂှ် ပွိုၚ်ဍုၚ်ရေဝ်ပိုဲလေဝ် ဒှ်ခက်ခုဲကီု၊ လၟုဟ်တှေ် ညးတအ် (ဘာအလဵုအသဳ) ဒုၚ်တဲ ပြေပြံၚ်အာယျ” သာ်ဝွံ သ္ဂးရ။

ဘာကောန်ဂကူမန်ဂှ် ဗွိုၚ်တိဍာ်ဗော်ဍုၚ်မန်တၟိကီု သီုဗွိုၚ်ပ္ဍဲဍုၚ် စတမ်နူတန်မူလ၊ တန်လဒေါဝ်၊ တန်သၠုၚ်၊ တန်ကဝ်လိက် သီုဖအိုတ် နွံလၟိဟ် (၁၃၀) ဘာပြၚ်တုဲ လၟိဟ်အ္စာဘာ ဗၞတ် (၈၀၀) တၠနွံဂှ် ဂွံတီကေတ်ရ။